ლიგა 1. XX ტური: სხვაობა უკვე 20 ქულაა [VIDEO]

ლიგა 1-ში ორ გუნდზე აღარ არის არაფერი სათქმელი: ერთი "პარი სენ-ჟერმენია", რომელმაც ფარფატ-ფარფატ მოუგო "ბასტიას" და უახლოეს მდევართან სხვაობა 20 ტურის მერე უკვე 20 ქულაა (50 გოლი!).

მეორე კი "ტრუაა", რომელიც ისევ მოუგებელია და "ჟერლანზეც" რომ ვერ იმარჯვებდა თუნდაც კრიზისში მყოფ "ლიონთან", ცხადზე უცხადესი გახლდათ. სამაგიეროდ, ლიონელებმა მოიოხეს გული და მართალია, თავიდან ცოტა იწვალეს, მაგრამ ბოლოსკენ ყველაფერი თავის ადგილას დააყენეს და დამაჯერებელი სხვაობით იმარჯვეს, რითაც მე-6 ადგილზე აინაცვლეს.

"მონაკომ" პირველი ტაიმი 0:2 წააგო "გაზელეკ აიაჩოსთან", მაგრამ მეორე ტაიმი "ლუი მეორის" ბინადრებისა იყო და მცველების, ფაბინიოსა და რიკარდო კარვალიოს გოლებით მონეგასკებმა ქულა გადაარჩინეს. კორსიკელებს კი უკვე 10 ტურია არ წაუგიათ.

ეს "მონაკოს" მეორე ადგილის დაკარგვად დაუჯდა, რადგან სეზონის სენსაციების მატჩში "ანჟერმა" "კაენს" აჯობა და ისევ პსჟ-ს უახლოესი მდევრის სტატუსი მოიპოვა.

სერიოზული დარტყმა მიადგა "სენტ ეტიენის" ევროამბიციებს. "მწვანეები" "ნანტთან" შეხვედრაში "სტად დე ლა ბუჟუარზე" დაეცნენ. "იადონებმა" ფრთები 77-ე წუთზე გაშალეს, როდესაც ცვლილებაზე შესულმა ისლანდიელმა კოლბეინ სიგტორსონმა გამარჯვებისა გაისროლა.

შეიკ დიაბატემ "ბორდოს" "მონპელიესთან" ვიზიტი 3-ქულიანად ააქცია და, თითქოს, ჟირონდელები მოფერიანდნენ, 4 ტურია, აღარ აგებენ.

თამაში გაახსენდა ვისამ ბენ იედერსაც, რომლის ტალანტიც, ჩვენდა სამწუხაროდ, ჯაბა კანკავას "რეიმსთან" ამოიფრქვა და მისი ჰეთ თრიკით "ტულუზმა" უსაფრთხო ზონისკენ მყარად (გა)დააბიჯა. აი, რეიმსელები კი გასავარდნ ზონას ერთი ხელის გაწვდენაზე მიუახლოვდნენ. პატივისცემისა და დამსახურების მიუხედავად, არ არის გამორიცხული, ეს ჟოსელინ გურვენეკის ბოლო მატჩი გახლდეთ გენგამელთა თავკაცის რანგში.

დიდი ამბები იყო დრამაში გადაზრდილ ბრეტანულ დერბიში "რენსა" და "ლორიანს" შორის. 41-ე წუთისთვის გუნდებს უკვე ორ-ორი გოლი ჰქონდათ გაცვლილი და მომენტები მერეც შეიქმნა, მაგრამ ეს ანგარიში ძალაში დარჩა და ვნებათაღელვაც ჩაცხრა. არადა, მოგება ნებისმიერს გვარიანად წასწევდა წინ.

ფრედერიკ ანტონეტის "ლილის" წაუგებელი სერია 7 მატჩამდე გახანგრძლივდა. ბოლო 12 შეხვედრაში კი გუნდს მხოლოდ 1 მარცხი აქვს. ლილელები "ნიცასაც" უგებდნენ, მაგრამ შვედი ლეგიონერის, ნიკლას ჰულტის ტაიმის მიწურულს გატანილი გოლით კლოდ პუელის კლუბმა გაათანაბრა.

ნიცელებს მოგება სჭირდებოდათ და ცდილობდნენ, მაგრამ მეტი გოლი ამ მატჩში აღარ გასულა.

XX ტური
პსჟ-ბასტია 2:0
გოლები: 1:0 ტიაგო მოტა (29), 2:0 მაქსველი (39)
პსჟ (4-3-3): ტრაპი - ორიე, ტიაგო სილვა (78. მარკინიოსი), დავიდ ლუისი, მაქსველი - ვერატი (63. პასტორე), ტიაგო მოტა, მატუიდი (81. ლავესი) - დი მარია, ლუკასი, იბრაჰიმოვიჩი

ლიონი-ტრუა 4:1
გოლები: 1:0 ლაკაზეტი (18), 1:1 კამიუ (67), 2:1 გეზალი (72), 3:1 ფერი (81), 4:1 ბოვიუ (90+2)
ლიონი (4-3-3): ანტონი ლოპეში - ჟალე, იანგა-მბივა, უმტიტი, მორელი - სერხი დარდერი, გონალონი (71. ფერი), ტოლისო - გეზალი, გრენიე (84. კალულუ), ლაკაზეტი (68. ბოვიუ)

ანჟერი-კაენი 2:0
გოლები: 1:0 კაპელი (41), 2:0 კეტკეოფომფონი (74)

მონაკო-გაზ. აიაჩო 2:2
გოლები: 0:1 ბუტაინი (9), 0:2 ჩიბუმბუ (31), 1:2 ფაბინიო (51-პემ.), 2:2 რ. კარვალიო (73)
მონაკო (4-2-3-1): სუბაშიჩი - ფაბინიო, უოლასი, რ. კარვალიო (84. ივან კავალეირო), კოენტრაო - ტულალანი, მოუტინიო - ელდერ კოშტა (67. ბერნარდო სილვა), ლემარი, დირარი (81. ბალული) - კარილიო

მონპელიე-ბორდო 0:1
გოლი: 0:1 დიაბატე (16)

რეიმსი-ტულუზა 1:3
გოლები: 1:0 დევო (12), 1:1 ბენ იედერი (51), 1:2 ბენ იედერი (66), 1:3 ბენ ედერი (90)
გაძევება: დევო (79)

რენი-ლორიანი 2:2
გოლები: 0:1 დიანი (4-ს.კ-ში), 0:2 ვარისი (22), 1:2 დემბელე (35), 2:2 ბოგა (41)

ნანტი-სტ. ეტიენი 2:1
გოლები: 0:1 რუ (14-პენ.), 1:1 ოდელი (29), 2:1 სიგტორსონი (77)

ლილი-ნიცა 1:1
გოლები: 1:0 ბენზია (10), 1:1 ჰულტი (45)

მარსელი-გენგამი 0:0

ბომბარდირები: 15 - ზლატან იბრაჰიმოვიჩი (პსჟ); 11 - ბილე მუკანჯო (ლორიანი), მიში ბატშუაი (მარსელი); 10 - ედინსონ კავანი (პსჟ); 7 - ატემ ბენ არფა (ნიცა), ვალერი ჟერმენი (ნიცა), ვისამ ბენ იედერი (ტულუზა).

მომდევნო ტური
15 იანვარი:
ნიცა-ანჟერი

16 იანვარი:
ტრუა-პსჟ, გენგამი-ნანტი, ტრუა-რენი, ბორდო-ლილი, გაზ. აიაჩო-რეიმსი, ბასტია-მონპელიე

17 იანვარი:
ლორიანი-მონაკო, კაენი-მარსელი, სტ. ეტიენი-ლიონი.

ყოველდღიური სპორტული გაზეთი "ლელო"