"მანჩესტერ იუნაიტედის" ყოფილი კაპიტანი, 39 წლის გარი ნევილი აქტიური საფეხბურთო კარიერის დასრულების შემდეგ მშობლიური სამყაროსგან შორს არ გამდგარა. მან Daily Mail-ში საკუთარი სვეტის წერა დაიწყო საფეხბურთო თემატიკაზე. 2012 წლიდან ის ინგლისის ნაკრების სამწვრთნელო შტაბში შევიდა, თუმცა კალამი ხელიდან მაინც არ გაუგდია. გარი ყოველთვის ითვლებოდა ინტელექტუალ პიროვნებად. შესაბამისად, მისმა ნაწერებმა პოპულარობა მალევე მოიხვეჭა.
უკანასკნელი აქტუალური თემა, რომელიც გაზეთების პირველი გვერდებიდან არ ჩამოდის, "მანჩესტერ იუნაიტედის" მეკარე დავიდ დე ხეა და მისი არადამაჯერებელი თამაშია. 22 წლის გოლკიპერი კვირას, "ტოტენჰემთან" შეხვედრის უკანასკნელ წუთზე კიდევ
"მას, უბრალოდ, არ ჰქონდა უფლება, მსგავსი შეცდომა დაეშვა. ამ ეპიზოდის გამო "იუნაიტედმა" ქულები დაკარგა. დავიდს ბურთი ან საჯარიმოს გარეთ უნდა გაეტანა, ან კიდევ ხელში აეღო. ჩვენ ვლაპარაკობთ იმ გუნდის კარის დარაჯზე, ვისაც პრემიერლიგის ჩემპიონობის პრეტენზია აქვს. დარწმუნებული ვარ, რომ მან უკვე გააანალიზა თავისი შეცდომა.
დე ხეას ჯერ კიდევ დიდი შრომა მართებს იმისთვის, რომ პიტერ შმაიხელისა და ედვინ ვან დერ სარის დონეს მიუახლოვდეს. მინდა ვუპასუხო მათ, ვინც ფიქრობს, რომ ესპანელს, უბრალოდ, არ გაუმართლა. მეკარის საქმეში იოლი საერთოდ არაფერია. რატომ ვლაპარაკობთ გამართლებაზე?
"ოლდ ტრეფორდზე" 20 წელი გავატარე და ერთხელაც არავისგან მომისმენია ამით თავის მართლება. მსოფლიოს საკლუბო ჩემპიონატზე "ვასკო და გამასთან" ჩემს თამაშს კარგს დავარქმევდი, რომ არა ის 20 წამი, როცა "არ გამიმართლა" (ნევილის ორ შეცდომას "იუნაიტედის" კარში ამდენივე გოლი მოჰყვა. რედ). მიაქციეთ ყურადღება, დემპსის გოლის შემდეგ როგორ უყურებდნენ თანაგუნდელს დენი უელბეკი და ნემანია ვიდიჩი? მიუხედავად ამისა, დე ხეას მაინც კარგ მეკარედ მივიჩნევ. ის ჯერ კიდევ ძალიან ახალგაზრდაა და პროგრესისთვის წინ დიდი დრო აქვს".
კრიტიკოსების გარდა, დე ხეას დამცველებიც გამოუჩნდნენ, მათ შორის "იუნაიტედის" ყოფილი ფეხბურთელები. მაგალითად - მაიკლ ოუენი და როი კეროლი. უკანასკნელმა ყველაზე უკეთ იცის, თუ რას ნიშნავს "ოლდ ტრეფორდის" რისხვის დამსახურება.
ის 2001/05 წლებში თამაშობდა "ეშმაკების" რიგებში. მართალია, ძირითად მეკარედ არასოდეს ითვლებოდა, მაგრამ როცა თამაშობდა, მაშინაც ახერხებდა ისეთი შეცდომების დაშვებას, რომლებსაც მერე ფანები დიდხანს ვერ პატიობდნენ. აი, რას ამბობს ის:
"ხანდახან დე ხეა გულწრფელად მეცოდება, რადგან ის "იუნაიტედში" ვიღაცების მხრიდან სათანადო მხარდაჭერას მოკლებულია. ნამდვილად არ ვგულისხმობ ფერგიუსონს. დავიდი კარგი მეკარეა. მას დამატებით სირთულეს ის უქმნის, რომ სეზონის განმავლობაში მცველები ხშირად ტრავმიანობენ".
დე ხეას გამხნევება სცადა ოუენმაც: "ტოტენჰემთან" "იუნაიტედის" ყველა ფეხბურთელი ცდებოდა, მათ შორის - დავიდიც, მაგრამ მასზე მხოლოდ იმიტომ ლაპარაკობენ ამდენს, რომ მეკარის ჩავარდნა ყველაზე მეტად ჩანს".
ყოველდღიური სპორტული გაზეთი "ლელო"
ასევე იხილეთ:
სერ ალექს ფერგიუსონი "ბარსას": გავცვალოთ მეკარეები!
დავიდ დე ხეა: იმედი, რომელიც გაქრა
