დაახლოებით ამდაგვარი რამ ჩაწერეს იმ კონტრაქტშიც, რომელიც "მიდლსბროდან" იმავე "სიტიში" ადამ ჯონსონის გადასვლის დროს შედგა. უნდა მოგახსენოთ, რომ "ბორომ" გასულ მაისს პატიოსნად მიიღო მილიონი ფუნტი - ჯონსონი, რომელსაც ეროვნულ გუნდში ჯერჯერობით მხოლოდ ორჯერ აქვს ნათამაშები, კაპელომ მსოფლიოს ჩემპიონატისთვის მოსამზადებელ ეტაპზე გამოიყენა. თუმცა, ჩვენ ჰარტს დავუბრუნდეთ:
"ვფიქრობ, მართალი ვარ, როცა ვამბობ, რომ - თუ კაპელო ბულგარეთთან მათამაშებს, "შრუსბერი" ნახევარ მილიონს მიიღებს. ბოლოს, ინგლისის ნაკრების ამხანაგურ შეხვედრაში მივიღე მონაწილეობა და იმ დღეს შრუსბერელებს ეგონათ, რომ თანხას მიიღებდნენ, მაგრამ მერე გაირკვა, რომ თურმე ხელშეკრულებაში ოფიციალურ შეხვედრაზე ყოფილა ლაპარაკი. მერწმუნეთ, ისეთი გუნდისთვის როგორიც "შრუსბერი თაუნია" ნახევარი მილიონი ძალიან დიდი ფულია. დღეს იქ ჩემი დროიდან მხოლოდ ერთი ფეხბურთელია დარჩენილი, სხვები ახლები არიან".
მაგრამ, არის კი იმის გარანტია, რომ ჰარტს ბულგარელების წინააღმდეგ ათამაშებენ? თავად ფეხბურთელის თქმით ასეთი გარანტია არ არსებობს. "ძალიან ვეჭვობ, რომ ვინმეს ჰქონეს ასეთი გარანტია. არავინ იცის ვის ათამაშებს მწვრთნელი. მხოლოდ ერთი-ორ კაცს შეუძლია მშვიდად თქვას, რომ ინგლისის ნაკრები მისი გუნდია. მე მათ რიცხვში ნამდვილად არ ვარ. ჩემზე მხოლოდ ერთი რამ არის დამოკიდებული - მონდომებით ვივარჯიშო და ვცადო კაპელოს თავი მოვაწონო. ჩვენ, ფეხბურთელები მაყურებლის წინაშე ვალში ვართ. დღეს ძალიან ემოციური თამაში იქნება, ხალხი მოუთმენლად ელის ცვენს გამარჯვებას, არადა ბულგარეთის ნაკრები ძლიერი გუნდია.
იმედი მაქვს, რომ მაყურებელი მხარს დაგვიჭერს და ჩვენ ერთად შევძლებთ წარმატებას. ინგლისელ ერს მოგება სჭირდება".
შემდეგ ჰარტს "მანჩესტერ სიტის" ამბებზე ჰკითხეს. მოგეხსენებათ, ისტლენდზე დიდი კონკურენციაა, ჰარტს არც მეტი არც ნაკლები ცნობილი ირლანდიელი მეკარე შეი გივენი ეცილება ძელებს შორის ადგილს. ინგლისელმა გოლკიპერმა თქვა:
"მე ძალიან მინდა თამაში. სათადარიგოთა სკამზე ჯდომა არ მაინტერესებს. რობერტო მანჩინის პირველ მეკარედ შეი რომ დაესახელებინა მე სხვა გუნდს მოვძებნიდი. გივენი დიდი მეკარეა, რომელსაც თავისი ოსტატობა წლობით აქვს დამტკიცებული და მე იძულებული ვარ ყოველ დღე დაძაბული ვიყო კარში ადგილი რომ არ დავკარგო. მე მას უდიდეს პატივს ვცემ არა მხოლოდ როგორც მეკარეს, არამედ როგორც ადამიანს და პროფესიონალს. მასთან ერთად მუშაობა ძალიან მსიამოვნებს".
