„ლივერპული“ მეშვიდე ადგილზეა! მიმდინარე სეზონში, მერსისაიდული გუნდი ასე პირველად დაწინაურდა, მაგრამ მწვრთნელი, „კოპის მეფე კენი“ ანუ იგივე კენი დალგლიში მეშვიდე ადგილსა და მეცხრე ცას ერთმანეთში არ ურევს და ამბობს, რომ ამით ვერ დაკმაყოფილდება...
„ლივერპულისა“ და „ფულჰემის“ გადადებული შეხვედრა ლონდონელი ჯონ პენტსილის მიერ 52-ე წუთზე საკუთარ კარში გატანილმა გოლმა მასპინძლების სასარგებლოდ დაასრულა. აღსანიშნავია, რომ ამ გოლამდე შეხვედრის მთავარი ამბავი მე-6 წუთზე მოხდა, როდესაც რაულ მეირელეშმა ფერნანდო ტორესს პასი გაუჭრა
„წითლების“ საბედნიეროდ, მათ მაინც მოიგეს და მსაჯის შეცდომის გამო ვიშვიში არ დასჭირდათ - ნოემბრის შემდეგ „ლივერპულმა“ პირველად გაიმარჯვა ზედიზედ ორ შეხვედრაში. ბუნებრივია, გუნდისთვის, რომელიც გასავარდნთა ზონაში ტრიალებდა, მეშვიდე ადგილზე აღზევება წარმატებაა, მაგრამ დალგლიში, როგორც ზემოთ მოგახსენეთ, ამით დაკმაყოფილებას არ აპირებს და დიდ სიხარულსაც არ გამოხატავს:
„ვფიქრობ, ჩვენ მეტი შეგვიძლია. რასაკვირველია, მეშვიდე ადგილი გაცილებით ობიექტურად ასახავს „ლივერპულის“ ძალას, მაგრამ ეს ის პოზიცია არ არის, რომელზეც ჩვენი კლუბი ოცნებობს და რისთვისაც ის იბრძვის. ჩვენ ცხრილში კიდევ უფრო მაღლა გვინდა ყოფნა, მაგრამ ამისათვის მეტი თამაში უნდა მოვიგოთ. ახლა, მომდევნო ოთხშაბათს „სტოკთან“ გვაქვს სათამაშო და ამ შეხვედრაშიც გამარჯვებას ვაპირებთ.“
შემდეგ დალგლიშს შორს მიმავალ გეგმებზე ჰკითხეს. „ლივერპულის“ ლეგენდამ ასე უპასუხა:
„ამ წუთას არ ვთქვი „სტოკთან“ უნდა გავიმარჯვოთ-მეთქი? ჩვენ არასდროს გამოვალთ სეზონის დაწყებამდე საჯაროდ და არ დავიქადნით, რომ „ამას და იმას ვაპირებთ“. ჩვენი მიდგომა მარტივია: ყოველი დღისგან მაქსიმუმი უნდა გამოვწუროთ. ყოველთვის ასე იყო, სეზონის ბოლოს ქულებს დავაჯამებდით და ვხედავდით რა მოგვიტანა ჩვენმა მონდომებამ. ამ მიდგომის შეცვლას არ ვაპირებ. ეს პრინციპი არავის აზარალებს. მე ამ პრინციპზე ვარ აღზრდილი და სხვანაირად არ შემიძლია.“
რაც შეეხება „ფულჰემთან“ თამაშს, დალგლიშმა თქვა, რომ მისმა ბიჭებმა მოწადინებული ლონდონელების დასამარცხებლად ჩინებულად ითამაშეს.
„მგონი „ფულჰემის“ ფეხბურთელებს დარჩათ შთაბეჭდილება, რომ ჩვენთან შეხვედრაში მეტი ეკუთვნოდათ და იმედგაცრუებულნი წავიდნენ. ჩვენც უამრავჯერ გადაგვხდენია ასეთი რამ: გვეგონა, რომ მეტს ვიმსახურებდით, მაგრამ გაწბილებულები დავრჩით. დღეს ჩემმა ბიჭებმა დიდი თავდადება გამოავლინეს და დამსახურებულად გაიმარჯვეს. იღბალმაც დაგვიფასა შრომა. თავიდან, ფერნანდომ გოლი გაიტანა და ეს გოლი მსაჯს უნდა ჩაეთვალა, მაგრამ არ ჩათვალა, რის გამოც გული არ გაგვიტყდა. ჩვენ ბრძოლა გავაგრძელეთ და საწადელს მივაღწიეთ. ასეთ რაღაცებს ყურადღება არ უნდა მიაქციო: რას იზამ ასეთია ცხოვრება - ხან მსაჯს ეშლება, ხან ფეხბურთელს...“
.
