სტეფან ელ შაარავი მხოლოდ 19 წლისაა, მაგრამ უკვე ბევრს მიაღწია ფეხბურთში - "მილანის" ძირითად შემადგენლობაში დაიმკვიდრა ადგილი და ეროვნულ ნაკრებშიც კი მიიღო მიწვევა. მოკლედ, არაბული წარმოშობის იტალიელს კარგი დროება უდგას და შესაბამისად, ჟურნალისტთა დიდი ყურადღებითაც სარგებლობს.
სტეფანს "კორიერე დელო სპორტის" ჟურნალისტი გაესაუბრა და სხვადასხვა თემაზე მისი პოზიციით დაინტერესდა. თუმცა, არა მარტო თემებზე, ახალგაზრდა შემტევს ყოფილი თუ ამჟამინდელი თანაგუნდელების დახასიათებაც მოუწია.
ზლატანი
სიმართლე გითხრათ, იბრაჰიმოვიჩთან თამაში არცთუ ისე ადვილია... როგორც თვითონ ფიქრობს. უნდა, რომ ყველა ისე მოქმედებდეს, როგორც მას სურს.
მოკლედ,
ვცდილობდი, იბრასთან მეგობრული ურთიერთობა მქონოდა, მაგრამ უნდა ვაღიარო, რომ ეს არცთუ ისე კარგად გამომივიდა.
იმედია, ზლატანი არ მიწყენს, მაგრამ სათქმელი უნდა ვთქვა - როდესაც მოედანზე იბრა არ იყო, თავს გაცილებით კომფორტულად და თავისუფლად ვგრძნობდი.
გატუზო
როდესაც გატუზომ ჩემი ვარცხნილობა დაინახა, საშინლად გაბრაზდა და მთელი ხმით მიყვირა:
სისულელეებს მოეშვი და ფეხბურთის თამაშზე იფიქრეო. მისი ასეთი რეაქცია ჩემთვის შოკისმომგვრელი იყო, რადგან რინოს არ ვიცნობდი და პირველივე შეხვედრისას ბოლო ხმაზე მიყვირა. შემდეგ ახლოს გავიცანი და მივხვდი, რომ ის, უბრალოდ, ასეთი იყო და მისგან მსგავსი ქმედება არ უნდა გამკვირვებოდა.
ჯენარო ყველაზე გულახდილი ადამიანია, ვისაც კი ოდესმე შევხვედრივარ - ყველას ძალიან გვენატრება და გული მწყდება, რომ მასთან ერთად უფრო დიდხანს ვერ ვითამაშე.
პაცინი
პაცინის აქამდეც ვიცნობდი და მისმა ტრანსფერმა ძალიან გამახარა. ჩემი პირადი აზრით, იტალიაში ერთ-ერთი საუკეთესო ფორვარდია და თავის სათქმელს აუცილებლად იტყვის.
ტანდემში უკვე ვითამაშეთ და კარგადაც გავუგეთ ერთმანეთს, რაც ძალიან მახარებს. რაც მთავარია, შესანიშნავი პიროვნებაა, რომელთან ურთიერთობაც ერთ რამედ ღირს. დარწმუნებული ვარ, "მილანი" მასთან ერთად გაცილებით ძლიერი იქნება.
ვარცხნილობა
უკვე გითხარით, თუ რა რეაქცია ჰქონდა ჯენარო გატუზოს, როდესაც ჩემი ვარცხნილობა დაინახა. სიმართლე გითხრათ, სხვებმაც შემომიტიეს და მირჩიეს, რომ თავი მთლიანად გადამეპარსა.
შემდეგ მასიმო ამბროზინი გამომექომაგა და განაცხადა, რომ თუ ანალოგიური ვარცხნილობით მარეკ ჰამშიკი, ნეიმარი და ჯიბრილ სისე თავიანთ საქმეს შესანიშნავად აკეთებენ, რატომ არ შეიძლება, რომ მეც იგივე გავაკეთო? - ამბროზინი გუნდში განუზომელი ავტორიტეტით სარგებლობს და მას შემდეგ ჩემს ვარცხნილობას ცუდად არავინ შეხებია.
პოპულარობის შესახებ
როდესაც გულშემატკივრები ფოტოს გადაღებას ან ავტოგრაფს მთხოვენ, თავს უხერხულად ვგრძნობ, რადგან მუდმივად იმის განცდა მაქვს, რომ ეს ყველაფერი არ დამიმსახურებია.
ეს ჩემი ოჯახის, კერძოდ კი, მამის დამსახურებაა, რომელიც ყოველთვის იმას მიმეორებს, რომ წარმატება თავში არ უნდა ამივარდეს. როდესაც სერია A-ში მოვხვდი, ჩემს მიმართ ყურადღება გაათმაგდა და დიდი იყო იმის ალბათობა, რომ რეალობის შეგრძნება დამეკარგა, მაგრამ საბედნიეროდ, ასე არ მოხდა.
კარგად მაქვს გაცნობიერებული, რომ ჯერ კიდევ დიდი გზა მაქვს გასავლელი და მიწაზე მყარად დგომაა საჭირო.
ყოველდღიური სპორტული გაზეთი "ლელო"
