იტალიის თასის კიდევ ერთი მეოთხედფინალისტის ვინაობა "ინტერი"-"ვერონას" დაპირისპირებაში გამოვლინდა. როგორც მოსალოდნელი იყო, მილანელებმა განსაკუთრებული პრობლემების გარეშე დაამარცხეს მეტოქე და მომდევნო ეტაპზე გავიდნენ.
ანდრეა სტრამაჩონიმ ნახევრად ექსპერიმენტული შემადგენლობა დააყენა, თუმცა შეტევის ხაზი ოპტიმალურთან მიახლოებული იყო. მართალია, დიეგო მილიტოს არ უთამაშია, მაგრამ სამაგიეროდ, ანტონიო კასანო და როდრიგო პალასიო ძირითად შემადგენლობაში იყვნენ.
მილანელებს პირველ ტაიმში უნდა გაეხსნათ ანგარიში, მაგრამ დამაგვირგვინებელ ფაზაში იშვიათი უზუსტობა გამოავლინეს.
სამაგიეროდ, მეორე ნახევარში იხეირეს და ვერონელებს ორი უპასუხო ბურთი მიართვეს - ანტონიო კასანო კიპერთან პირისპირ დარჩა და ისე შეაგორა
მატჩის ბოლო 10 წუთი ძალიან მხიარული გამოდგა - "ინტერის" კიპერმა ლუკა კასტელაციმ ტრავმა მიიღო, თამაშის გაგრძელება ვეღარ შეძლო და რადგან იმ მომენტისთვის მასპინძლებს სამივე ცვლილება გამოყენებული ჰქონდათ, კარში როდრიგო პალასიო ჩადგა.
მისდა სასახელოდ უნდა ითქვას, რომ ახალ ამპლუაში თავი შესანიშნავად წარმოაჩინა, ზედ საფინალო სასტვენის წინ კი ისეთი დარტყმა აიღო, რომ "ჯუზეპე მეაცაზე" შეკრებილი გულშემატკივრები არგენტინელ ფორვარდს ფეხზე წამოუდგნენ.
პალასიო საკმაოდ კარგი მეკარე ყოფილა და როგორც ნამატჩევს განაცხადა, ბავშობაში სწორედ კარში დგომა უყვარდა:
"თავიდან კარში ჩადგომის სურვილი კრისტიან კივუმ გამოთქვა, მაგრამ ანდრეა სტრამაჩონიმ არჩევანი ჩემსა და რიკი ალვარესს შორის გააკეთა.
ბავშვობაში ხშირად ვიდექი კარში, ვარჯიშებზეც მომირგია კიპერის როლი და შესაბამისად, გარკვეული გამოცდილება მქონდა - სწორედ ამიტომ ავიღე პასუხისმგებლობა და საბედნიეროდ, კარი მშრალად შევინახე".
ინტერი-ვერონა 2:0
გოლები: 1:0 კასანო (50), 2:0 გუარინი (54).
ინტერი (4-3-3): კასტელაცი - ჯონატანი, სილვესტრი, ჟუან ჟესუსი (55. ძანეტი), კივუ - ნაგატომო, მარიგა (46. გუარინი), დანკანი - ალვარესი, პალასიო, კასანო (75. პერეირა).
ყოველდღიური სპორტული გაზეთი "ლელო"
