“აიაქსმა” ჰოლანდიის თასი მე-19-ედ ვერ მოიგო და ამსტერდამელთა ბანაკში ამ ფაქტმა ყველა ძალიან დაამწუხრა. თუმცა ამით ყველაფერი არ მთავრდება. ახლა მთელი კლუბის ყურადღება საოცნებო მესამე ვარსკვლავის ხელში ჩაგდებისკენ არის მიმართული, რაც 30-ე საჩემპიონო ტიტულის აღმნიშვნელი იქნება. შეგახსენებთ, რომ “აიაქსი” ბოლოს ერედივიზიეს ჩემპიონი შორეულ 2004 წელს გახდა. ყველას მხოლოდ ერთი რამ აკერია პირზე: შემდეგ კვირაში... ამსტერდამელთა ახალი თაობის ვარსკვლავები კრისტიან ერიკსენი (19 წლის), იან ფერტონგენი (24) და კენეტ ვერმეერი (26) 15 მაისის მატჩს დიდი იმედებით ელოდებიან. “მომდევნო კვირას” – ეს ფრაზა
მაგალითად კრისტიან ერიკსენი არ მალავს გულისტკივილს თასის ფინალში დამარცხების გამო და რევანშზე ხმამაღლა ლაპარაკობს. ჟურნალისტის შეკითხვაზე, რისი დახსომება მართებდათ მის თანაგუნდელებს კვირის მატჩიდან, კრისტიანმა დაუფიქრელად უპასუხა “არაფრის”. “რა თქმა უნდა, სამწუხაროა, რომ თასი ვერ მოვიგეთ, რადგან პირველი ტაიმი საკმაოდ მაღალ დონეზე ჩავატარეთ. იმდენი მომენტი გვქონდა, რომ შესვენებამდე შეხვედრის ბედის გადაწყვეტა ნამდვილად შეგვეძლო, - თქვა დანიელმა შემტევმა ნახევარმცველმა. - ნამდვილად ვერაფერს ვხედავ დადებითს, რაც ამ მატჩიდან დამახსომდება. ორი გოლი გავიტანეთ, თავი ღირსეულად გვეჭირა მეოტე ტაიმშიც, იმაზე უფრო მეტი ენერგია დავხარჯეთ, ვიდრე “ტვენტეს” ფეხბურთელებმა - ეს იმის ნიშანია, რომ სეზონის ყველაზე მნიშვნელოვანი მატჩისთვის, რომელიც კვირას შედგება, ჩვენ მზად ვართ”.
“აიაქსის” კიდევ ერთმა 19 წლის დანიელმა ლეგიონერმა ნიკოლაი ბოილესენმა ჟურნალისტებთან აღშფოთებულმა ილაპარაკა თავისი არცთუ სრულყოფილი ჰოლანდიურით, რამაც საკმაოდ უხერხული სიტუაცია გამოიწვია. თანამემამულის “ცოდვების” გამოსწორება ისევ ერიკსენს მოუხდა. “ახლა ჩვენ ძალიან გაბრაზებულები ვართ და ვხვდებით, რომ რეაბილიტაცია აუცილებლად გვჭირდება. მგონი არც ისე ცუდია, როცა უარყოფითი ემოციებისგან უცბად დაიცლები. ორშაბათიდან მთელ ყურადღებას მომდევნო თამაშზე გადავიტანთ, ისე კი ვეცდებით, რომ კარგად დავფიქრდეთ და ყველაფერი უახლოეს საათებში გავაანალიზოთ.
მადლობა მინდა ვუთხრა ჩვენს გულშემატკივარს, ვინც დღეს 90 წუთი გვერდით გვედგა და გვამხნევებდა მატჩის დასრულების შემდეგაც. თუკი “ამსტერდამ არენას” ისინი მომდევნო კვირას პირთამდე შეავსებენ, კიდევ უფრო მეტად დაგვეხმარებიან. აუცილებელია, რომ ტრიბუნები მათი შეძახილებით ინგრეოდეს. ჩვენი მხრიდან კი პირობას ვდებთ, მათ დადებითი ემოციების დიდ დოზას ვაჩუქებთ”.
კენეტ ვერმეერი ის ფეხბურთელია, ვისი იმედიანი განწყობაც თანაგუნდელებს ყოველთვის ბევრ რამეში ეხმარება. ის ახლაც არ კარგავს ოპტიმიზმს: “ტვენტესთან” თასის წაგება უკვე ისტორიაა. რაღაცა დოზით ჩვენთვის წაგება შეიძლება დადებით გამოცდილებადაც მივიჩნიოთ და უარყოფითადაც. ძოგადად მოვლენებს ოპტიმისტური კუთხიდან უნდა შევხედოთ. ხომ ნახეთ, მატჩის დიდი ნაწილი ვლიდერობდით და საერთოდაც, საკმაოდ კარგად ვითამაშეთ. ახლა ერთადერთი რამ დაგვრჩენია, გავიაზროთ, რომ ჩვენ ერთიანი ძალა ვართ. მომდევნო კვირას “ტვენტესთან” დაპირისპირებაში ყველაფერი ჩვენს სასიკეთოდ უნდა დავასრულოთ”.
ერიკსენისგან განსხვავებით იან ფერტონგენმა უკვე მატჩის შემდეგ მიცემულ ინტერვიუში სცადა წაგების მიზეზების გაანალიზება. ბელგიელმა აღიარა, რომ მეტოქეს უკეთესი დაცვა ჰყავს და ყურადღებაც სწორედ ამაზე გაამახვილა:
“ტვენტესთან” ჩემპიონატის შეხვედრაში საკუთარი კარის უსაფრთხოების მიზნით უფრო მეტი ყურადღებით ყოფნა გვმართებს. რა თქმა უნდა, ასეთ სტილში გარჯა ჩვენთვის დამღლელი იქნება, მაგრამ უეჭველად მოგვიწევს იმის გათვალისწინება, რომ ენსხედელებს კარგად ეხერხებათ შეტევაში თამაში. ისინი განსაკუთრებით ძლიერები არიან საჰაერო ორთაბრძოლებში. აუცილებელია ძალების მაქსიმალური მობილიზება, რათა ჩვენი უკანა ხაზი მათ შეტევებს გაუმკლავდეს. იცით რა? ერთ კვირაში ჩვენ ვერ გავხდებით სიმაღლეში 10 სმ მაღლები და შესაბამისად, სასურველი შედეგის მისაღებად ეს სასიცოცხლო კომპონენტი იქნება. კარგი იქნება, თუკი გვეცოდინება ჩვენი სუსტი წერტილების შესახებ და ვიმუშავებთ მათ გამოსასწორებლად. მომდევნო კვირას “ამსტერდამ არენაზე” ასეთი ლაფსუსები აღარ უნდა დავუშვათ”.
