ლონდონში დიდი დავაა: ვინ გახდება ახალაგებული ოლიმპიური სტადიონის მეპატრონე 2012 წლის ზაფხულის თამაშების შემდეგ, „ტოტენჰემ ჰოთსპური“ თუ „ვესტ ჰემი“? ამ ორი კლუბის დავაში ლორდმა სებასტიან კოემ „ვესტ ჰემს“ დაუჭირა მხარი.
შეგახსენებთ: ლორდი სებასტიან კოე გახლავთ 1500 მეტრზე რბენაში 1980 და 1986 წლების ოლიმპიური ჩემპიონი. სპორტიდან წასვლის შემდეგ ის კონსერვატორთა პარტიის სახელით ბრიტანეთის პარლამენტში მოღვაწეობდა, ბოლოხანს კი ჯერ ლონდონის 2012 წლის ოლიმპიადის პროექტის ხელმძღვანელი იყო, ხოლო მასპინძლობის დამტკიცების შემდეგ, საორგანიზაციო კომიტეტის თავმჯდომარეა. ის, რომ საერთაშორისო ოლიმპიურმა კომიტეტმა 2012 წლის თამაშები სწორედ
სწორედ აქ არის ჩადებული ის, რის გამოც კოემ „ვესტ ჰემს“ დაუჭირა მხარი. „ჩაქუჩები“ სტადიონზე ყველაფრის ხელუხლებლად დატოვებას აპირებენ, „ტოტენჰემი“ კი თითქოს, 500 მილიონ ფუნტად აგებული სარბიელის, ნაგებობის საფეხბურთო სტადიონად გადაკეთებას ლამობს.
„პირობები ძალიან მკაფიოა - ამბობს ორგზის ოლიმპიური ჩემპიონი - ამ სტადიონის იდეაში დევს ის, რომ მას ექნება საზოგადოებრივი და მულტისპორტული დატვირთვა. რა დამავიწყებს იმ დღეს, როდესაც სინგაპურში გავიმარჯვეთ და მასპინძლობის უფლება მოვიპოვეთ. მაშინ დავარწმუნეთ მსოფლიო სპორტის ხელმძღვანელები, რომ ახალ სტადიონს, ოლიმპიადის შემდეგ, სხვადასხვა სახეობით გატაცებული ახალგაზრდები უპატრონებენ. მზად ვარ ჩემი სიტყვები ახლაც გავიმეორო. მე ჰაერში ლაპარაკი არ მჩვევია და არ მინდა ოლიმპიადის დამთავრების მერე ვინმემ სტადიონის არასაფეხბურთო სექტორს ბულდოზერით გადაუაროს, რათა იქ მხოლოდ პრემირლიგისთვის დარჩეს ადგილი.
მინდა საკითხს ყველა სრული სერიოზულებით მიუდგეს და გაიგოს, რომ იქ, სინგაპურში, ჩვენს სიტყვებს ენდნენ. იმ ხალხის მოტყუება დაუშვებელია. ბრიტანეთის რეპუტაციის შელახვა არაფრით შეიძლება. გარდა ამისა, ვერ წარმომიდგენია, ათწლეულების შემდეგ როგორ მიიყვანენ პაპები შვილიშვილებს სტადიონზე პრემიერლიგის თამაშის სანახავად და როგორ ეტყვიან, რომ აქ, სადღაც... დაახლოებით ამ ადგილას ან შეიძლება ცოტა იქით... 2012 წლის ოლიმპიადაზე, მსოფლიოს სპორტის ისტორიის უმნიშვნელოვანესი ამბავი მოხდა“.
ორი ლონდონური კლუბის ჭიდილში „ტოტენჰემს“ ფინანსური თვალსაზრისით უფრო ღონიერი წინადადება აქვს. „დეზების“ თავმჯდომარე დენიელ ლივი სპორტულ საზოგადოებას ასე მიმართავს: „ ბოლო დროს ძალიან ბევრი ემოციური სიტყვა ითქვა, მაგრამ ემოცია გადავდოთ და საქმიანად ვიმსჯელოთ. მოდი დავფიქრდეთ, რა აჯობებს მძლეოსნობისთვის, ის რომ მუდმივმოქმედი სტადიონი ჰქონდეს, თუ ის, რომ წელიწადში 20 დღის განმავლობაში შეუშვან ოლიმპიურ სტადიონზე? ჩვენი წინადადება ასეთია: ავაშენოთ მძლეოსნებისთვის 25 ათასიანი სტადიონი. გადავხუროთ იგი და თან ტევადობის 40 ათასამდე გაზრდის პერსპექტივაც დავუტოვოთ“.
„ვესტ ჰემის“ ვიცე-თავმჯდომარემ კარენ ბრეიდიმ განაცხადა, რომ 60 ათასიან სტადიონზე გადასვლის შემთხვევაში მის გუნდს ტრიბუნების შევსების პრობლემა არ გაუჩნდება. ცნობისათვის: დღეისათვის „ჩაქუჩების“ თამაშებზე საშუალოდ 30-32 ათასი ადამიანი დადის.
„ჩვენს თამაშებზე დასწრების მსურველი სინამდვილეში გაცილებით მეტია, მაგრამ „აპტონ პარკის“ ტევადობის გამო შეზღუდულები ვართ“ - თქვა ქალბატონმა ბრეიდიმ.
