"ინტერის" წარუმატებლობებს დასასრული არ უჩანს - თავად განსაჯეთ, სეზონის დაწყებიდან მილანურმა გრანდმა ხუთი ოფიციალური შეხვედრა ჩაატარა და ვერც ერთი ვერ მოიგო. გახსოვთ ალბათ, ჯერ კიდევ აგვისტოში "ინტერი" იტალიის სუპერთასის პაექრობაში დამარცხდა თანაქალაქელთან, რაც "ნერაძურის" გულშემატკივრებმა მტკივნეულად აღიქვეს - ამას სერია A-ს სტარტი და სიცილიაში განცდილი მარცხი მოჰყვა, რასაც "ტრაბზონსფორთან" საშინაო წაგება, "რომასთან" ფრე და "ნოვარასთან" განცდილი კიდევ ერთი სამარცხვინო მარცხი მიემატა.
მოკლედ, "ინტერი" კრიზისშია, ამას წყალი არ გაუვა და ამ კრიზისის მთავარი "შემოქმედი" ჯანპიერო გასპერინი გახლავთ, მწვრთნელი, რომელიც გუშინ გაათავისუფლეს
სენიორ ჯანპიერო გუნდს 3-4-3 ტაქტიკით ათამაშებდა, რამაც არ გამოიღო შედეგი და ისეთი პირი უჩანდა, რომ არც არასდროს გამოიღებდა - თვითონ მწვრთნელი კი ჯიუტად იდგა თავის პოზიციაზე და არაფრის დიდებით არ ცვლიდა ტაქტიკურ მონახაზს.
ამაზე მისი ბოლო კომენტარი მეტყველებს, როდესაც ჯერ კიდევ "ინტერის" მთავარი მწვრთნელი იყო: "სქემის შეცვლას არ ვაპირებ, რადგან საკუთარ თავში დარწმუნებული ვარ და მჯერა, რომ უახლოეს პერიოდში ყველაფერი გამოსწორდება. მჯერა ჩემი შეგირდებისაც, რომლებიც ყველაფერს აკეთებენ კრიზისიდან ამოსაძრომად. დიახ, კრიზისი სახეზეა, ამას არ უარვყოფ, მაგრამ დრო ყველაფერს თავის ადგილზე დააყენებს".
დრომ მართლაც დააყენა ყველაფერი თავის ადგილზე, გასპერინის მადლობა გადაუხადეს გაწეული შრომისთვის, წარმატებები უსურვეს და კარისკენ მიუთითეს.
გასპერინის გათავისუფლებიდან ერთი საათი არ იყო გასული, რომ მისი შესაძლო შემცვლელის შესახებ უამრავი ინფორმაცია გავრცელდა.
ყველაზე ხშირად იმის შესახებ ისმის, რომ "ინტერს" დღემდე უმუშევარი კლაუდიო რანიერი ჩაუდგება სათავეში - სენიორ კლაუდიომ უკვე მოასწრო და ამ თემასთან დაკავშირებით მოკლე კომენტარი გააკეთა: "მილანიდან ჩემთვის არავის დაურეკავს და შესაბამისად, გამიჭირდება იმაზე საუბარი რამდენად რეალურია გავრცელებული ცნობები.
თუმცა, რადგან ამის შესახებ ასე ინტენსიურად საუბრობენ, ალბათ ჩემი კანდიდატურა მართლაც განიხილება. არ დავმალავ, ჩემთვის დიდი პატივი იქნება ისეთი გუნდის გაწვრთნა, როგორიც "ინტერია". ვნახოთ, ყველაფერი უახლოეს პერიოდში გამოჩნდება".
სხვადასხვა ვერსიით, "ინტერის" მთავარი მწვრთნელის პოსტზე კიდევ ოთხი კანდიდატურა განიხილება: კიკე სანჩეს ფლორესი, ლუიშ ფიგუ, დელიო როსი და ლუი ვან გაალი.
უცხოელებთან დაკავშირება იტალიელმა ჟურნალისტებმა ამ დრომდე ვერ მოახერხეს, აი დელიო როსის პოზიცია კი უკვე გაცხადდა: "ჩემით "ინტერია" დაინტერესებული? - თუ ეს მართლაც ასეა, მაშინ ძალიან მიხარია, რადგან "ინტერი" მსოფლიო მასშტაბის კლუბია და ყოველთვის უმაღლესი მიზანებისთვის იბრძვის.
ჯერ კიდევ გასულ ზაფხულს შემეძლო მილანური გრანდის ჩაბარება, მაგრამ მაშინ არჩევანი სხვაზე შეჩერდა - ვნახოთ, რა იქნება ამჯერად... ვარ თუ არა თანახმა? - ჩემი მოთხოვნები მაქვს, რომლებსაც ყველა დაინტერესებულ კლუბს წარვუდგენ - დანარჩენი კი შემდეგ გამოჩნდება".
ჯანპიერო გასპერინის გათავისუფლების თემას "ინტერის" სპორტული დირექტორი მარკო ბრანკა გამოეხმაურა და შემდეგი განაცხადა: "არ ვთვლი, რომ ნაჩქარევი გადაწყვეტილება მივიღეთ, რადგან გასპერინიმ ვერაფრით აუღო ალღო ახალ სამუშაოს.
ამას ნათლად ვხედავდით და დროული გადაწყვეტილებაც მივიღეთ. წინააღმდეგ შემთხვევაში, ჩვენ უბრალოდ რამდენიმე დღეს, ან სულაც კვირას დავკარგავდით და მოსახდენი მაინც მოხდებოდა. გასპერინი შესანიშნავი ადამიანი, კარგი მწვრთნელია, მაგრამ "ინტერი" მისი გუნდი არ აღმოჩნდა. მინდა, რომ წარმატებები ვუსურვო ყველა იმ საქმეში, რასაც ხელს მოკიდებს".
ყოველდღიური სპორტული გაზეთი "ლელო"
