სწორედ გუშინდელ ნომერში ვწერდით, რომ “ტვენტეს” შემტევი ნახევარმცველი ტეო იანსენი სულ რაღაც 3 მილიონ ევროდ “აიაქსში” გადავიდა. ის ჰოლანდიური ერედივიზიეს სეზონის საუკეთესო ფეხბურთელად დასახელდა. მეორეზე გავიდა “დენ ჰააგის” განაპირა ნახევარმცველი 25 წლის ვესლი ვერჰუკი, მესამეზე - “როდას” საყრდენი, 23 წლის რუუდ ვორმერი. გამოკითხვამ წლის სხვა ლაურეატებიც გამოავლინა: საუკეთესო ახალგაზრდა ფეხბურთელად “აიაქსის” 19 წლის ნახევარმცველი კრისტიან ერიკსენი მიიჩნიეს. გამოკითხვა ყოველი ტურის შემდეგ ტარდებოდა ძირითადად ჰოლანდიის ნაკრების ვეტერან ფეხბურთელთა შორის. შედეგები კი სეზონის დასრულებისთანავე დაითვალეს.“ტვენტესთან” ერთად ტეო იანსენს მშვენიერი სეზონი ჰქონდა
საუკეთესო ახალგაზრდა მოთამაშეთა გამოვლენა ფეხბურთის იმ ექსპერტებს მიანდეს, ვისაც სათავეში იოჰან კრუიფი უდგას. გამარჯვებულის ვინაობა ზემოთ უკვე მოგახსენეთ. აი, რა განაცხადა ერიკსენმა: “ჩემთვის ეს სეზონი მართლა დაუვიწყარი გამოდგა და ასეთად დარჩება სულ. ეს ხომ უბრალოდ დაუჯერებელია! პროფესიული კარიერის პირველი სეზონი ჩავატარე და ჰოლანდიის ჩემპიონის ოქროს გარდა საუკეთესო ახალგაზრდა ფეხბურთელის პრიზი მოვიპოვე”.
კომენტარის გაკეთება ისურვა თავად კრუიფმაც: “კრისტიანმა დაიმსახურა ეს პატივი. მეტსაც გეტყვით, მე ეს ფეხბურთელი უკვე მთელი სულითა და გულით მიყვარს. ეს აღიარება ჯერ მხოლოდ დასაწყისია და კრისტიანისთვის ის სტიმულად უნდა იქცეს, რათა გამოწუროს საკუთარი შესაძლებლობების 100%. ის დანიური საფეხბურთო სკოლის ტიპური წარმომადგენელია. არ გადავაჭარბებ, თუ ვიტყვი, რომ ნიჭით შეიძლება ის ბრაიან და მიკაელ ლაუდრუპებს შევადაროთ, მაგრამ მხოლოდ დრო გვიჩვენებს, შეძლებს თუ არა ის ლეგენდარული ძმების გზის გამეორებას”.
ლანსმა მწვრთნელი გაარკვია
როგორც იცით, “ლანსმა” იმდენი ქნა, რომ ვადამდე გაინაღდა ლიგა 1-დან დაქვეითება. ხელმძღვანელობამ რუმინელ სპეციალისტ ლასლო ბოლონის ეს არ აპატია და განუცხადა, რომ 1-ლი ივლისიდან ის უმუშევარი დარჩება. ახალი მწვრთნელის ძებნაში “ლანსს” დიდი დრო არ დაუხარჯავს. “ეკიპის” ცნობით, ლიგა 2-ში დაქვეითებულ კლუბს საფრანგეთის თასის ნახევარფინალისტ “ანჟეს” თავკაცი ჟან-ლუი გარსია ჩაიბარებს. მხარეთა შორის მოლაპარაკებათა პროცესი სულ რამდენიმე დღეში დამთავრდა. “ანჟემდე” 48 წლის მწვრთნელი “ტულონსა” და “ბორდოს” მეორე გუნდში მუშაობდა.
მვილა რენში რჩება
“რენისა” და საფრანგეთის ნაკრების საყრდენ ნახევარმცველ იან მვილას კლუბთან მოქმედი ხელშეკრულება ისედაც აკავშირებდა, თუმცა მხარეებმა ის ვადაზე ადრე გაახანგრძლივეს. მვილა ახალი კონტრაქტით “რენში” 2015 წლის ივლისამდე დარჩება. ბრეტონული კლუბის ხელმძღვანელობას შეეშინდა, რომ მის ლიდერს შეძლებული კლუბები მაცდუნებელ წინადადებებს შესთავაზებდნენ კარიერის გასაგრძელებლად. აქედან გამომდინარე ინიციატივა თანამშრომლობის გაგრძელებაზე სწორედ მათგან მოდიოდა.
პიუელი გულშემატკივრების წინააღმდეგ
“ლიონის” თავკაცმა კლოდ პიუელმა პოლიციაში განცხადება შეიტანა იმ ავაზაკების წინააღმდეგ, ვინც მის ოჯახს ფიზიკური ანგარიშსწორებით დაემუქრა. ამ შინაარსის წარწერები “ლიონის” თანამშრომლებმა მწვრთნელის სამუშაო კაბინეტის გარეთა კედელზე იპოვეს. გასაგებია, რომ ისინი მწვრთნელის მუშაობით უკმაყოფილონი არიან, მაგრამ მუქარის ტონით რისი მიღწევა სურთ, ძნელი მისახვედრია. თავად კლუბმა რასაკვირველია, მწვრთნელის მხარე დაიჭირა და დაადასტურა, რომ ის ყველაფერს იღონებს პიუელისა და მისი ოჯახის სიმშვიდის უზრუნველსაყოფად.
კანალესი რეალიდან მიდის
ესპანური “მარკას” მტკიცებით, “რეალსა” და “ვილიარეალს” შორის შეთანხმება პრაქტიკულად უკვე მიღწეულია 20 წლის შემტევი ნახევარმცველის სერხიო კანალესის ტრანსფერთან დაკავშირებით. სამეფო კლუბი მზადაა, უაღესად პერსპექტიული ფეხბურთელი ჩემპიონთა ლიგის მონაწილე მეორე ესპანურ კლუბს 10 მილიონად დაუთმოს. სერხიო “სანტიაგო ბერნაბეუზე” სანტანდერის “რასინგიდან” 2010 წლის ზაფხულში გადავიდა, თუმცა ჟოზე მოურინიოს გუნდში ფეხი ვერ მოიკიდა. ამის მიზეზი კი ობიექტურია. ესპანელის პირდაპირი კონკურენტები ხომ კაკა და მესუთ იოზილი იყვნენ. სწორედ ამიტომ იყო, რომ სერხიო პრიმერას შეხვედრებში ძირითადში სულ რაღაც 3-ჯერ მოხვდა და 3-ჯერვე შეცვალეს. ამას გარდა კანალესმა 7-ჯერ შეცვლაზე იასპარეზა და სულ სეზონის განმავლობაში მინდორზე 282 წუთი გაატარა, რამაც მის პროფესიულ განვითარებას სერიოზულად შეუშალა ხელი.
ერთსაც აღვნიშნავთ, მართალია ტრანსფერის საკითხს ჯერ არც ერთი კლუბი არ ადასტურებს, თუმცა “მარკა” რომ იშვიათად ცდება, ესეც ცნობილია.
