როგორც ჩანს, "ნაპოლის" მესვეურები ესეკიელ ლავეცის შემცვლელის მოძებნას არ აპირებენ და იმედებს მთლიანად 21 წლის ფორვარდ ლორენცო ინსინიეზე ამყარებენ. ეს უკანასკნელი გასულ სეზონში "პესკარას" ღირსებას იცავდა და ამ გუნდის წარმატებაში ლომის წილი დაიდო. ინსინიემ "დელფინების" შემადგენლობაში 37 თამაში ჩაატარა და 18 გოლი გაიტანა. ამასთან, არაერთი საგოლე პასი მიითვალა აქტივში.
და მაინც, რამდენად კარგად შეცვლის ახალგაზრდა, გამოუცდელი თავდამსხმელი ლავეცის? - ეს კითხვა ღიად რჩება და ბუნებრივია, ამ თემაზე ნეაპოლელებსაც უწევთ კომენტარების გაკეთება - მოვუსმინოთ "ნაპოლის" მთავარ მწვრთნელ ვალტერ მაცარის:
"
როდესაც გავიგე, რომ ამ ფეხბურთელის სატრანსფერო უფლებებს "ნაპოლი" ფლობდა, ძალიან გამიხარდა, რადგან მისი თამაში პირველივე ნახვისას მომეწონა. იყო საუბრები, რომ ლორენცო "სამპდორიაში" უნდა გაგვენათხოვრებინა, მაგრამ ეს გამორიცხულია - ჩვენთან რჩება და დარწმუნებული ვარ, გუნდს დიდ სარგებელს მოუტანს".
"გაძეტა დელო სპორტის" მტკიცებით, "ნაპოლის" მესვეურები "უდინეზეს" მარცხენა მცველით, პაბლო არმეროთი არიან დაინტერესებულნი და მის გადასაბირებლად ყველაფერს აკეთებენ - ეს ინფორმაცია უდინური კლუბის პრეზიდენტმა ჯამპაოლო პოცომ დაადასტურა და ბოლოს სწორედ მას გადავცეთ სიტყვა:
"დიახ, არმეროს გადაბირება ნეაპოლელებს მართლაც უნდათ და საკმაოდ სარფიან წინადადებასაც გვთავაზობენ. ვერაფერს გამოვრიცხავ, მაგრამ პაბლო ჯერჯერობით "უდინეზეს" ფეხბურთელია და მისი გასხვისების დიდი სურვილი არ გვაქვს.
ბევრი რამ თავად ფეხბურთელზეა დამოკიდებული, რადგან თუ წასვლა ურჩევნია, ძალით გაკავებას ნამდვილად არ ვაპირებთ. პაბლოს უახლოეს დღეებში შევხვდები, დაველაპარაკები ამ თემაზე და მის პოზიციას გავიგებ".
ყოველდღიური სპორტული გაზეთი "ლელო"
