თვითმფრინავში მეძავთან ერთად

ფრანგულმა ავიაკომპანია Corsair-მა მიუნხენის "ბაიერნის" ვარსკვლავ ფრანკ რიბერისთან დაკავშირებული სკანდალის სათავისოდ გამოყენება გადაწყვიტა. გერმანული Bild-ის ცნობით, ავიაკომპანიამ გაყიდვაში წყვილი ბილეთები გამოუშვა, რომელთაგან ერთ-ერთი "ზაჰიას" სახელზეა გამოწერილი. თითქოსდა, რა ხეირი უნდა მოეტანა ავიაკომპანიისთვის ამ, პირველი შეხედვით, უცნაურ წამოწყებას?

მკითხველს ალბათ კარგად ახსოვს, რომ ზაჰია არის იმ ყბადაღებული არასრულწლოვანი მეძავის სახელი, ვინც პარიზის ერთ-ერთ ღამის დაწესებულებაში მუშაობდა და ვის მუდმივ კლიენტთა შორისაც საფრანგეთის ნაკრების ლიდერი ფრანკ რიბერი და "სამფეროვანთა" სხვა წევრებიც იყვნენ. შეგახსენებთ, რომ ზაჰია დეჰართან სექსუალურმა კავშირმა რობერის და მის მეგობრებს სერიოზული პრობლემები შეუქმნა – პარიზის პროკურატურა საფეხბურთო ვარსკვლავების დაპატიმრებას მოითხოვდა. საბოლოოდ რიბერიმ დაკითხვაზე ბრძანა, არ ვიცოდი, ზაჰია ასე ახალგაზრდა თუ იყო, თორემ არაფრის დიდებით გავეკარებოდიო. სამართალდამცავებმაც დაუჯერეს, ახლა კი ამ ისტორიით ფულს ხსენებული ავიაკომპანია აკეთებს: უკვე საყოველთაოდ ცნობილი მეძავის სახელს გასაყიდ ბილეთს აწერს, ხოლო მამრობითი სქესის მგზავრები ამ ეგზოტიკურ ბილეთებს სიამოვნებით იძენენ.