წავიდა ის დრო, როდესაც ევროპული ფეხბურთის გრანდებს შედარებით სუსტი მეტოქეები აუცილებლად უნდა დაემარცხებინათ... საერთო დონე გათანაბრებდა და სპორტის უპირველესი სახეობა სულ უფრო არაპროგნოზირებადი ხდება. აქედან გამომდინარე, იტალიის ეროვნული ნაკრები ერევანში მძიმე ბრძოლის მოლოდინში ჩავიდა და პრინციპში, ეს მოლოდინი გამართლდა კიდეც.
თანაც, ბოლო პერიოდში სომხეთის უმთავრესმა გუნდმა მკვეთრად მოუმატა და რატომაც არ შეიძლებოდა, რომ საკუთარ კედლებში თუნდაც მრისხანე მეტოქესთან მინიმუმ ქულისთვის ებრძოლა. იბრძოლა კიდეც, მაგრამ კლასმა მაინც თავისი გაიტანა.
ჩეზარე პრანდელის შეგირდებმა მეტოქე დამაჯერებელი ანგარიშით დაამარცხეს და მნიშვნელოვნად გაიუმჯობესეს სატურნირო მდგომარეობა.
ჩეზარე პრანდელიმ შეგირდები 4-4-2 ტაქტიკით განალაგა, შეტევის წინა ხაზზე კი სებასტიან ჯოვინკოსა და დანიელ პაბლო ოსვალდოს ტანდემი გაამწესა.
ნახევარდაცვაში ტრადიციული ოთხეული ვიხილეთ: დანიელე დე როსი, ანდრეა პირლო, კლაუდიო მარკიზიო და რიკარდო მონტოლივო. ამ ოთხეულმა თითქოს დაიმკვიდრა ადგილი ნაკრების ძირითად შემადგენლობაში და პრანდელიც სულ უფრო ერიდება ცვლილებებს.
დაცვის ცენტრში ლეონარდო ბონუჩის და ანდრეა ბარცალის ტანდემი ვიხილეთ, ჯორჯო კიელინი კი თადარიგში დარჩა, რისი მიზეზიც მიკრო-ტრავმა უნდა იყოს. ფლანგებზე კრისტიან მაჯო და დომენიკო კრიშიტო მოქმედებდნენ, კარში კი, რა თქმა უნდა, ჯანლუიჯი ბუფონი იდგა.
იტალიელებმა აქტიურად დაიწყეს და ანგარიშიც მალევე გახსნეს - მე-11 წუთზე, ანდრეა პირლომ სამართლიანად დანიშნული თერთმეტმეტრიანი გოლად აქცია. ამის შემდეგ სომხები გააქტიურდნენ და მთელი ძალებით შეტევაში გადავიდნენ.
რა გასაკვირია, რომ ყველაზე აქტიური ჰენრიხ მხითარიანი იყო, რომელმაც ერთ ეპიზოდში მცველს გვერდი ოსტატურად აუარა, კიპერთან პირისპირ დარჩა და ანგარიში გაათანაბრა.
აი, ამის შემდეგ კი უპირატესობას სტუმრები დაეუფლნენ, რამაც შედეგი მეორე ტაიმში გამოიღო. 64-ე წუთი მიმდინარეობდა, როდესაც ანდრეა პირლომ ჩვეულად ჩააწოდა მეტოქის საჯარიმოში, დანიელე დე როსიმ კი თავური დარტყმით სომეხთა კიპერს შანსი არ დაუტოვა.
მესამე გოლი აპენინელებმა იგივე სტილში გაიტანეს, ოღონდ სტანდარტულიდან და შედეგად, 3:1 "აძურას" სასარგებლოდ (იხილეთ ვიდეო).
სანამ რამდენიმე საინტერესო კომენტარს გავეცნობოდეთ, დავძინოთ, რომ ჯიჯი ბუფონმა მიკრო-ტრავმა მიიღო, რის გამოც შესაძლოა დანიასთან მოახლოებული მატჩი გამოტოვოს.
ჩეზარე პრანდელი (იტალიის ნაკრების მთავარი მწვრთნელი): შედეგით ძალიან კმაყოფილი ვარ და არც შეგირდებს ვუკარგავ მონდომებას, მაგრამ უკეთესად რომ შეგვეძლო თამაში, ეს ფაქტია. ბურთზე კონტროლი დავაწესეთ და უპირატესობა ამის ხარჯზე მოვიპოვეთ, მაგრამ ხარვეზიც ბევრი გვქონდა. 16 ოქტომბერს დანიელების წინააღმდეგ ბევრად უკეთ უნდა ვითამაშოთ - წინააღმდეგ შემთხვევაში, სასურველი შედეგის მიღწევა გაგვიჭირდება.
კლაუდიო მარკიზიო (იტალიის ნაკრები): მეტოქემ საკმაოდ დიდი წინააღმდეგობა გაგვიწია, რასაც ველოდით კიდეც. გასვლაზე სამი ქულის მოპოვება უმნიშვნელოვანესია და მიხარია, რომ მიზანს მივაღწიეთ. მთავარია, დანიელებთან კიდევ უკეთესად ვითამაშოთ და ამ ორ შეხვედრაში დაგეგმილი ქულები სრულად ავიღოთ. ჯგუფში აუცილებლად პირველი ადგილი უნდა დავიკავოთ და მჯერა, რომ ეს ასეც იქნება.
ჯანლუიჯი ბუფონი (იტალიის ნაკრები): ჩემი პირადი აზრით, ერთ-ერთ ყველაზე რთულ ჯგუფში ვართ, სადაც თითოეულ გამარჯვებას ოქროს ფასი აქვს.
სომხეთთან უმნიშვნელოვანესი ქულები მოვიპოვეთ, რადგან დარწმუნებული ვარ, რომ ერევანში არაერთი კონკურენტი წაიმტვრევს ცხვირს.
მცირე ტრავმა მაქვს, რომელსაც იმედია, მალე მოვირჩენ და დანიის ნაკრების წინააღმდეგ ვითამაშებ. თუ სკანდინავიელებსაც დავამარცხებთ, დიდ ნაბიჯს გადავდგამთ მსოფლიოს ჩემპიონატის საგზურის მოსაპოვებლად.
ყოველდღიური სპორტული გაზეთი "ლელო"
