ჯონ ტერი "მანჩესტერ იუნაიტედის" შესამოწმებლად მზად არის და ამბობს, რომ "ჩელსის" ჩემპიონობისთვის ბრძოლის შანსი არ დაუკარგავს. მოკლედ ინგლისის ჩემპიონთა კაპიტანი ბედს და კონკურენტს არ ნებდება. არადა, თუ გახსოვთ, დაახლოებით ორი კვირის წინ თვით "ლურჯების" თავკაცმა, კარლო ანჩელოტიმ თქვა, რომ ამდენი წარუმატებლობის შემდეგ ტიტულისთვის ბრძოლა თითქმის შეუძლებელი გახდა. დღეს ლიდერ "იუნაიტედსა" და "ლურჯებს" შორის სხვაობა 12 ქულას აღწევს. ეს, რასაკვირველია, დიდი უპირატესობაა, მაგრამ "ჩელსის" ვარსკვლავი შემდეგ სამშაბათს ელის, როდესაც მანჩესტერელები "სტემფორდ ბრიჯზე" უნდა ჩავიდნენ სათამაშოდ. 30 წლის ცენტრალური მცველი ამბობს:"ჩემპიონობის
არ გეგონოთ, მომავალი სამშაბათის თამაშს რეკლამას ვუკეთებდე. "ჩელსისა" და "მანჩესტერ იუნაიტედის" დაპირისპირებას რეკლამა არ სჭირდება, ის ყოველთვის დიდი და დაძაბული გამოდის. მხოლოდ ერთს ვიტყვი, ჩვენთვის ის აუცილებლად მოსაგებთა კატეგორიას განეკუთვნება. დიახ, "მანჩესტერ იუნაიტედთან" შეხვედრაში ჩვენთვის ფრეც კი არაფერს ნიშნავს. ერთი სიტყვით, მოედანზე ყოველგვარი შიშის გარეშე და უდიდესი ჟინით უნდა გავიდეთ. მანჩესტერელებს დიდებული გუნდი ჰყავთ, მაგრამ არა მგონია, რომ ჩვენ მათი უნდა გვეშინოდეს. დაუმარცხებლები ნამდვილად არ არიან.
დღეს ჩვენი მდგომარეობა ძალიან ჰგავს შარშანდელს, როდესაც ტიტულისკენ გზაზე უშუალო კონკურენტებთან ბევრი თამაში გვქონდა დარჩენილი. ჩვენ "ლივერპულსაც" და "იუნაიტედსაც" სტუმრად ვეთამაშეთ და ორივეს მოვუგეთ. სწორედ იმ გამარჯვებებმა ითამაშეს გადამწყვეტი როლი ჩვენს მიერ დუბლის მოპოვებაში. ვფიქრობ, შარშანდელი გამოცდილება წლეულსაც ძალიან გამოგვადგება. ძალიან მნიშვნელოვანია იმის ცოდნა, რომ ჩვენ ეს ერთხელ უკვე გაგვიკეთებია".
ტერი იმედოვნებს, რომ შემდეგი სამშაბათის თამაში, რომელიც მთელს ევროპაში გადაიცემა, "ჩელსის" გაჭირვებას ბოლოს მოუღებს და გუნდს კვლავ გამარჯვებათა გზაზე დააყენებს. თან, ბოლო დღეებში, "ლურჯებისთვის" კარგი ამბები მიეწყო ერთმანეთს: თავად კოპენჰაგენში ჩემპიონთა ლიგის თამაში მოიგეს (2:0), პრემიერლიგის ოთხეულში მოხვედრის კონკურენტმა "ტოტენჰემ ჰოთსპურმა" კი მოულოდნელად "ბლექპულთან" 3:1 წააგო. შეგახსენებთ, რომ ინგლისის ჩემპიონი დღეისათვის ცხრილში მეხუთე პოზიციაზეა, "ტოტენჰემს" 2 ქულით ჩამორჩება, ხოლო "მანჩესტერ სიტის" ოთხით, მაგრამ ორივეზე ერთი თამაშით ნაკლებიც აქვს ნათამაშები. თან, დახედეთ დარჩენილი მატჩების განრიგს: "მანჩესტერ იუნაიტედთან" დასავლეთლონდონელებს ორივე შეხვედრა აქვთ დარჩენილი, "სფურზს" და "სიტის" კი "სტემფორდ ბრიჯზე" ელიან. ტერი განაგრძობს:
"ყველა გუნდი, რომელიც კი პრემიერლიგის ზედა ადგილებისთვის იბრძვის, შესაძლოა დაცურდეს. ჩვენც სწორედ აქ უნდა ვიყოთ ჩასაფრებული. როგორც კი "სიტი" ან "ტოტენჰემი" ქულებს დაკარგავენ, ჩვენ მათთან სხვაობა უნდა შევამციროთ.
"ჩელსის" ბოლოდროინდელ კრიზისს ხალხი ჩვენს ასაკს აბრალებდა, მაგრამ მერწმუნეთ, ჩვენ სულაც არ ვართ "მანჩესტერ იუნაიტედის" ფეხბურთელებზე ასაკოვანი. ცხრილის ზედა ნახევრის სხვა გუნდებიც ვერ დაიკვეხნიან, მანიცდამაინც, ჩვენზე ახალგაზრდობით. თან, ჩვენი ასაკი დიდ უპირატესობასაც ნიშნავს: მსგავს სიტუაციებში მოხვედრის უდიდესი გამოცდილება გვაქვს. თან, ერთმანეთი ათას ბრძოლაში გვყავს გამოცდილი და ყველამ ვიცით, რომ გამარჯვება შეგვიძლია".
ისე როგორ იქნებოდა, ტერისთვის "ლივერპულისგან" 50 მილიონ ფუნტად ნაყიდი ფერნანდო ტორესის შესახებ რომ არ ეკითხათ. კაპიტანმა თქვა:
"ტორესი, ნიკოლა ანელკა და დიდიე დროგბა თანამედროვეობის საუკეთესო თავდამსხმელები არიან და თითოეულ მათგანს განსხვავებული სტილი და თვისება აქვს. მათ წინააღმდეგ თამაში მეტოქეებისთვის ძალიან უსიამოვნოა. მე ბედნიერი ვარ ამიერიდან ტორესის მეტოქე კი არა, თანაგუნდელი ვიქნები. კოპენჰაგენში მან შესანიშნავად ითამაშა. ერთადერთი, რაც მის თამაშს აკლდა გოლი იყო, მაგრამ ახალ ფეხბურთელებს შესაჩვევად და გოლის გასატანად ერთი-ორი თამაში ყოველთვის სჭირდებათ. ვფიქრობ, ფერნანდოსთვის შემდეგ სამშაბათს "იუნაიტედის" კარში გოლის გატანა "ჩელსიში" კარიერის შესანიშნავი დასაწყისი იქნება".
საინტერესო დეტალი:
ტერი ბავშვობიდან მანჩესტერ იუნაიტედის ფანია
