"ქარლინგის" თასის ფინალზე ლაპარაკი "არსენალის" კაპიტნის სესკ ფაბრეგასის ამბით დავიწყოთ: ფაბრესი დაშავებულია და "უემბლიზე" "ბირმინგემის წინააღმდეგ ვერ ითამაშებს! ასეთია ესპანელი ფეხბურთელისთვის მწარე რეალობა. მას ორთავა კუნთი სტკივა. ბუნებრივია, ამის გაგონებაზე პირველი კითხვა, რაც გონებაში მოდის ესაა: ვერც ჩემპიონთა ლიგის მერვედფინალის საპასუხო შეხვედრაში ითამაშებს სესკი? შეგახსენებთ, ეს მატჩი "კამპ ნოუზე" 8 მარტს გაიმართება: "არსენალს" "ბარსელონასთან" პირველ შეხვედრაში 2:1 აქვს მოგებული. ამ კითხვაზე პასუხი ლონდონელების ქომაგთათვის სასიხარულოა - ფაბრეგასი ბარსელონაში იქნება!გაზეთმა "სანმა" გუშინ გამოაქვეყნა ექსკლუზიური წერილი, უფრო სწორედ, მოკლე ინფორმაცია, სადაც
შეგახსენებთ, რომ "მეთოფეთა" თილისმამ ოთხშაბათს, "სტოკთან", პრემიერლიგის გამოტოვებული შეხვედრის მე-14 წუთზე დასტოვა მოედანი. ხუთშაბათს ვენგერმა პრესას ასეთი რამ განუცხადა:
"ტრავმა სერიოზული არ არის, მაგრამ სესკი კვირის ფინალს გამოტოვებს. ის ძალიან გულგატეხილია და ჩვენ ყველანი ვწუხვართ, ასე რომ მოხდა. ერთადერთი, რაც ჩვენ შეგვიძლია მისთვის გავაკეთოთ, თასის მოგებაა".
სხვათა შორის, ამ პრესკონფერენციაზე ვენგერმა თავი აარიდა პასუხს კითხვაზე ითამაშებს თუ არა ფაბრეგასი 8 მარტს "ბარსელონას" წინააღმდეგ, მაგრამ ფეხბურთელის პირადმა მწვრთნელმა ხუან ფერნანდომ ესპანური რადიოსთვის მიცემულ ინტერვიუში თქვა, რომ ვარსკვლავს "კამ ნოუზე" თამაშის პრობლემა არ ექნება.
რასაკვირველია, ვენგერს ფაბრეგასის მნიშვნელობა და მისი განცდა ძალიან კარგად ესმის, მაგრამ "არსენალს" წინ იმდენი მნიშვნელოვანი თამაში ელის, რომ მწვრთნელს მინიმალური რისკის გაწევაც კი არ სურს. რასაკვირველია, უპირველეს ყოვლისა "ბარსელონასთან" თამაშზეა ლაპარაკი.
ფაბრეგასის გამოკლება "მეთოფეთათვის", რასაკვირველია, დიდი დარტყმაა, რადგან გუნდს ისედაც აკლია რამდენიმე ფეხბურთელი: თეო უოლკოტი, ტომას ვერმაელენი და ლუკას ფაბიანსკი. უილკოტი, რომელიც ფაბრეგასის მსგავსად "სტოკთან" შეხვედრაში დაშავდა, უფრო ცუდ დღეშია - მის გამოჯანმრთელებას დრო უნდა და კაცმა არ იცის მოესწრება თუ არა ეს "ბარსელონასთან" შეხვედრამდე. ფინალამდე ჯანმრთელობა უნდა შეუმოწმონ რობინ ვან პერსის, ლორან კოშელნის და ალექს სონგს.
სახალისო ცნობა: ლონდონელთა პოლონელი მეკარის, ვოიცეხ შჩესნის პაპა ცხოვრებაში პირველად დატოვებს სამშობლოს, რათა "უემბლიზე" თავისი 20 წლის შვილიშვილის თამაშს დაესწროს.
"მატჩზე დასასწრებად ჩემი ოჯახის რამდენიმე წევრი მოდის - უთხრა შცესნიმ ჟურნალისტებს - ჩამოდიან ჩემი ძმა და პაპა კაზიმეჟი, რომელსაც პოლონეთი არასდროს არ დაუტოვებია, ასე რომ კვირის შეხვედრა მისთვის დიდი მოვლენაა".
"არსენალისთვის" კარგი ამბავი ის არის, რომ თუ არსენ ვენგერს ამის სურვილი ექნება, "ბირმინგემის" წინააღმდეგ თამაშს შეძლებს აარონ რემსი. მოგეხსენებათ, მან შარშან ფეხი მოიტეხა, გამოჯანმრთელების შემდეგ კი "მეთოფეებმა" "კარდიფში" გააქირავეს, რათა იქ პრაქტიკა მიეღო. სულ ახლახან, გასულ კვირას, მან "კარდიფის" შემადგენლობაში "ლესტერს" გოლიც კი გაუტანა, მაგრამ დღეს კვლავ ვენგერის განკარგულებაშია.
"ბირმინგემი" კი 55 წელიწადია "უემბლიზე" რომელიმე თასის ფინალში არ ყოფილა და, ბუნებრივია, მისთვის კვირის თამაში სამკვდრო-საციცოცხლო მნიშვნელობისაა, მაგრამ... უკვე მოხდა ისეთი რამ, რამაც ადამიანს შეიძლება აფიქრებინოს, რომ ალექს მაკლიშის გუნდი დაითარსა. კერძოდ, ინგლისში არსებობს ტრადიცია, რომლის თანახმადაც თასის ფინალის წინ მეტოქეები "უემბლის" მინდორზე საგანგებოდ ამ დღისთვის შეკერილი კოსტუმებით გადიან და ხალხს ესალმებიან. "ბირმინგემ სიტიმ" სამკერვალო "ჰერვი ნიკოლსთან" დადო 9 ათას ფუნტიანი ხელშეკრულება ხელშეკრულება, მაგრამ მხარეები ფერებზე ვერ შეთანხმდნენ და... აღარ ესწრება. თურმე ფეხბურთელები საკლუბო ფერების, მუქი ლურჯის, ცისფრერისა და თეთრის კონბინაციას ითხოვდნენ, სამკერვალომ კი უთხრა, რომ ამ ფერის ნაჭრები არ აქვს. დაიწყეს გამოსავლის ძებნა და სანამ ესკიზები შედგა, თამაშიც კარს მოადგათ.
