არ გამართლდა რევანშისტთა მოლოდინი - "ოლდ ტრეფორდზე" სამაგალითო მარცხისთვის სერ ალექს ფერგიუსონის ბიჭებმა "სიტი ოფ მანჩესტერ სტედიუმზე" შური ვერ იძიეს. მეტიც, იქაც წააგეს და ტიტული, ფაქტობრივად, გადაულოცეს თანაქალაქელებს. მანჩესტერული დერბი კი ვერ გამოდგა კარგი სანახავი. ამაში თავიდან ბოლომდე "იუნაიტედია" დამნაშავე.
სტუმრებმა ჯო ჰარტის კარში ერთხელაც ვერ დაარტყეს ზუსტად და, აბა, რა შედეგს ელოდნენ? ვერც "სიტი" ბრწყინავდა, მაგრამ ვენსან კომპანის თავური 3 ქულას ეყო. რობერტო მანჩინის გუნდი ქულებით გაუტოლდა კონკურენტს, ხოლო ბურთების უკეთესი სხვაობის წყალობით (+61 "იუნაიტედი" +53-ის წინააღმდეგ) გალიდერდა.
გამარჯვების
წინა სამ თამაშში "სიტიმ" 12 გოლი გაიტანა და მანჩინი გამარჯვებულ შემადგენლობას რატომ გამოცვლიდა? ამიტომაც სერხიო აგუეროს თავდასხმაში კარლოს ტევესი შეუწყვილდა და არგენტინელმაც ყოფილ გუნდს შეუტია. მათ დავიდ სილვა და სამირ ნასრი ეხმარებოდნენ.
სერ ალექს ფერგიუსონის გუნდში მოულოდნელად ვერ ვიხილეთ ანტონიო ვალენსია. შუახაზში პარკ ჯი-სუნმა და რაიან გიგზმა ითამაშეს. წინ ეული ფორვარდი უეინ რუნი იყო. ტრავმირებული ჯონი ევანსი დაცვის ცენტრში კრის სმოლინგმა შეცვალა.
ყველაზე სახიფათო, რაც "იუნაიტედმა" შექმნა, მაიკლ კერიკის დარტყმა იყო, რომელსაც კომპანი გადაეღობა, სტუმართა ფეხბურთელების აზრით - ხელით, მაგრამ რეფერი ანდრე მარინერმა არ ჩასტვინა. პირველი ტაიმის განმავლობაში "სიტი" უკეთ ფლობდა ბურთს, მაგრამ ამას ხეირი არ მოჰქონდა... ბოლო წუთამდე.
მეორე ტაიმში თუკი რამ დაგვამახსოვრდა, ეს ფეგიუსონისა და მანჩინის ხმამაღალი შეკამათება იყო. როგორც შემდეგ შოტლანდიელმა აღნიშნა, იტალიელი მუდამ თავს ესხმოდა მსაჯებს. მან კი ამის აღკვეთა სცადა, რადგან "სიტის" სასაყვედურო მსაჯების მიმართ არ უნდა ჰქონოდაო. და მაინც, "სიტის" უფრო შეეძლო გატანა - გაელ კლიშის დავიდ დე ხეამ აჯობა და ვერც ნასრიმ ივარგა.
რობერტო მანჩინი (სიტი): "ვფიქრობ, ჩვენ დავიმსახურეთ ეს გამარჯვება. მეტოქეს გოლის გატანის შანსიც კი არ ჰქონია. ჩვენ კი კარგად ვითამაშეთ, თუმცა გაგვიჭირდა, რადგან მეტოქე უმაღლესი კლასისაა.
გოლი ძალიან დროულად გავიტანეთ. ახლა ძალიან გახარებულები ვართ, მაგრამ ჯერ კიდევ წინაა ტიტულისთვის ბრძოლა - კვირას კიდევ ერთი რთული მატჩი გველის "ნიუკასლთან", მაშინ, როცა "იუნაიტედს" იოლი გასეირნება აქვს "სუონსისთან" შეხვედრაში. ამიტომ მიმაჩნია, რომ ტიტულისთვის ბრძოლაში მეტოქე მაინც ოდნავ წინაა".
ალექს ფერგიუსონი (იუნაიტედი): "ახლა ყველაფერი "სიტის" ხელშია. მას მხოლოდ ორი დარჩენილი მატჩის მოგება მართებს, მაგრამ ჯერ ყველა იმედი არ გადაგვიწურავს. არადა, ერთნაირი ქულები გვაქვს და მეტოქე მხოლოდ ბურთების უკეთესი შეფარდებით გვჯობნის, -8-ის გამოსწორება ბოლო 2 ტურში შეუძლებელია.
თამაში ზუსტად ისეთი გამოდგა, როგორსაც ველოდი. საგოლე შანსები არც მახსენდება. ვფიქრობ, დე ხეამ მატჩის ერთადერთი სეივი გააკეთა. ჩვენი ბრალია ყველაფერი, სტანდარტული მდგომარეობის დროს მოდუნება ასეთ დონეზე როგორ შეიძლება".
"სიტის" დარჩენილი მატჩები
6 მაისი
ნიუკასლი-სიტი
13 მაისი
სიტი-ქპრ
"იუნაიტედის" დარჩენილი მატჩები
6 მაისი
იუნაიტედი-სუონსი
13 მაისი
სანდერლენდი-იუნაიტედი
ყოველდღიური სპორტული გაზეთი "ლელო"
