"მანჩესტერ იუნაიტედის" 19 წლის ფრანგი ნახევარმცველის, პოლ პოგბას წინაშე რთული არჩევანია. მას კარიერის გაგრძელებას ტურინის "იუვენტუსი" სთავაზობს. ამასთან, ფეხბურთელს ვერ გადაუწყვეტია, დათანხმდეს თუ არა ამჟამინდელი კლუბის მიერ შეთავაზებულ პირობებს.
იმას, რომ "ბებერი ქალბატონი" ახალგაზრდა ფეხბურთელით სერიოზულად არის დაინტერესებული, პოლის აგენტი, საფეხბურთო წრეებში სახელგანთქმული მინო რაიოლა ადასტურებს. "იუნაიტედმა" პოგბას მოსაფიქრებლად დრო აპრილის ბოლომდე მისცა.
თუკი ფეხბურთელი იქამდე ვერ გადაწყვეტს, მაშინ მანკუნიანელები შეთავაზებას გააუქმებენ და ნიჭიერ ფრანგს ასარჩევიც აღარაფერი ექნება. თუკი ინგლისურ პრესას ვენდობით,
პოლონელის ბედი გადაწყვეტილია
"ეშმაკებმა" ჯერჯერობით ერთადერთი ფეხბურთელის ბედი გადაწყვიტეს. "უოტფორდში" განათხოვრებული ტომაშ კუშჩაკი მომდევნო სეზონს "იპსვიჩის" რიგებში დაიწყებს. "დეილი მეილის" ცნობით, 30 წლის პოლონელს კონტრაქტის ვადა უმთავრდება და ესეც რომ არა, "ოლდ ტრეფორდზე" დარჩენას მას არც არავინ სთავაზობს.
გაიტანს მოდრიჩი და დე მარკოსი მოყვებიან?
"დეილი სტარის" ცნობით კი, "მანიუს" ნიკოლას გაიტანის გარდა, კიდევ ერთი მაღალი კლასის ნახევარმცველის გადაბირება სურს. ლაპარაკია "ტოტენჰემის" 26 წლის პლეიმეიკერ ლუკა მოდრიჩზე. ხორვატის შეძენას სხვა კლუბებიც ეშურებიან, მაგალითად - "ჩელსი" და "მანჩესტერ სიტი". ლუკას ტრანსფერი მსურველებს 40 მილიონი ფუნტი დაუჯდებათ.
ჯერჯერობით ამ თანხას სამეული არ შეუშინებია. ალექს ფერგიუსონის სურვილი გასაგებია. მას პოლ სქოულზის მემკვიდრე უკვე სჭირდება შემადგენლობაში, მიუხედავად იმისა, დარჩება თუ არა 37 წლის ვეტერანი ფეხბურთში კიდევ ერთი წლით. შარშან შოტლანდიელი ვესლი სნეიდერის შეძენას გეგმავდა, მაგრამ "ინტერისგან" უარი მიიღო. მერე ყურადღება ედენ აზარზე გადაიტანა, მაგრამ ბელგიელს "იუნაიტედზე" მეტად "ტოტენჰემის" ვარიანტი ხიბლავს.
"ტოტენჰემის" ხელმძღვანელობას ფეხბურთელის გაშვება არ სურს. მოდრიჩს მათთან ხელშეკრულება 2016 წლამდე აქვს, თუმცა ზოგადად ფეხბურთელის კეთილგანწყობის მოსაპოვებლად კლუბი მას ხელშეკრულების ერთი წლით გაგრძელებას სთავაზობს, ოღონდ გაზრდილი ანაზღაურებით - კვირაში ლუკას 100 ათას ფუნტს სთავაზობენ. მოდრიჩი "ტოტენჰემის" შეთავაზებაზე ჯერჯერობით უარსაა.
მოდრიჩისა და გაიტანის გარდა, "ოლდ ტრეფორდზე" მომავალ წელს შეიძლება კიდევ ერთი შუახაზელი გამოჩნდეს. ეს არის ბილბაოს "ატლეტიკის" 22 წლის წევრი ოსკარ დე მარკოსი. ინფორმაციას "დეილი მირორი" ავრცელებს. ალექს ფერგიუსონს ახალგაზრდა ბასკის დოსიე უკვე ხელთ აქვს. "ატლეტიკი" ნიჭიერ ფეხბურთელში 26 მილიონ ფუნტს (31,78 მილიონი ევრო) ითხოვს.
დაბოლოს, გიგზზე
დაბოლოს, ორიოდე სიტყვა რაიან გიგზზე ვთქვათ, ვისაც მისმა მეგობარმა გარი ნევილმა ამ დღეებში კიდევ ერთი ტირადა უძღვნა: "გიგზი ფეხბურთის ისტორიაში შევა, როგორც ყველაზე წარმატებული ბრიტანელი ფეხბურთელი. ვერ წარმომიდგენია, რომ ოდესმე ვინმემ მისი გადასწრება შეძლოს. ბოლოს და ბოლოს, ის ინგლისის მე-13 საჩემპიონო ტიტულთან ახლოს დგას.
როცა კარიერას ვიწყებდით, ხშირად გვესმოდა, რომ ალან ჰანსენს "ლივერპულთან" ერთად 8 ჩემპიონატი ჰქონდა მოგებული. ბუნებრივია, ეს უზარმაზარი მიღწევაა, მაგრამ ის, რასაც რაიანის შემთხვევაში ვხედავთ, კიდევ უფრო მეტია.
მისი რეკორდები - ეს ფანტასტიკაა. გიგზი 38 წლისაა, მაგრამ გუნდისთვის დღემდე უზარმაზარი დივიდენდები მოაქვს. რატომ უნდა იფიქროს კარიერის დასრულებაზე? ვფიქრობ, თუკი მოინდომებს, ის 42 წლისაც ასეთივე ეფექტური იქნება".
ყოველდღიური სპორტული გაზეთი "ლელო"
