ამ ზაფხულს ტურინის "იუვენტუსმა" აქტიური სატრანსფერო პოლიტიკა აწარმოა, თუმცა ჯერჯერობით "ბებერი ქალბატონის" ხელმძღვანელობა შეჩერებას არ აპირებს. ტურინელებმა ფრანგული "ლე მანიდან" იჯარით პარაგვაელი გარემარბი მარსელო ესტიგარიბია აიყვანა. 23 წლის სამხრეთამერიკელმა ვერაფრით მოიკიდა ფეხი გიორგი მაკარიძის გუნდში, ის ჯერ "ნიუელს ოლდ ბოისში" გაანათხოვრეს, შემდეგ ურუგვაულ "დეპორტივო მალდონადოში". თუკი ესტიგარიბია გაამართლებს, ტურინელებს მისი გამოსყიდვის უფლება აქვთ, სატრანსფერო თანხა კი 5 მილიონი ევრო იქნება. ესტიგარიბიამ ჯერ კიდევ პარასკევს გაიარა "იუვენტუსში" სამედიცინო შემოწმება, კვირას კი კლუბმა ოფიციალურად გამოაცხადა ტრანსფერის შესახებ.
პარაგვაელი მივიდა და არგენტინელი წავიდა
"იუვეს" კიდევ ერთი სამხრეთამერიკელი (ოღონდ, იტალიის მოქალაქე) 31 წლის ამაური "პარმაში" დარჩენას (სადაც იჯარით თამაშობდა) აღარ აპირებს და გული საფრანგეთისკენ მიუწევს, სადაც მას "პარი სენ ჟერმენი" ეპატიჟება. "პარმაში" ამაურიმ კარგად ითYამაშა, 11 მატჩში 7 გოლი გაიტანა და სებასტიან ჯოვინკოსთან კარგი წყვილი შექმნა. თუმცა ამაურიმ ამით "სინიორას" ხელმძღვანელობას გული ვერ მოულბო, ამას წინათ მას ოფიციალურად განუცხადეს, რომ ტურინულ კლუბში მომავალი არა აქვს. იტალიურ კლუბებში ამაურის განათხოვრების შანსი კი ფეხბურთელის დიდმა ხელფასმა მოსპო, მას წელიწადში 4 მილიონი ევრო სურს გასამრჯელოდ. ამ თანხამ კი "პალერმო", "ჯენოა", "ნაპოლი" და "ფიორენტინა" დააფრთხო.
"იუვეში" უკვე მითხრეს, რომ აქ აღარაფერი მესაქმება, თუმცა უგუნდოდ არ დავრჩები. აგენტმა მითხრა, რომ პსჟ ჩემით დაინტერესებულია, თუმცა ლეონარდოს ჯერ ჩემთვის არ დაურეკავს. პსჟ დიდი გუნდია და, რა თქმა უნდა, მე ამ წინადადებით დავინტერესდი", - უთხრა ფრანგულ "ეკიპს" ბრაზილიური წარმოშობის თავდამსხმელმა.
გუშინ გავრცელდა ხმა, თითქოს, "იუვენტუსი" მილოშ კრასიჩს ალექსის სანაცვლოდ "სტემფორდ ბრიჯზე" უშვებდა, თუმცა მოგვიანებით ეს ინფორმაცია კრასიჩის აგენტმა მარკო ნალეტიჩმა კატეგორიულად უარყო: "კრასიჩი ბედნიერია ტურინში და არსად წასვლას არ აპირებს". 26 წლის ნახევარმცველმა "იუვენტუსის" მაისურით 41 მატჩში 9 გოლი გაიტანა.
კიდევ ერთი ინფორმაცია, "სინიორას" ბანაკიდან: ტურინელები კვლავ ეძებენ მაღალი დონის ცენტრალურ მცველს, ამჯერად მათ "სან პაულუს" როდოლფოს დაადგეს თვალი. "გაძეტა დელო სპორტის" ვერსიით, ტურინელებმა ბრაზილიელებს როდოლფოში 8 მილიონი ევრო შესთავაზეს. "იუვეში" ეს პოზიცია გაძლიერებას საჭიროებს, ჯერ დიეგო ლუგანოზე იყო ლაპარაკი, შემდეგ ალექსის დამატებაზე, ბოლოს ბრუნო ალვეშზე, ახლა კი ტურინელები 25 წლის როდოლფოს მიადგნენ. ვფიქრობთ, როგორც კი "იუვენტუსი" ცენტრალურ მცველს შეიძენს, გაარკვევს ჰოლანდიელი ელჯერო ელიას საკითხს, კლუბის სატრანსფერო აქტივობაც დასრულდება.
ყოველდღიური სპორტული გაზეთი "ლელო"
