"ფიორენტინას" მესვეურები სატრანსფერო ბაზარზე აქტიურობენ და ცდილობენ, მომდევნო სეზონისთვის გუნდი მნიშვნელოვნად გააძლიერონ. 24 ივლისს ოფიციალურად დადასტურდა, რომ ხუან კუადრადო მომდევნო სეზონს ფლორენციული გუნდის შემადგენლობაში გაატარებს. "უდინეზეს" 24 წლის უკანახაზელმა გასული სეზონი იჯარის წესით "ლეჩეში" გაატარა და გუნდის ერთ-ერთი ყველაზე გამორჩეული ფეხბურთელი იყო - 33 შეხვედრაში მიიღო მონაწილეობა, სამი გოლი გაიტანა და ორი საგოლე პასიც მიითვალა აქტივში.
კუადრადოს თითქოს "უდინეზეში" უნდა ეასპარეზა, მაგრამ ბოლო მომენტში ფლორენციაში აღმოჩნდა - რაც მთავარია, "ფიორენტინას" ფეხბურთელის გამოსყიდვის უფლება აქვს და თუ მხარეები კმაყოფილნი დარჩნენ თანამშრომლობით,
"ახალ გუნდში მსურდა გადასვლა და ძალიან მიხარია, რომ "ფიორენტინაში" ამოვყავი თავი. ფლორენცია ულამაზესი ქალაქია, "ვიოლა" კი ამბიციური გუნდი, რომელიც მაღალი ადგილებისთვის იბრძოლებს.
საუკეთესო ფეხბურთი ჯერ არ მიჩვენებია და მჯერა, რომ ამას "ფიორენტინაში" მოვახერხებ. დიდი იმედი მაქვს, რომ ფლორენციელ გულშემატკივრებს თავს შევაყვარებ და "ფიორენტინაში" კიდევ დიდხანს დავრჩები".
კუადრადო იქით იყოს და, საბოლოოდ გადაწყდა, რომ სტევან იოვეტიჩი მომდევნო სეზონსაც "ფიორენტინაში" გაატარებს. ეს ამბავი ფლორენციელი გულშემატკივრებისთვის განსაკუთრებულად სასიხარულო უნდა იყოს, რადგან სტევანი გუნდის ლიდერი და ყველაზე იმედისმომცემი მოთამაშეა - ჩერნოგორიელი ფორვარდის ხელშეუხებლობაზე თვით კლუბის პრეზიდენტმა, ანდრეა დელა ვალემ ისაუბრა:
"სტევანის მიმართ არაერთი გუნდი გამოხატავს ინტერესს, მათ შორის კი, ყველაზე მეტად "იუვენტუსი" აქტიურობს.
ტურინელები მზად არიან, ფეხბურთელის სანაცვლოდ საკმაოდ სოლიდური თანხა გადაიხადონ, მაგრამ არჩევანი უკვე გავაკეთეთ...
იოვეტიჩი არ იყიდება და მინდა ეს ყველამ იცოდეს; ახალ გუნდს ვაკეთებთ, რომელიც სტევანის გარშემო აიწყობა და გამომდინარე აქედან, მის გასხვისებაზე საუბარი სრულიად უადგილოა.
ჩვენი მიზანი გაძლიერებაა და არა წამყვან ფეხბურთელებთან განშორება, მით უმეტეს, უდავო ლიდერთან".
ყოველდღიური სპორტული გაზეთი "ლელო"
