საფრანგეთის ნაკრები: "მამლები" რიბერის, ბენზემას და ვალბუენას გარეშე

ევროპის 2016 წლის მასპინძელ საფრანგეთს ძალიან სიმპათიური ნაკრები ჰყავს და ბევრის აზრით, "მამლები" ამ საშინაო ტურნირზეც იტყვიან თავიანთ სიტყვას.

დიდიე დეშამს მოსაფიქრებელიც უხვად აქვს და ახლაც რამდენიმე ისეთ ფეხბურთელს არ ან ვერ დაუძახა, რომელთა განცხადში არყოფნაც ბევრ ფანს არ მოსწონს. დღეს, 25 მარტს ფრანგები "ამსტერდამ არენაზე" ჰოლანდიას ხვდებიან, ხოლო 29 მარტს ისინი პარიზში რუსეთს უმასპინძლებენ.

მეკარეები
დიდიე დეშამს ამ პოზიციაზე პრობლემა ნამდვილად არ აქვს. უგო ლორისი ზესაიმედო გოლკიპერია და მეორე ნომრად "მამლებს" გამოცდილი სტივ მანდანდა ჰყავთ. მესამე ნომერი "რენის" ბენუა კოსტელია, რომელსაც იმედი აქვს, რომ ნაკრებში დებიუტი ექნება, მაგრამ ამის დიდი შანსი არ აქვს. ალფონს არეოლა "ვილიარეალში" შესანიშნავ სეზონს ატარებს, მაგრამ ახლა ტრავმირებულია, ხოლო სტეფან რუფიეს ადგილი დეშამმა ვერ დაინახა.

მცველები
დაცვის ხაზი, ძირითადად, გამოცდილი ვეტერანებითაა დაკომპლექტებული, თუმცა აქ ვხვდებით 22 წლის რაფაელ ვარანსაც და მის თანატოლ ლუკა დინსაც. მამადუ სახოც არ არის ასაკოვანი, მხოლოდ 26 წლისაა, მაგრამ უკვე ბევრი აქვს გამოვლილი. დანარჩენებიდან ერთი ლორენ კოშელნია 30-ის, სხვები კი - უფროსები.

საინტერესოა, რომ ნაკრებში მოხვდა "ლიონის" კრისტოფ ჟალე, რომელიც დაცვაში ლიგა 1-ის ერთადერთი წარმომადგენელია. აქვე ვხედავთ ჟერემი მატიოს, რომელსაც "მამლების" მაისურა აქამდე მხოლოდ 4-ჯერ მოურგია. ბაქარი სანია და პატრის ევრა კი ყველაზე გამოცდილები არიან.

ნახევარმცველები
ნ’გოლო კანტე "მამლების" ახალწვეულია. "ლესტერის" შუახაზელი იმდენად დამაჯერებლად გამოიყურება, რომ მას უკვე შეარქვეს "ახალი მაკელელე". თუმცა თავად 24 წლის საყრდენი მის კუმირად ლასანა დიარას ასახელებს, რომელსაც მეორე ახალგაზრდობა დაეწყო და ისიც გამოძახებულია. კანტეს დებიუტის გარდა, ყველა ელოდება დიმიტრი პაიეს თამაშსაც. 28 წლის გამთამაშებელმა ნაკრებში დაბრუნება და ახალი შანსი ნამდვილად დაიმსახურა "ვესტ ჰემში" დიდებული თამაშით.

რასაკვირველია, გამოძახებულნი არიან ბლეზ მატუიდი და პოლ პოგბაც. აქვე ვხვდებით "ნიუკასლის" მუსა სისოკოს. ერთი სიტყვით, ნახევარდაცვაში დიდი კონკურენციაა.

გარდა ამისა, აღსანიშნავია, რომ ჯოშუა გილავოგის, მაქსიმ გონალონის და ჟოფრუა კონდოგბიასთვის სივრცე, უბრალოდ, აღარ დარჩა. მორგან შნედერლენის ადგილი კანტემ აითვისა. რაც შეეხებათ მატიო ვალბუენასა და ატემ ბენ არფას, მათზე დაკვირვებას დიდი აგრძელებს და ამ ორი კრეატიული ფეხბურთელიდან მინიმუმ ერთს შანსს მისცემს. უნდა ვახსენოთ ფრანკ რიბერიც, რომელსაც იდეაში ნაკრებში დაბრუნება სურს, მაგრამ ახლა დიდია გაბუტული.

თავდამსხმელები
წინა ხაზზე ნაკრებს საფრანგეთის ჩემპიონატიდან წარმომადგენელი არ ჰყავს. ეს იმიტომ, რომ ალექსანდრ ლაკაზეტისა და ნაბილ ფეკირის მოწვევა დეშამმა საჭიროდ აღარ ჩათვალა.

ის, რომ ქარიმ ბენზემა გაურკვეველი ვადითაა დისკვალიფიცირებული, მშვენივრად მოგეხსენებათ და საფრანგეთში ახლა აქტიურად მიდის დავა-კამათი, უნდა დააბრუნონ თუ არა იგი. ფანები ორ ბანაკად იყოფიან, ზოგი ბენზემას სასწრაფოდ დაბრუნებას ითხოვს, ზოგიც - პირიქით.

ცენტრფორვარდის პოზიციაზე დეშამს ოლივიე ჟირუ და მექსიკიდან გამოწვეული ანდრე-პიერ ჟინიაკი ჰყავს. მათ გარდა, ის სამ ახალგაზრდა და მრავალმხრივ შემტევს შორის ირჩევს - მადრიდის "ატლეტიკოს" 25 წლის ანტუან გრიზმანს, "მანჩესტერ იუნაიტედის" 20 წლის ანტონი მარსიალსა და შესაშურ ფორმაში მყოფ 19 წლის კინგსლი კომანს შორის.


კანტეზე
"ის სრულყოფილი ნახევარმცველია. მას კარგად ეხერხება პოზიციის შერჩევა, ართმევაზე თამაში, ბურთის ატანა... ნ’გოლო მრავალმხრივია. თანაც, წარმოიდგინეთ, ინგლისის ჩემპიონატში, სადაც ფეხბურთელებს არანორმალური ენერგია სჭირდებათ, შეტევებში მონაწილეობის მისაღებადაც იცლის და ამასაც კი ახერხებს. კანტე "კაენშიც" არ გახლდათ ცუდი და მე მას მაშინაც ვაკვირდებოდი, მაგრამ ახლა გაცილებით დიდი ეფექტი მოახდინა და უფრო გაიზარდა, უფრო შთამბეჭდავია. იმიტომ, რომ "ლესტერზე" ვსაუბრობთ, რომელიც პრემიერლიგას ლიდერობს".

შნედერლენზე
"ეს არ ნიშნავს, რომ მე მორგანს არ ვენდობი და არ მჯერა მისი, პირიქით, ვიცი, რა შეუძლია. უბრალოდ, ამ ეტაპზე ნ’გოლოს გამოჩენა მნიშვნელოვანია, მას კარგად უნდა დავაკვირდე. ყველაფერი უნდა გავაანალიზო, სანამ საბოლოო გადაწყვეტილებებს მივიღებ".

რატომ არ არის ბენ არფა
"მე რთული გადაწყვეტილებების მიღება მიწევს. ახლა დიმიტრი პაიე რომ არ გამომეძახებინა, ამას რაიმე სხვა მიზეზი უნდა ჰქონოდა და არა მისი თამაშის გამო. დიმიტრი ნაკრებს დაუბრუნდა, რადგან თავის კლუბში დიდებულად გამოიყურება და იმსახურებს, რომ ახლა ისევ ჩვენთან ერთად იყოს. დანარჩენი მოგვიანებით გამოჩნდება".

ვალბუენაზე
"ჩვენ ყველას ვაკვირდებით. ზოგი ტრავმირებულია, ზოგი ახლად მომჯობინებული და ფორმაში არ არის. შესაბამისად, ნაკრებში ამ ეტაპზე ისინი არიან, ვინც სრულ მზადყოფნაშია და უკეთეს ფორმაშია. იმედია, მატიოც შევა ოპტიმალურ ფორმაში".

ბენზემაზე
"ამ თემაზე საუბარი უკვე დამღლელი და მომაბეზრებელია. აქ მე ვიღებ გადაწყვეტილებას და მე ვირჩევ. შესაბამისად, მე ავირჩევ და გადავწყვეტ. ორი ადამიანი იღებს გადაწყვეტილებას - ფედერაციის პრეზიდენტი და მე".

რიბერიზე
"მიხარია, რომ ფრანკი ისევ იღიმის და თამაშით სიამოვნების მიღებას აგრძელებს. ჟინი არასდროს აკლდა და ხალისიც დაუბრუნდა. მან ზედიზედ ითამაშა და "იუვენტუსთან" კარგი იყო. ვხედავ, რომ მისმა სიტყვებმა დიდი გამოხმაურება გამოიწვია, მაგრამ მეორე მხრიდანაც შევხედოთ სიტუაციას და რეალობას თვალი გავუსწოროთ - მისი სეზონი "ბაიერნში" მძიმე გამოდის, დიდი სათამაშო დრო არ ჰქონია... ამიტომ მოვლენებს წინ ნუ გავასწრებთ და ვნახოთ, რა და როგორ იქნება. ამ ეტაპზე, ჩემი აზრით, საუკეთესო შემადგენლობა მოვიხმე".

ყოველდღიური სპორტული გაზეთი "ლელო"