სტეფან ელ შაარავი - იმპერატორი და ფარაონი ერთად

სულ ახლო წარსულში, სტეფან ელ შაარავი "მილანის" მთავარი დამრტყმელი ძალა და იმედი იყო, თუმცა შემდეგ მძიმე ტრავმა მიიღო და საქმეები აერია. "როსონერის" ძირითად შემადგენლობაში ვეღარ დაიბრუნა ადგილი და გასულ ზაფხულს, იჯარით "მონაკოში" გადავიდა. საფრანგეთში "პატარა ფარაონს" მცირე სათამაშო დრო მიეცა, ზამთრის სატრანსფერო ფანჯრისას კი მისი იტალიაში დაბრუნება გადაწყდა. "მილანის" მთავარმა მწვრთნელმა სინიშა მიხაილოვიჩმა ელ შაარავის სამსახურზე უარი თქვა და 23 წლის ფეხბურთელი იჯარით "რომაში" აღმოჩნდა.

ახალ გუნდს ელ შაარავი კარგად მოერგო და ჯერ "ფროზინონეს" გაუტანა შესანიშნავი გოლი, ბოლო ტურში კი "სასუოლოსთანაც" გამოიჩინა თავი. რა გასაკვირია, რომ ელ შაარავი პრესის ყურადღების ცენტრში მოექცა და აქვე, მის კომენტარს გაგაცნობთ:

"მწვრთნელმა სამი ქულის მოპოვება გვთხოვა და ბედნიერი ვარ, რომ მიზანს მივაღწიეთ. ვითამაშეთ მთელი გულით, დიდი ენთუზიაზმით და ვიმსახურებდით კიდეც გამარჯვებას. "რომას" ისედაც ძლიერი შემადგენლობა ჰყავდა, მე კი აქ იმისთვის მოვედი, რომ გუნდს ჩემპიონთა ლიგის საგზურის მოპოვებაში დავეხმარო. ბოლო პერიოდში ბევრი სირთულე გადავიტანე, მაგრამ დღეს თავს შესანიშნავად ვგრძნობ და მომავალს ოპტიმიზმით ვუყურებ. გოლი ჩემს ძმას და ოჯახის წევრებს ეძღვნებათ, რომლებმაც არ დაიზარეს და ტრიბუნიდან მიქომაგეს".

ელ შაარავიმ ხაზგასმით ისაუბრა ფრანჩესკო ტოტიზე:

"ტრიგორიას ბაზაზე ხშირად ხუმრობენ, რომ ამიერიდან გუნდში იმპერატორთან ერთად, ფარაონიც ითამაშებს. ფრანჩესკო ტოტი თანამედროვეობის უდიდესი ფეხბურთელია და მასთან ერთად თამაში ჩემთვის უდიდესი პატივია. პირველი სწორედ ის დამიდგა გვერდში და საჭირო რჩევებიც მომცა. ტოტისთან ერთად ვარჯიში ფასდაუდებელი გამოცდილებაა".

ყოველდღიური სპორტული გაზეთი "ლელო"