ევროპის ჩემპიონატზე 19-წლამდელთა შორის, რომელიც გერმანიაში იმართება, ფინალისტთა ვინაობა გაირკვა - 24 ივლისს ერთმანეთს იტალიისა და საფრანგეთის ნაკრებები შეხვდებიან.იტალიის ნაკრებმა ნახევარფინალში 2:1 დაამარცხა ინგლისი, ხოლო მეორე ნახევარფინალურ წყვილში ახალგაზრდა ფრანგებმა დიდების შური იძიეს და პორტუგალია 3:1 დაამარცხეს.
მანჰაიმში იტალიელები ორი გოლით მცველმა ფედერიკო დიმარკომ დააწინაურა. მან ჯერ პენალტი გაიტანა, შემდეგ კი - საჯარიმო. 85-ე წუთზე ალბერტო პიკიმ საკუთარ კარში ჩაჭრა ბურთი და ინგილისელებს შანსი მიეცათ, მაგრამ "აძურინის" მეტი აღარ გაუშვია და პაულო ვანოლის გუნდი ფინალშია.
იტალიის 19-წლამდელთა გუნდი ფინალში
მეორე ნახევარფინალში პორტუგალია პედრო პაჩეკომ დააწინაურა, მაგრამ მე-10 წუთზევე ლიუდოვიკ ბლაზმა გაათანაბრა. მეორე ტაიმში კილიან მბაპემ დუბლი შეასრულა და "ლურჯები" ფინალში გაიყვანა. ფრანგებს ორჯერ აქვთ მოგებული ევროპის 19-წლამდელთა ჩემპიონატი.
გაიმართა მე-5 ადგილისთვის მატჩიც, რომელიც იმით იყო საინტერესო, რომ გამარჯვებული მსოფლიოს ჩემპიონატის საგზურს ინაღდებდა (ოთხეულთან ერთად) - მასპინძელმა გერმანიამ მხოლოდ პენალტების სერიაში შეძლო ჰოლანდიის დამარცხება. შეხვედრა (120 წუთი) 3:3 დასრულდა, პენალტებში კი გერმანელებმა 5:4 იმარჯვეს და ფიფას 20-წლამდელთა მსოფლიოს პირველობაზე თამაშის უფლება მოიპოვეს.
ყოველდღიური სპორტული გაზეთი "ლელო"
