იტალიურ საფეხბურთო სამყაროში დიდი ხანია ამბობენ, რომ თუ სერია A-ში ხუთ მარცხს იწვნევ, ჩემპიონი ვეღარ გახდებიო. სტატისტიკა ამაზე მიუთითებს და თანაც უკვე, ძალიან დიდი ხანია. ამ ლოგიკით, "მილანმა" უკვე დაკარგა სკუდეტოს მოპოვების შანსი და სხვა ნებისმიერი ლოგიკითაც იგივეს თქმა შეგვიძლია.
მოკლედ, ჩემპიონატის დაწყებიდან მხოლოდ რვა ტურია გასული და ყველა ლოგიკით, "როსონერის" სკუდეტოს მოპოვების შანსი დაკარგული აქვს...
ეს მართლაც გასაკვირი ამბავი იტალიურ საფეხბურთო სამყაროში ყველაზე აქტუალური თემაა და ბუნებრივია, რომ ჩვენც ხშირად გვიწევს ამაზე წერა...
ჟურნალისტთა ნაწილი ამტკიცებს, რომ "მილანის" მესვეურები
"გაძეტა დელო სპორტის" მტკიცებით, ლომბარდიული გრანდის მესვეურები უკვე დაუკავშირდნენ ესპანელ სპეციალისტს და მისგან მოლაპარაკების დაწყებაზე თანხმობაც მიიღეს.
თუმცა "მილანის" ვიცე-პრეზიდენტი ამ ცნობას არ ადასტურებს და ალეგრის მხარდაჭერას უცხადებს. თანაც, კატასტროფულ სტარტზე პასუხისმგებლობას საკუთარ თავზე იღებს:
"ვიცოდი, რომ სეზონის სტარტზე პრობლემები შეგვექმნებოდა, მაგრამ ასეთი რამის წარმოდგენა მაინც შეუძლებელი იყო.
მიუხედავად ამისა, მწვრთნელის გათავისუფლების საკითხი არ დგას დღის წესრიგში, რადგან ამ ყველაფერში ის ნაკლებად არის დამნაშავე.
ზაფხულში გუნდი მთლიანად გარდაისახა და მწვრთნელი რთული ამოცანის წინაშე დადგა... "მილანი" ახალ გზას დაადგა და ალეგრის დრო სჭირდება, რომ თავისი ხედვა ფეხბურთელებამდე მიიტანოს.
ვაღიარებ, ფინანსური პრობლემების გამო წამყვან ფეხბურთელებთან გამოთხოვება მოგვიწია, მაგრამ ეს უკვე წარსულია და მერწმუნეთ, "მილანი" აუცილებლად დაიბრუნებს ძველ დიდებას.
ცუდ შედეგებზე პასუხისმგებლობას საკუთარ თავზე ვიღებ და აქვე ვდებ პირობას, რომ ვითარება მალე გამოსწორდება".
თუმცა...
იტალიელი ჟურნალისტები მაინც დაჟინებით ამტკიცებენ, რომ "მილანის" მესვეურები პეპ გვარდიოლასთან აქტიურ მოლაპარაკებებში არიან ჩაბმულნი.
"გაძეტას" ვერსიით, თუ ესპანელი "მილანის" გაწვრთნაზე თანხმობას განაცხადებს, სილვიო ბერლუსკონი უმალ გაათავისუფლებს ალეგრის და გუნდს გვარდიოლას ჩააბარებს.
მართალია, "როსონერის" მესვეურები წარუმატებლობებში სენიორ მასიმილიანოს არ ადანაშაულებენ, მაგრამ ეს იმას არ ნიშნავს, რომ უკეთესი ვარიანტის შემთხვევაში, ალეგრის პოსტის დატოვება არ მოუწევს.
ვისი ბრალიც არ უნდა იყოს "როსონერის" კრიზისი, ფაქტია, რომ ალეგრის ხელში გუნდს შედეგი არ აქვს და რაღაც აუცილებლად უნდა შეიცვალოს.
სხვათა შორის, გვარდიოლას "მილანის" მთავარ მწვრთნელად შესაძლო დანიშვნის შესახებ კომენტარი ჟოან ლაპორტამ გააკეთა და ბოლოს, სწორედ მას უნდა გადავცეთ სიტყვა.
ვისაც არ გახსოვთ, შეგახსენებთ, რომ ლაპორტა "ბარსელონას" ყოფილი პრეზიდენტია, რომელმაც კატალონიურ გუნდში წარმატებული რეფორმა გაატარა და პეპიც სწორედ მან დანიშნა მთავარი მწვრთნელის პოსტზე:
"გვარდიოლა ჩემი ახლო მეგობარია და მასთან ხშირად მიწევს ურთიერთობა. ბოლო საუბრიდან ისეთი დასკვნა გამოვიტანე, რომ მობეზრდა უფეხბურთობა და მზადაა, ახალი წინადადებები განიხილოს. ვიცი, რომ მისით მიუნხენის "ბაიერნია" დაინტერესებული, მაგრამ ჩემი პირადი აზრით, მისთვის ყველაზე საინტერესო ვარიანტი "მილანია".
ეს გუნდი კრიზისშია, პეპს კი გამოწვევები ძალიან იზიდავს. ამასთან, გვარდიოლას ყოველთვის მოსწონდა იტალია, იქ ხშირად დადიოდა და სამწვრთნელო სემინარებს ესწრებოდა.
ცნობილია ისიც, რომ სწორედ "ბრეშაში" ასპარეზობის დროს გადაწყვიტა მწვრთნელობის დაწყება. ვგონებ, დიდია შანსი, გვარდიოლა სწორედ "როსონერის" ჩაუდგეს სათავეში. მეტიც, პრაქტიკულად, დარწმუნებული ვარ, რომ პეპი "მილანში" წავა".
ყოველდღიური სპორტული გაზეთი "ლელო"
