პრემიერლიგა. XX ტური: "არსენალი" უკვე ერთპიროვნული ლიდერია [VIDEO]

2 იანვარს ინგლისის პრემიერლიგის მე-20 ტურის 8 შეხვედრა გაიმართა.

პრემიერლიგაში 2016 წლის პირველი გოლი "ვესტ ჰემის" 25 წლის ფეხბურთელმა მაიკლ ანტონიომ გაიტანა, მან "ლივერპულს" გაუტანა, რასაც ენდი ქეროლის გოლიც მოყვა - 2:0.

იურგენ კლოპი (ლივერპული): ახლა მე გაცოფებული ვარ, "ლივერპულს" დღეს მეტის მიღწევა შეეძლო. მაგრამ წაგება დავიმსახურეთ. ჩვენ ბურთს ვაკონტროლებდით, მაგრამ საკმარისი მომენტები ვერ შევქმენით, არადა,შეგვეძლო. ეს არ იყო ჩვენი თამაში".


უეინ რუნის გოლმა "მანჩესტერ იუნაიტედს" 21 ნოემბრის მერე პირველი გამარჯვება მოუტანა, ლუი ვან გაალის გუნდმა "სუონსი" 2:1 დაამარცხა. მასპინძელთა პირველი გოლი ანტონი მარსიალის ანგარიშზეა.

ამ გოლით რუნი პრემიერლიგის ისტორიაში მეორე ბომბარდირი გახდა ალან შირერის მერე (260 გოლი). რუნიმ 188-ე გოლი გაიტანა და ერთით გაუსწრო ენდი კოულს. რუნი "მანჩესტერ იუნაიტედის" ისტორიაშიც მეორე გოლეადორი გახდა, მან ამ გუნდის შემადგენლობაში 238-ე გოლი გაიტანა და ახლა მხოლოდ ბობი ჩარლტონს (249) ჩამორჩება.

ლუი ვან გაალი (მანჩესტერი): "ძალიან სარისკო სისტემით ვითამაშეთ. "სუონსის" 4 ნახევარმცველის წინააღEმდეგ 3 მცველი დავაყენე. გუნდი კარგად მოქმედებდა და მომენტებს ქმნიდა, ორი გოლიც გავიტანეთ. ჩვენ ისევ ლიდერთა შორის ვართ. სეზონი კი 8 თვე გრძელდება და არა ერთი. იმედი მაქვს, რომ ეს მოგება გარდამტეხი იქნება "მანჩესტერ იუნაიტედისთვის".


პრემიერლიგის ერთპიროვნული ლიდერი კი "არსენალია", რომელმაც შინ 1:0 დაამარცხა "ნიუკასლი". გამარჯვების გოლი ლორან კოშელნის ანგარიშზეა.

არსენ ვენგერი (არსენალი): "ბიჭები გადაღლილები იყვნენ, მაგრამ ერთმანეთისთვის იბრძოდნენ. ოთხ თამაშში გუნდმა 9 ქულა აიღო, ანუ საქმის 75% ბრწყინვალედ შევასრულეთ".


"მეთოფეებმა" ისარგებლეს "ლესტერის" ფეხის დაცდენით, კლაუდიო რანიერის გუნდმა 10 კაცით დარჩენილ "ბორნმუთს" ვერ მოუგო, ხოლო რიად მაჰრეზმა პენალტი ვერ გაიტანა.

კლაუდიო რანიერი (ლესტერი): "ახლა "ლესტერს" 40 ქულა აქვს და ამოცანა შესრულებულია, ბიჭებმა შამპანური დაიმსახურეს. დღეს რთული მატჩი გვქონდა, ბურთი ძელს გავარტყით, პენალტი ვერ გავიტანეთ, რამდენიმე კარგი მომენტი გავანიავეთ".

"უოტფორდი" კოლაროვის ავტოგოლით უგებდა "მანჩესტერ სიტის", მაგრამ მატჩის მიწურულს იაია ტურემ შესანიშნავი დარტყმით გაათანაბრა, მალევე სერხიო აგუერომ გამარჯვების გოლი გაიტანა - 1:2.


ვესტ ჰემი-ლივერპული 2:0
გოლები: 1:0 ანტონიო (10), 2:0 ქეროლი (55)

სანდერლენდი-ასტონ ვილა 3:1
გოლები: 1:0 ვან აანჰოლტი (30), 1:1 ხილი (63), 2:1 დეფო (72), 3:1 დეფო (92)

ლესტერი-ბორნმუთი 0:0
გაძევება: ფრენსიზი (57. ბორნმუთი)
შენიშვნა: მაჰრეზმა (ლესტერი) ვერ გაიტანა პენალტი (59)

არსენალი-ნიუკასლი 1:0
გოლი: 1:0 კოშელნი (72)

ნორვიჩი-საუთჰემპტონი 1:0
გოლი: 1:0 ტეტეი (76)
გაძევება: ვანიამა (73. საუთჰემპტონი)

ვესტ ბრომვიჩი-სტოკი 2:1
გოლები: 1:0 სესინიონი (60), 1:1 უოლტერსი (81), 2:1 ევანსი (93)
გაძევება: კამერონი (83. სტოკი)

მანჩესტერი-სუონსი 2:1
გოლები: 1:0 მარსიალი (47), 1:1 სიგურდსონი (70), 2:1 რუნი (77)

უოტფორდი-სიტი 1:2
გოლები: 1:0 კოლაროვი (55. ს. კ.), 1:1 ი. ტურე (82), 1:2 აგუერო (85)

1. არსენალი - 42 ქულა; 2. ლესტერი - 40; 3. სიტი - 39; 4. ტოტენჰემი - 35; 5. მანჩესტერი - 33.