"ეჭვი არ მეპარება, რომ თუ სტივი კვლავაც წარმატებული მწვრთნელი იქნება, მის კანდიდატურას ინგლისის ნაკრების მწვრთნელის პოსტზე აუცილებლად განვიხილავთ. მოდი,
ახლა, მოდი, დავაზუსტოთ რომელ წარმატებებზე ლაპარაკობს ტრევორ ბრუკინგი: მაკლარენი ინგლისის ნაკრების მწვრთნელის თანამდებობიდან 2007 წლის შემოდგომაზე გაუშვეს, მაგრამ ამ განთავისუფლების მერე მისი კარიერა დაღმა სულაც არ წასულა. სპეციალისტი, რომელიც დღეს 49 წლისაა, ჰოლანდიაში წავიდა, სადაც "ტვენტეს" ქვეყნის ჩემპიიონის ტიტული მოაგებინა, ხუთი თვის წინ კი ბუნდესლიგაში გადაბარგდა და "ვოლფსბურგს" ჩაუდგა სათავეში.
ინგლისის ნაკრების მომდევნო მწვრთნელის თანამდებობაზე კიდევ განიხილავენ როი ჰოჯსონის, ჰარი რედნაპის და სემ ელერდაისის კანდიდატურებს. დღეს რომელ მათგანს ენიჭება უპირატესობა? ტაბლოიდებს ეჭვი გაუჩნდათ, რომ მაკლარენს. მიზეზი: ის ევროპაში აღწევს წარმატებას, რაც იმას ნიშნავს, რომ მისი კვალიფიკაცია დღეს გაცილებით მაღალია, ვიდრე 2006-ში, როდესაც ის სვენ-გორან ერიქსონის მაგივრად დანიშნეს.
ბრუკინგმა დასძინა: "თუ კაცი წარმატებულია, მაშინ მას თანამდებობაზე დანიშვნა ეკუთვნის. ვფიქრობ, სტივი თავად გრძნობდა, რომ ცოტა მეტი გამოცდილება სჭირდებოდა. სწორედ ამიტომ ამჯობინა საზღვარგარეთ წასვლა და როგორც ხედავთ სწორი ნაბიჯიც გადადგა. ერთი რამ დაბეჯითებით შეგვიძლია გითხრათ: ჩვენ კაპელოს შემდეგ ინგლისელი მწვრთნელი გვჭირდება".
ცნობისათვის: სტივ მაკლარენს ინგლისის ნაკრების ისტორიაში მწვრთნელთა შორის ყველაზე ცუდი შედეგი აქვს: 18 შეხვედრიდან 5 წააგო. სხვა სიტყვებით მაკლარენი შეხვედრათა 28 პროცენტიდან დამარცხებული გამოვიდა.
