ამბობენ, რომ ტიტულის დაცვა კიდევ უფრო რთულია, ვიდრე მისი პირველად ან გარკვეული პაუზის შემდეგ მოპოვებაო. ამ მისიას "იუვენტუსმა" წარმატებით გაართვა თავი და მიჯრით მეორედ, სულ კი 29-ედ გახდა ქვეყნის ჩემპიონი. თუმცა, კიდევ ერთხელ გვიწევს იმის განმეორება, რომ მინდორზე პიემონტელებმა 31-ჯერ იპირველეს და ბუნებრივია, თვითონ სწორედ ამ რაოდენობას აწვებიან...ეს მხოლოდ დასაწყისია...
ტურინელმა გულშემატკივრებმა საყვარელი გუნდის მორიგი ტრიუმფი ხმაურიანად აღნიშნეს... "იუვე"-"პალერმოს" შემდეგ სტადიონზე დაგეგმილი ყველა ღონისძიება ჩაშალეს, რადგან მინდორზე შეიჭრნენ და მწვრთნელ-ფეხბურთელებს ყველაფერი შემოახიეს. როდესაც ათასობით ადამიანი ემოციას გასაქანს აძლევს და
ზეიმმა ქალაქის ქუჩებში გადაინაცვლა და იქაც დიდი ამბები იყო, მაგრამ აუცილებლად უნდა ვთქვათ, რომ თვითონ "იუვეს" მწვრთნელ-ფეხბურთელ-მესვეურებმა დიდი წარმატება მოზომილად აღნიშნეს და კომენტარებიც დაახლოებით ასეთი პათოსის ჰქონდათ: ეს მხოლოდ დასაწყისია...
ანტონიო კონტეს თქმით, "ბებერ ქალბატონს" მთავარი წარმატებები წინ აქვს და მიღწეულით დაკმაყოფილებას არავინ აპირებს. მესიჯი ნათელია - "ვეკია სენიორას" ჩემპიონთა ლიგის მოგება სურს და ეს სრულიად ბუნებრივიციაა. დაახლოებით ამგვარი კომენტარები გააკეთეს ჯანლუიჯი ბუფონმა, ანდრეა პირლომ და არტურო ვიდალმა, რომელიც თავს დებს, ტურინიდან არსად მივდივარო.
მოკლედ, ფიესტა ფიესტად და პიემონტის დედაქალაქში უკვე მომდევნო სეზონზე ფიქრობენ... გონსალო იგუაინი, კუნ აგუერო, დავიდ ვილია - ეს იმ ფეხბურთელთა არასრული ჩამონათვალია, რომელთა გვარებსაც "იუვეს" უკავშირებენ. ვნახოთ...
კავანის გედის სიმღერა
ამბობენ, რომ "ინტერთან" შესრულებული ჰეთ თრიკით ედინსონ კავანი "ნაპოლის" გულშემატკივრებს ღირსეულად და თავაწეული დაემშვიდობაო. მართალია, ჩემპიონატის დასრულებამდე კიდევ სამი ტურია დარჩენილი და ურუგვაელი კიდევ ითამაშებს, მაგრამ ამ ჰეთ თრიკს მაინც სულ სხვა დატვირთვა ჰქონდა.
თავად განსაჯეთ, კავანი გახდა პირველი ფეხბურთელი, რომელსაც დიდი იტალიური ტრიოს (იუვენტუსი, მილანი, ინტერი) უკლებლივ ყველა წარმომადგენლის კარში, ერთ თამაშში სამი გოლი აქვს გატანილი. მოკლედ, გრანდთა და არა მარტო გრანდთა რისხვა, დიდი ალბათობით, "ნაპოლის" ემშვიდობება და ეს არა მარტო ნეაპოლური გუნდის, მთლიანად კალჩოს დანაკლისია - კალჩოსი, რადგან ურუგვაელს ინგლისისკენ მიუწევს გული და სულ რომ იტალიაში სურდეს დარჩენა, მისი გამოსყიდვა სერია A-ს ბინადრებს ნაკლებად ხელეწიფებათ.
უბერებელი კლოზე
"იუვენტუსის" ჩემპიონობამ მიროსლავ კლოზეს საოცარი თამაში დაჩრდილა. არადა, ერთ მატჩში ხუთი გოლის გატანა და თანაც, სერია A-ში, სახუმარო ამბავი ნამდვილად არაა. ასეთი რამ მხოლოდ რამდენიმე ფეხბურთელს გაუკეთებია, თუმცა მიროს კიდევ უფრო შორსაც შეეძლო წასვლა...
ვლადიმირ პეტკოვიჩმა გერმანელი 68-ე წუთზე შეცვალა და კიდევ ცოტა რომ დაეცლია, ვინ იცის, იქნებ მეექვსეც შეეგდო. არადა, ეს უკვე სერია A-ს რეკორდის განმეორება იქნებოდა - 6 გოლი ერთ შეხვედრაში მხოლოდ ლეგენდარულ სილვიო პიოლის აქვს გატანილი გასული საუკუნის 50-იან წლებში. ბრავო მირო, 34 წლის ასაკში გერმანელი ფორვარდი შესანიშნავ ფორმაშია და გოლებიც ძველებური სიხშირით გააქვს.
ფაქტები
XXXV ტური მეტად უხვგოლიანი გამოდგა: 10 შეხვედრაში 27 გოლი გავიდა, რაც საშუალოდ ერთ მატჩში 2.7 შედეგიანი დარტყმაა. შესაბამისად, თავი გამოიდეს ფორვარდებმა და მეკარეები არ დაინდეს. მარკო ბორიელომ (ჯენოა) და ანტონიო დი ნატალემ (უდინეზე) დუბლი შეასრულეს, გონსალო ბერგესიომ (კატანია) კი - ჰეთ თრიკი. ედინსონ კავანისა და მიროსლავ კლოზეს შესახებ ზემოთ ვრცლად ვისაუბრეთ...
ვთქვათ ისიც, რომ "იუვენტუსი"-"პალერმოს" შეხვედრაში პოლ პოგბამ არასპორტული საქციელი ჩაიდინა, წითელი ბარათი მიიღო და 3-მატჩიანი დისკვალიფიკაცია გამოიწერა. ანუ ახალგაზრდა ფრანგისთვის სეზონი დასრულებულია და მშვიდად შეუძლია გაემგზავროს დასასვენებლად. ერთი კია, "იუვეს" მესვეურებისგან საჯარიმო სანქციას ვერ ასცდება, თუნდაც ასეთ საზეიმო ვითარებაში.
ტურის სიმბოლური ნაკრები
ლობონტი (რომა) - ტოროსიდისი (რომა მარჯ), კანავარო (ნაპოლი ცენტრ), დონატი (პალერმო ცენტრ), დომიცი (უდინეზე მარცხ) - პაროლო (პარმა მარცხ), ერნანესი (ლაციო ცენტრ), ბერტოლაჩი (ჯენოა მარჯ) - ბერგესიო (კატანია მარცხ), კლოზე (ლაციო ცენტრ), კავანი (ნაპოლი მარჯ).
ყოველდღიური სპორტული გაზეთი "ლელო"
ასევე იხილეთ:
სერია A. XXXV ტური: დაბადებული სკუდეტოსთვის [VIDEO]
