„ნიუკასლმა“ ენდი ქეროლის გაყიდვის შემდეგ პირველი თამაში მოიგო - როგორც ჩანს „კაჭკაჭები“ საუკეთესო თავდამსხმელის დაკარგვის ფაქტს შეეგუენ და გონება მოედნისკენ მიმართეს. ბირმინგემის „სენტ ენდრიუზე“ გოლები პიტერ ლოვენკრანდსმა და ლიონ ბესტმა გაიტანეს. ლოვენკრანდსმა ანგარიში თამაშის დაწყებისთანავე, მე-2 წუთზე გახსნა, ბესტმა კი მეორე ტაიმის დაწყებიდან ხუთ წუთში გაზარდა ანგარიში.
გამარჯვებულთა მწვრთნელმა ალან პერდიუმაც სწორედ იმას გაუსვა ხაზი, რომ ქეროლის გარეშე ცხოვრება და გამარჯვება შესაძლებელი ყოფილა.
„ვფიქრობ, დღეს აშკარად გამოჩნდა, რომ იმ ფეხბურთელებს, რომლებიც „ნიუკასლში“ დარჩნენ, ქეროლის გარეშეც შეუძლიათ გამარჯვება. განსაკუთრებით სასიამოვნო ის
ამ შეხვედრამდე „არსენალთან“ და „ბლექბერნთან“ ფრეები ვითამაშეთ, ასე რომ დრო იყო მოგვეგო. ძალიან მნიშვნელოვანი გახლდათ როგორ დავიწყებდით თამაშს. საბედნიეროდ, პირველივე წუთებში მეტოქეზე სწრაფად დავიწყეთ მოქმედება და ამან შედეგი მოგვიტანა. კარგი იყო, რომ სრიალა მინდორზე ბურთიც კარგად გავაგორეთ, ერთმანეთს ზუსტ პასებს ვაწვდიდით“.
დამარცხებული მასპინძლის, „ბირმინგემის“ მწვრთნელმა ალექს მაკლიშმა კი თქვა, რომ მის გუნდზე ბოლო პერიოდის გადატვირთულმა კალენდარმა იმოქმედა ცუდად. გარდა ამისა, მაკლიში შეწუხებული იყო, რომ მისმა ორმა მცველმა, მარტინ ჟირანეკმა და ლაიამ რიჯუელმა ტრავმები მიიღეს, თუმცა რამდენად სერიოზული, ამას ერთ-ორ დღეში ექიმები ეტყვიან:
„ბოლო ერთი თვე ფანტასტიკური გვქონდა. „ოლდ ტრეფორდზე“ „მანჩესტერ იუნაიტედთან“ 5:0 რომ დავმარცხდით მას მერე ხუთი თამაშიდან ოთხი მოვიგეთ და ერთი ფრედ დავასრულეთ. ამ შეხვედრებში აღმაფრენა გვეტყობოდა, მაგრამ დღეს ცოტა „ჩამქრალები“ ვჩანდით. ბევრი რამ იმან განაპირობა, რომ შეხვედრის დაწყებისთანავე გოლი გავუშვით. ვფიქრობ გადაღლამაც ითამაშა თავისი როლი. ფეხბურთელებისთვის საყვედურის თქმას არ ვაპირებ“.
