"ვფიქრობ, ყველაფერში დამნაშავე ის დიდი მოლოდინია, რომელიც ხალხს ჰქონდა" - თქვა სერ ალექსმა, რომელიც, სხვათა შორის, მუნდიალის დღეებშიც აქტიურობდა. ცნობილია, რომ
"ძალიან ბევრს ლაპარაკობდნენ, რომ ის ტურნირის საუკეთესო ფეხბურთელი უნდა გამხდარიყო და სწორედ ეს იყო უმთავრესი. დიახ, გადამწყვეტი წინაისტორია გახლდათ. არ დაგავიწყდეთ, რომ ის გააცილეს, როგორც კაცი, რომელსაც მთელი მსოფლიო უნდა გადაეჩრდილა. არადა, რუნის მსოფლიოს ჩემპიონატზე გამოსვლის დიდი გამოცდილება ნამდვილად არ აქვს. დაიცადეთ ოთხი წელიწადი და ნახავთ, რომ შემდეგ ჩემპიონატზე თქვენს წინაშე სულ სხვა ფეხბურთელი წარსდგება".
კიდევ, "იუნაიტედის" შოტლანდიელმა თავკაცმა ბრძანა, რომ ფსიქოლოგიურმა ტვირთმა მარტო რუნი კი არა, მთელი ინგლისის ნაკრები წააქცია. მისი აზრით, გუნდზე უარყოფითად იმანაც იმოქმედა, რომ შესარჩევი ტურნირი გამოდგა ფრიად იოლი. ფერგიუსონმა თქვა:
"მართალი გითხრათ, ინგლისის ნაკრებმა ძალიან გამიცრუა იმედი. არადა, ბევრს ველოდით. სწორედ ეს მოლოდინი დააწვათ ფეხბურთელებს მხრებზე მძიმე ტვირთად. თან, თავისი უარყოფითი როლი შესარჩევი ჯგუფიდან იოლმა გასვლამაც ითამაშა. ბოლოს და ბოლოს ინგლისის ნაკრები მსოფლიოს ჩემპიონატზე ხომ იმ ჯგუფიდან მოხვდა, საიდანაც ვერმოხვედრა გაცილებით ძნელი იქნებოდა. ვინ იცის, შესარჩევ ეტაპზე უფრო ძლიერი მეტოქეები რომ შეხვედროდა, ინგლისისთვის უკეთესი ყოფილიყო. ასეთ შემთხვევაში გუნდს ფავორიტის სახელის რეალურ ბრძოლაში მოპოვება დასჭირდებოდა და ეს სულ სხვანაირად მოატრიალებდა მთელ სიტუაციას".
ფერგიუსონი, რომელიც მსოფლიოს ჩემპიონატზე შოტლანდიის ნაკრების მწვრთნელის რანგში 1986 წელს გახლავთ ნამყოფი, ფაბიო კაპელოს მკაცრ რეჟიმსაც შეეხო. "ჩვენ მაშინ, ჩემპიონატის წინ სანტა ფეში დავბანაკდით და ვცდილობდით რაც შეიძლება მსუბუქად დაგვეტვირთა მოთამაშეები. გარდა ამისა, ვაკონტროლებდით, რომ ეს დრო ფეხბურთელებს უქმად არ გაეფლანგათ".
ფერგიუსონი კაპელოს სრულად დაეთანხმა იმაში, რომ გერმანელებს საახლაწლო არდადეგების გამო აქვთ ასეთი ენერგია შემორჩენილი - შეგახსენებთ, რომ ინგლისის 4:1 ძლევის შემდეგ გერმანელები არგენტინელებს შეხვდნენ და 4:0 მოუგეს. შეგახსენებთ იმასაც, რომ "მანჩესტერ იუნაიტედიც" ჩემპიონთა ლიგის მეოთხედფინალიდან გერმანულმა გუნდმა მიუნხენის "ბაიერნმა" გააგდო. ფერგიუსონმა ბრძანა:
"გერმანელებს სანაქებო ტრადიციები აქვთ. მათ თავად ჩამოაყალიბეს ის მენტალიტეტი, რომლის წყალობითაც დღეს ასე კარგად გამოდიან. ინგლისის ნაკრებს მსოფლიოს ჩემპიონატის ნახევარფინალში გამოსვლის გამოცდილება არ აქვს, გერმანელები კი მენტალურად ყოველთვის ნახევარფინალში არიან. ამას დაამატეთ ის ფაქტი, რომ ბუნდესლიგა იანვარში მთელი თვით ისვენებს. ინგლისური გუნდები სეზონის განმავლობაში განუწყვეტლად თამაშობენ და ეს მათ ფეხბურთელებს საშინლად ღლის".
