"ნაპოლიში" ვალტერ მაცარის ერა დასრულდა და კლუბის პრეზიდენტი, აურელიო დე ლაურენტისი დიდ აურზაურშია. ერთი, რომ მაცარის შემცვლელია მოსაძებნი და მეორე, "ნაპოლის" მთავარმეგოლე ედინსონ კავანიზეა ნადირობა გამოცხადებული. დე ლაურენტისმა ორივე თემაზე გააკეთა კომენტარი...
ახალი მწვრთნელი
მაცარის წასვლის ამბავი დაახლოებით ერთი თვის წინ გავიგე და მას შემდეგ ახალ მწვრთნელზე განუწყვეტლივ ვფიქრობ. არ დაგიმალავთ და მქონდა კიდეც რამდენიმე შეხვედრა, რომლებმაც უშედეგოდ ჩაიარა.
ამ დროისთვის რამდენიმე კანდიდატს განვიხილავთ, რომელთა შორის ნამდვილად არის რაფაელ ბენიტესი. ესპანელი გამარჯვებული მენტალიტეტის მქონე სპეციალისტია, ისეთი, როგორიც ჩვენ გვჭირდება. ამას
რობერტო დი მატეო? - "ჩელსიში" კარგად წარმოაჩინა თავი და ნიჭიერ მწვრთნელად მივიჩნევ, მაგრამ მასზე ფსონის დადება მაინც სარისკოდ მეჩვენება. იგივეს ვიტყოდი მარსელო ბიელსაზე, რომელსაც იტალიაში მუშაობის არანაირი გამოცდილება არ აქვს. დაველოდოთ მოვლენათა განვითარებას და ყველა კითხვას გაეცემა პასუხი.
ედინსონ კავანი
ჩვენი სურვილია, რომ კავანი დარჩეს "ნაპოლიში", მაგრამ ამის ალბათობა მცირეა. ურუგვაელის მიმართ არაერთი კლუბი იჩენს ინტერესს და გაგიმხელთ, რომ ერთ-ერთ მათგანთან მოლაპარაკება უკვე დაწყებულია. დიახ, ჩვენი კლუბის სპორტული დირექტორი რიკარდო ბიგონი მანჩესტერშია და "სიტის" მესვეურებთან მოლაპარაკებას აწარმოებს. ჩვენ ედინ ჯეკოს გადმობირება გვსურს და ალბათ ხვდებით, რომ ლაპარაკი ნაწილობრივ ბარტერზეა.
კავანის სატრანსფერო ღირებულება 63 მილიონი ევროა, სხვა დეტალები კი უახლოეს პერიოდში გაცხადდება. იმედია, ჯეკო "ნაპოლიში" გააგრძელებს ასპარეზობას, მაგრამ ამით ნამდვილად არ შემოვიფარგლებით. ჩვენი მიზანი გუნდის სერიოზულად გაძლიერებაა და ეს იმ პირობებშიც შესაძლებელია, თუ კავანი დაგვტოვებს.
ყოველდღიური სპორტული გაზეთი "ლელო"
ასევე იხილეთ:
რაფაელ ბენიტესი - "ნაპოლის" ახალი თავკაცი?
