ეს რა ზნე სჭირთ ინგლისელებს, გაგიჟდება კაცი. დაკვირვებიხართ, რა ამბავი ატყდება ხოლმე ამ ქვეყნის პრესაში მსოფლიოს ყოველი ჩემპიონატის წინ? მაინცდამაინც მაშინ უნდა ამოხეთქოს სკანდალმა: ვიღაც ცოლს ღალატობს, ვიღაც თანაგუნდელის ცოლის საყვარელია, ვიღაცის მამამ კოკაინი გაყიდა... გერმანიაში, 2006 წელს, განებივრებული ცოლების და საყვარლების პრობლემა დადგა - ქალები მოთამაშეებს რესტორნებში დაათრევდნენ და ბურთაობის საშუალებას არ აძლევდნენ.
დაახლოებით ასეთი რამ მოხდა ახლაც, როდესაც ციურიხში ფიფამ 2018 წლის მსოფლიოს ჩემპიონატის მასპინძელი ქვეყანა უნდა დაასახელოს - „მთელი ინგლისი“ სთხოვდა BBC-ს შეფებს გადაცემა „პანორამა“ მექრთამე საფეხბურთო
მკითხველებმა „პანორამაში“ მოყოლილი ამბავი უკვე იციან და ამიტომ, მასზე დაწვრილებით აღარ შევჩერდებით. რაც შეეხება ინგლისის დელეგაციას, ის ჯერ კიდევ არ იტეხს იხტიბარს და ამბობს, რომ გამარჯვების იმედი აქვს. შეგახსენებთ: 2018 წლის მუნდიალის მასპინძლობა ინგლისის გარდა რუსეთს და ესპანეთ-პორტუგალიის წყვილს სურს. ინგლისელები 30 კაციანი დელეგაციით უკვე ციურიხში არიან. დელეგაციას დიდი ბრიტანეთის პრემიერ მინისტრი დევიდ კემერონი, პრინცი უილიამი და დევიდ ბექჰემი ხელმძღვანელობენ. მათ ხუთშაბათ შუადღემდე მიეცათ ფიფას 23 დელეგატთან შეხვედრისა და მათი გადაბირების ბოლო შანსი. ეს 23 კაცი ხმის უფლებითაა და მათ შორის არიან BBC-ს მიერ ნალანძღი ჰაიატუ და უორნერიც.
რასაკვირველია, დელეგატებთან შეხვედრებს სხვა ქვეყნებისა და პროქტების წარმომადგენლებიც გამართავენ - ინგლისელთა ზემოთ დასახელებული კონკურენტების გარდა თავისას 2022 წლის მსოფლიოს ჩემპიონატისთვის მებრძოლი ხუთი დელეგაციაც ცდის. საინტერესოა, მოახერხებენ ინგლისის მოქმედი პრემიერი, მომავალი მეფე და ყოფილი კაპიტანი შეურაცხყოფილი ჩინოსნების და მათი კოლეგების დარწმუნებას? მათ 23-დან 12 ხმა სჭირდებათ.
წესი ასეა: თუ პირველ ეტაპზე 12 ხმას ვერც ერთი პროექტი ვერ მიიღებს, ის, რომელსაც ყველაზე ცოტა ერგო, ბრძოლას გამოეთიშება და გაიმართება მეორე ეტაპი... ასე გაგრძელდება მანამ, სანამ რომელიმე 12 ქულას არ დააგროვებს.
გარდა პირადი შეხვედრებისა, ხუთშაბათ დილას, 10 საათზე, ინგლისის დელეგაციას ნახევარ საათიანი პრეზენტაციის საშუალებაც მიეცემა. ინგლისელების მერე რუსები გამოვლენ. საბოლოო გადაწყვეტილება შუადღისას გახდება ცნობილი.
