ამ დღეებში იოზეფ ბლატერმა რასიზმთან ბრძოლის თემაზე სალაპარაკოდ მოიცალა (თუმცა ამისთვის როდის არ სცალია?) და ისეთი რამ წამოცდა, რომ დაუყოვნებლივ მოუხდა თავის მართლება და თავისი სიტყვების განმარტება. რა გახდა მიზეზი ასეთი დაუფიქრებელი ფრაზის წამოსროლისა, არავინ იცის. ბლატერმა სიტყვა სიტყვით შემდეგი განაცხადა, რასისტული ინციდენტები ფეხბურთელებს შორის ხელის ჩამორთმევით უნდა გადაწყდესო. აი, რანაირად განმარტავს ბლატერი თავის ნათქვამს: “მხოლოდ იმის თქმა მსურდა, რომ რასიზმთან თუ დისკრიმინაციის სხვა ფორმებთან ბრძოლაში მთელი ძალებით უნდა ჩავერთოთ. ბოლო წლებში პირადად ვუდექი სათავეში ბრძოლას ამ მავნე მოვლენის წინააღმდეგ. ინგლისელ ფუნქციონერებსა და იოზეფ ბლატერს შორის შავმა კატამ რა ხანია გაირბინა და ამის მიზეზი გულშემატკივარმა მშვენივრად იცის. პირველებს რასიზმზე ფიფას პრეზიდენტის ორაზროვანი ფრაზის მოსმენაღა უნდოდათ... ინგლისის პროფესიონალ ფეხბურთელთა ასოციაციის აღმასრულებელმა დირექტორმა გორდონ ტეილორმა ფიფას შეფს გადადგომისკენ მოუწოდა. მისი თქმით, დიდი ხანია, მოვიდა დრო, რომ ბლატერმა პოსტი მიშელ პლატინის დაუთმოსო და იქვე დაამატა: “როცა უყურებ, რა დონის კორუფციაა ფიფაში, გახსენდება, რომ სწორედ მან მოუწოდა სექსუალურ უმცირესობებს, ყატარში მსოფლიოს ჩემპიონატზე დასწრებისგან თავი შეიკავეთო, უსმენ, რა დამამცირებელი ტონით ლაპარაკობს ქალთა ფეხბურთზე და რა კატეგორიულად უარყოფს ფეხბურთში თანამედროვე ტექნოლოგიების დამკვიდრებას, მიდიხარ დასკვნამდე, რომ მან თავისი დრო უკვე მოჭამა და დროა, პენსიაზე გავიდეს. ბლატერის ბოლო ფრაზა რასიზმთან ბრძოლის გზებზე ის ბოლო წვეთი იყო, რომელმაც მოთმინების ფიალა აავსო. ის დაუყოვნებლივ უნდა გადადგეს”.
ყოველდღიური სპორტული გაზეთი "ლელო"
