კოსოვოს ეროვნულმა ნაკრებმა არსებობის ისტორიაში პირველი ოფიციალური მატჩი ჩაატარა. დასაწყისი შესანიშნავი გამოდგა. გუნდმა გასვლაზე ფრედ ითამაშა ფინეთთან და საერთოდაც, დებიუტანტის კვალობაზე ცუდი ფეხბურთი არ აჩვენა.
დღევანდელ ჩვენს წერილში უფრო ახლოს გავიცნობთ ევროპული ფეხბურთის ახალმოსახლეს. თავადაც დარწმუნდებით, რომ კოსოვოს ნაკრებში საინტერესო ფეხბურთელები თამაშობენ და რომ ეს გუნდი ხელწამოსაკრავი მეტოქე არავისთვის იქნება.
ვალონ ბერიშა
კოსოვოს ნაკრების შემადგენლობაში ფინეთთან მატჩში ისტორიული გოლი ამპლუით ნახევარმცველმა ვალონ ბერიშამ შეაგდო. ზოგადად, ბერიშა ერთ-ერთი საუკეთესო იყო ეროვნული ნაკრების შემადგენლობაში და ფინელთა გამოცდილ მცველებს უამრავი თავსატეხი შეუქმნა.
ბერიშა
სამირ უიკანი
თავის დროზე ალბანეთის ნაკრების ძირითადი მეკარე იყო. ჯერ კიდევ მაშინ გააკეთა არჩევანი კოსოვოს სასარგებლოდ, სანამ ამ ქვეყნის ნაკრებს ბევრი კარგი ფეხბურთელი შეუერთდებოდა. საიმედი გოლკიპერია, ვისაც იტალიის უმაღლეს ლიგაში არაერთი მატჩი ჩაუტარებია.
ალბან პნიში
ძალიან სწრაფი ფეხბურთელი, რომელსაც უშუალო, დაცვითი ფუნქციების გარდა, შეტევაში კარგად ჩართვაც ეხერხება. თითქმის მთელი კარიერა შვეიცარიულ "ვოლენში" გაატარა, ახლა კი "გრასჰოპერსის" ძირითადი შემადგენლობის წევრია.
ლაერტ პაქარადა
დაიბადა და გაიზარდა გერმანიაში. იქვე დაიწყო ფეხბურთის თამაში. აღიზარდა "ლევერკუზენის" საფეხბურთო აკადემიაში. ამ დროისათვის მეორე ბუნდესლიგის "ზანდჰაუზენის" შეუცვლელი ფეხბურთელია.
ენის ალუში
გამოცდილი, 30 წლის ნახევარმცველი, რომელმაც თითქმის მთელი კარიერა მეორე ბუნდესლიგაში გაატარა. ამ დროისათვის "ნიურნბერგის" ღირსებას იცავს და ახალ კლუბთან ერთად ბუნდესლიგაში გადასასვლელად იბრძვის, სადაც არასოდეს უთამაშია.
ფანოლ პერდედაი
"ჰერტას" საფეხბურთო აკადემიის აღზრდილი ნახევარმცველი. ამ გუნდის რიგებში ბუნდესლიგაშიც არაერთხელ უთამაშია. საბოლოოდ, "ჰერტაში" თავი ვერ დაიმკვიდრა და არაერთი გუნდი შეიცვალა. მათ შორის, დანიურ "ლიუნგბიუშიც" ითამაშა. სადღეისოდ მეორე ბუნდესლიგის "მიუნხენის" ღირსებას იცავს.
ჰაკურან კრიეზუ
შვეიცარიაში დაბადებული ნახევარმცველი. მთელი კარიერის განმავლობაში ამ ქვეყანაში თამაშობს. სულ "ლუცერნში" თამაშობს. მხოლოდ ერთი სეზონის განმავლობაში მოირგო "ვადუცის" მაისურა.
ბერნარდ ბერიშა
ალბანური საკლუბო ფეხბურთის ბოლო წლების ლიდერის, "სკენდერბეუს" ლიდერის რანგში გადაბარგდა რუსული პრემიერლიგის ბინადარ მახაჭყალის "ანჟიში". დაღესტნური კლუბის ძირითადი შემადგენლობის ფეხბურთელია.
ალბერტ ბუნიაკუ
32 წლის გამოცდილი ფორვარდი. გუნდის ერთ-ერთი ლიდერი. ითამაშა გერმანულ ბუნდესლიგაში ("ნიურნბერგში"), ასევე, "კაიზერსლაუტერნში", ოღონდ მეორე ბუნდესლიგაში. ახლა შვეიცარიული "სენტ გალენისათვის" გააქვს.
მილოტ რაშიცა
კოსოვოური ფეხბურთის ერთ-ერთი მთავარი ტალანტი. გურამ კაშიას თანაგუნდელია არნემის "ვიტესში". შექმნაც ეხერხება და გოლების გატანაც. წესით, არნემულ კლუბში დიდხანს აღარ უნდა გააჩერონ.
ბერსანტ ცელინა
"მანჩესტერ სიტის" ტალანტი, ვინც დროებით "ტვენტეშია" განათხოვრებული. ცხადია, ინგლისურ კლუბში დამკვიდრება 19 წლის ცენტრალური ნახევარმცველისათვის, ვისაც თავდამსხმელობაც შეუძლია, რთულია, მაგრამ ეჭვი არავის ეპარება, რომ ის დიდი ტალანტია.
ბესარ ჰალიმი
"მაინცის"ნახევარმცველი. ძირითად შემადგენლობაში ძალიან იშვიათად ათამაშებენ. უფრო მეორე გუნდშია. ძირითადად, მეორე და მესამე ბუნდესლიგებში თამაშობდა.
ალბან მეჰა
"პადერბორნის" შემადგენლობაში მეორე ბუნდესლიგასა და ბუნდესლიგაში უთამაშია. იყო თურქეთში, სადაც "ქონიასპორის" ღირსებას იცავდა. 30 წლის რომ მოიყარა, ამ სეზონის დასაწყისში, არაბულ "ალ ნასერში" გადაბარგდა.
მწვრთნელი
ახლა, როცა გაგაცანით ფინეთთან ისტორიული მატჩის მონაწილე ყველა კოსოვოელი, ალბათ დროა, გუნდის დამრიგებელზეც ვთქვათ. 45 წლის ალბერტ ბუნიაკი კოსოვოს ეროვნულ ნაკრებს 2009 წლიდან წვრთნის. მთელი მისი სამწვრთნელო კარიერა შვედეთთანაა დაკავშირებული. როგორც ამბობენ, ის ძალიან კარგი პიროვნებაა და ბევრი კოსოვოელი ფეხბურთელი სწორედ მისი პატივისცემის გამო დათანხმდა კოსოვოს ნაკრებში თამაშს. მაგალითად, ვალონ ბერიშას ადრე სისტემატურად იწვევდნენ ნორვეგიის ნაკრებში. სამირ უიკანის ალბანეთის პირველ გუნდში უხმობდნენ, ბერსანტ ცელინას მიწვევა კი ინგლისის ახალგაზრდულ ნაკრებს სურდა.
მოკლედ, ევროპული ფეხბურთის დებიუტანტი ხელწამოსაკრავი ნაკრები არ არის და მისგან სიურპრიზები არც მომავალში უნდა გაგვიკვირდეს. მით უმეტეს, სულაც არაა გამორიცხული, სანაკრებო სამსახურში ახალი კოსოვოელებიც ჩადგნენ.
ყოველდღიური სპორტული გაზეთი "ლელო"
