ტურინის "იუვენტუსის" სიახლეები: გატეხილი გული და "ბებერი ქალბატონი"

"იუვენტუსი" სატრანსფერო კამპანია ნელნელა გააქტიურდა. აქამდე ტურინული კლუბი დატოვეს ლეონარდო ბონუჩიმ და დანი ალვეშმა, თუმცა გუნდს დუგლას კოშტა დაემატა მიუნხენის "ბაიერნიდან". სხვა სიახლეების შესახებ ქვემოთ მოგითხრობთ...

ჩაშლილი ტრანსფერი
ტურინული გრანდის ერთ-ერთი უპირველესი სამიზნე პატრიკ შიკი იყო - 21 წლის ჩეხმა ფორვარდმა "სამპდორაში" ასპარეზობით მიიქცია ყურადღება და გასული სეზონის ერთ-ერთ მთავარ აღმოჩენად იქცა. შიკი ტურინში ჩავიდა, რათა სამედიცინო შემოწმება გაევლო და კლუბთან ხანგრძლივვადიანი ხელშეკრულება გაეფორმებინა.

შიკმა ორი სამედიცინო შემოწმება ჩააგდო და შედეგად, "იუვენტუსმა" უარი თქვა პატრიკის დამატებაზე. უახლოეს დღეებში "იუვენტუსის" მესვეურები ჩაშლილი ტრანსფერის შესახებ დეტალურ ინფორმაციას გაავრცელებენ. რატომ ჩააგდო ახალგაზრდა ფეხბურთელმა ტესტები? მედიაში "გულის პრობლემაზე" ჩურჩულებენ.

ისე, საოცარია, თუ ფეხბურთელს გული აწუხებს, "სამპდორიაში" თამაშს შეძლებს, გენუაში გულით ავადმყოფისთვის თამაში ნაკლებად საშიშია, ვიდრე ტურინში?
ჩეხის სანაცვლოდ "იუვე" 32 მილიონს იხდიდა ფეხბურთელში, რომელმას გასულ სერია A-ში 11 გოლი გაიტანა 32 თამაშში.

დე შილიო "იუვეში" ითამაშებს
"იუვენტუსში" გააგრძელებს კარიერას მატია დე შილიო - 24 წლის მცველმა უკვე დატოვა ჩინეთი, სადაც "მილანთან" ერთად იმყოფებოდა შეკრებაზე, იტალიაში დაბრუნდა და "იუვენტუსთან" კონტრაქტის გასაფორმებლად ემზადება. ტურინული კლუბი მატიას სანაცვლოდ 12 მილიონ ევროს გადაიხდის - ერთი წლის თავზე, "მილანმა" ბონუსების სახით შესაძლოა, კიდევ 5 მილიონი ევრო მიიღოს.

"როსონერის" არ უნდოდა დე შილიოს გაშვება, მაგრამ თვითინ ფეხბურთელი იყო დაინტერესებული "იუვენტუსში" გადაბარგებით. გასული სეზონის მსვლელობისას, "მილანის" მესვეურებმა მატიას ახალი კონტრაქტი შესთავაზეს, მაგრამ უარი მიიღეს - მაშინვე იყო ცნობილი, რომ დე შილიოს მიმართ "იუვენტუსი" იჩენდა ინტერესს და რაც მთავარია, ტურინში გადასვლა თავად ფეხბურთელსაც სურდა.

ბერნარდესკი ტურინის გზაზე
დიდი შანსია, "იუვენტუსში" გააგრძელოს კარიერა ფედერიკო ბერნარდესკიმ - ახალგაზრდა შემტევმა "ბიანკონერისთან" უკვე შეათანხმა პირადი ხელშეკრულების დეტალები.

"იუვენტუსი" "ფიორენტინასთან" მოლაპარაკების დასკვნით ფაზაშია და თუ შეთანხმება შედგა, ტურინელები ფლორენციულ კლუბს 35 მილიონ ევროს გადაუხდიან. ბერნარდესკის ხელში ჩაგდება ჟოზე მოურინიოს "მანჩესტერ იუნაიტედსაც" სურს. შიკის მსგავსად, ბერნადესკიც სერია A-ს გასული გათამაშების ერთ-ერთი მთავარი აღმოჩენაა; ფედერიკოს სტაბილურად იწვევენ იტალიის ეროვნულ ნაკრებში. თვითონ ფეხბურთელი არ მალავს, რომ "იუვენტუსში" სურს კარიერის გაგრძელება:

"ფლორენციაში ბედნიერი ვარ და "ფიორენტინა" მუდამ ჩემს გულში იქნება, თუმცა, რა თქმა უნდა, უფრო მაღალ დონეზე მსურს შესაძლებლობების წარმოჩენა.

"იუვენტუსი" იტალიის უძიერესი გუნდია და ჩემპიონთა ლიგაზე ასპარეზობს - ბუნებრივია, ტურინში გადასვლა წინ გადადგმული ნაბიჯი იქნება. თუმცა, ამ თემაზე კლუბები აწარმოებენ მოლაპარაკებას, პროცესში ჩემი აგენტიც ჩართულია და თუ რა მოხდება, ამას მომავალი გვიჩვენებს".

ამ თბილი სიტყვების მიუხედავად, "იების" ფანებნა ბერნარდესკის სავარაუდო ტრანსფერი ძალზე მტკივნეულად მიიღეს, მათ შეურაცხმყოფელი ბანერები გამოფინეს. ერთ-ერთს ეწერა: "მახინჯო კუზიანო, ყველას ვალია, სახეში გაფურთხოს".

ბედნიერი შჩესნი
გუშინ "იუვენტუსში" მატება იყო - ვოიცეხ შჩესნი 12,2 მილიონ ევროდ გადავიდა "ზებრების" რიგებში და ის ჯიჯი ბუფონის შემცვლელი იქნება. სატრანსფერო ფასი შესაძლოა, 15,3 მილიონ ევრომდე გაიზარდოს, მაგრამ ეს უკვე პოლონელი გოლკიპერის მარიფათზე იქნება დამოკიდებული. 27 წლის მეკარემ 4-წლიანი ხელშეკრულება გააფორმა "იუვესთან".

"იუვენტუსის" ვარიანტის მერე აღარაფერზე მიფიქრია. "რომას" მადლიერი ვარ ყველაფრისთვის, მაგრამ ახლა ტურინში მოვედი მოგებებისთვის. გასულ სეზონში "იუვემ" ყველაფერი მოიგო ჩემპიონთა ლიგის გარდა", - განაცხადა შჩესნიმ, რომელიც 23-ნომრიანი მაისურით ითამაშებს ახალ გუნდში.

დელ პიერო: ახლა დიდ ტრანსფერს ველი
"იუვენტუსის" ლეგენდარულმა ფეხბურთელმა ალესანდრო დელ პიერომ განაცხადა, რომ ახლა ტურინული კლუბისგან ერთ დიდ ტრანსფერს ელის: "ბონუჩის წასვლის მერე, ველი ისეთი ფეხბურთელის შეძენას, რომელზეც მედიას ჯერ არაფერი უთქვამს. ბონუჩის შემდეგ შექმნილი დიდი სიცარიელე უნდა შეივსოს და მე არ ვლაპარაკობ ცენტრალური მცველის შეძენაზე".

ყოველდღიური სპორტული გაზეთი "ლელო"