ინგლისმა წააგო - 2018 წლის მსოფლიოს ჩემპიონატი რუსეთში ჩატარდება, თუმცა ბრიტანული გაზეთები მარცხს ვერ ეგუებიან. ისინი ფიფას იმ შვიდი ბობოლას ვინაობას ასახელებენ, რომელთაც ფეხბურთის სამშობლოს ხმები აღუთქვეს და მოატყუეს.
რასაკვირველია, ტყუილი ტყუილია, მაგრამ სადღაც, იმასაც ხომ აქვს მნიშვნელობა, ვის უბედავ? როდესაც დიდი ბრიტანეთის პრემიერ-მინისტრ დევიდ ქემერონსა და პრინც ჰარის ატყუებ, მეტად თავისებური ზნისა და ზურგის მქონე ადამიანი უნდა იყო. თან, ურცხვობის ხარისხი არ მოგწონთ? ქოსატყუილებმა ინგლისის დელეგაციის შეფებს კენჭისყრამდე ორიოდ საათით ადრე უთხრეს, არაფერზე იდარდოთ, ჩვენი ხმები ჯიბეში გეგულებოდეთო, შემდეგ
პრესა წერს, რომ კენჭისყრის დღეს, ხუთშაბათს დილით, ფიფას აღმასკომის წევრები რუსეთის დელეგაციას შეხვდნენ და, როგორც ჩანს, სწორედ ამ შეხვედრას ჰქონდა გადამწყვეტი მნიშვნელობა, რადგან, შუადღისას ჩატარებულ კენჭისყრაზე გაირკვა, რომ 22 ხმიდან ინგლისელებმა მხოლოდ ორი მიიღეს.
აქ, თქვენი ნებართვით ინგლისურ გაზეთებს ერთი წუთით დავხურავთ და რუსულ ინტერნეტ-საიტებს ჩავხედავთ, სადაც წლების განმავლობაში საბჭოთა კავშირისა და შემდგომ რუსეთის ფეხბურთის ფედერაციის პრეზიდენტი ვიაჩესლავ კოლოსკოვი თავისი ქვეყნის პრემიერს ვლადიმირ პუტინს აქებს - კამპანიის მსვლელობისას ფიფას შეფებს რამდენჯერმე საიდუმლოდ შეხვდაო.
„ჩვენ ამას ვმალავდით, ახლა კი შეგვიძლია ხმამაღლაც ვთქვათ“ - თქვა კოლოსკოვმა და დასძინა, რომ პუტინი მთელი ამ ხნის განმავლობაში 2018 წლის ამბავს ყოველდღიურად კითხულობდა. კოლოსკოვი ამბობს, რომ რუსები სხვებზე უკეთ მიხვდნენ ფიფას პოლიტიკას - მსოფლიოს ჩემპიონატები მუდმივად ხუთ განვითარებულ ქვეყანაში რომ არ უნდა ტარდებოდეს – და განაცხადი კარგ დროს შეიტანეს. თუმცა, განსაკუთრებული მნიშვნელობა შემდგომ მუშაობასა და პუტინის ჩარევას ჰქონდაო, ამბობს საბჭოთა ფეხბურთის ყოფილი ხელმძღვანელი.
თუმცა, ინგლისს დავუბრუნდეთ, სადაც ფეხბურთის ასოციაციის თავმჯდომარე როჯერ ბარდენი თანამდებობიდან გადადგა – ამ ფიფას ვაჭრუკანებთან ურთიერთობა აღარ შემიძლიაო. „ხალხთან, რომელსაც არ ვენდობი, ურთიერთობა ვერ მექნება“, - თქვა მან.
და ვინ იყო ის ორი ადამიანი, რომელმაც ტყუილი არ იკადრა და ინგლისელებს ხმა მისცა? ერთი, რასაკვირველია, თავად ინგლისის წარმომადგენელი ჯეფ ტომპსონი გახლდათ, მეორე კი ან იაპონელი ჯუჯი ოგურა ან კამერუნელი ისა ჰაიატუ. სხვათა შორის, ინგლისში ძალიან გაუკვირდათ თურქი შენეშ ერზიკის საქციელი, რადგან, ის ტომპსონის მეგობარია, რაც, როგორც ჩანს, საქმითაც მრავალჯერ დამტკიცებულა, მაგრამ როდესაც კენჭისყრის შემდეგ მეგობარს თვალი თვალში გაუყარეს, პასუხად მიიღეს ფრაზა, რომელიც ასე ხშირად ისმის ფილმებში მაფიის შესახებ: "პირადი არაფერია, ეს მხოლოდ ბიზნესი იყო".
ამ ისტორიაზე ლაპარაკისას BBC-ის გადაცემა „პანორამას“ და მასთან დაკავშირებულ სკანდალს გვერდს ვერაფრით ავუქცევთ. ჩვენს მკითხველს ამ ამბის დაწვრილებით შეხსენება ნამდვილად არ სჭირდება და ამიტომ მოკლედ ვიტყვით, რომ ხსენებულ კენჭისყრამდე რამდენიმე დღით ადრე „პანორამამ“ გადასცა ჟურნალისტური გამოძიება, სადაც ამტკიცებდნენ, რომ ფიფას დიდმოხელეებმა, მათ შორის კი ხსენებულმა ჰაიატუმ და უორნერმა ქრთამი აიღეს. ჯამში, ლაპარაკი იყო 66 მილიონ ფუნტზე. თურმე, ციურიხში ინგლისელებისთვის ბევრს უთქვამს, საკუთარმა პრესამ დაგღუპათო, მაგრამ ინგლისური განაცხადის ხელმძღვანელი ენდი ენსონი ამბობს:
„ამის ერთი წუთითაც არ მჯერა. „პანორამის“ ამბავი მხოლოდდამხოლოდ მოხერხებული მიზეზია თავის გასამართლებლად, სინამდვილეში კი ამ ხალხმა რუსეთს ხმა სულ სხვა მიზეზით მისცა“.
უნდა ითქვას, რომ, ფიფას პრეზიდენტმა ზეპ ბლატერმა პირადად უთხრა დევიდ ქემერონს, რომ ტელეგადაცემა კენჭისყრასთან არაფერ შუაშია და ერთი მეორეზე გავლენას ვერაფრით იქონიებდა.
და კიდევ ერთი სასეირო ამბავი: ფიფას ყოფილმა დიდმოხელემ, 40 წლის ამერიკელმა მელ ბრინენმა თავის ზოგიერთ ყოფილ ყოფილ კოლეგას „მექრთამე ტარაკანი“ უწოდა, ხოლო 2018 წლის მსოფლიოს ჩემპიონატის რუსეთვის მიცემას საეჭვო უწოდა. უნივერსიტეტის ყოფილმა პროფესორმა „სანს“ უთხრა:
„დროა ბრიტანეთის, ესპანეთის, აშშ-ის, პორტუგალიის, ჰოლანდიის და სამხრეთ ამერიკული ქვეყნების ლიდერებმა გამოაცხადონ, რომ ფეხბურთი ძალიან მასშტაბური და კულტურული თვალსაზრისით მნიშვნელოვანი მოვლენაა, რომელსაც ნაბიჭვარივით არ უნდა მოვეპყრათ, როგორც ამას ფიფას აღმასკომი აკეთებს. ჩემი გამოცდილებიდან შემიძლია გითხრათ, რომ ფიფას ბობოლებს ყველაზე მეტად მსოფლიოს გამოღვიძების ეშინიათ. სპორტის ბევრმა სახეობამ უკვე გააკეთა ის, რაც ჩვენც უნდა გავაკეთოთ - დაიშალა და თავიდან აღდგა. ამას ძლიერი ნება სჭირდება. ფიფაში მარტო ბლატერები კი არ მუშაობენ. თუ შევუტევთ, ეს ტარაკნები გაიქცევიან“.
