ისიც შეგვიძლია ვთქვათ, რომ არმიელთა გუნდი შსს-ს უშუალო კონკურენტი იქნება, რაც ქართულ კალათბურთსაც წაადგება და საქართველოს ნაკრებსაც, რადგან ამ კლუბებში ეროვნულის წევრ-კანდიდატები არიან თავმოყრილნი.
ახალშექმნილი გუნდის შესახებ არმიელთა მთავარი მწვრთნელი ლევან მოსეშვილი გვესაუბრება.
- თავდაცვის სამინისტრომ დიდ საქმეს მოჰკიდა ხელი. ამ უწყებაში სპორტს სათანადო ყურადღებას აქცევენ. ასეც უნდა იყოს. ამის შესახებ
- ახალი სეზონისთვის მზადებას როდის შეუდექით?
- პირველი ვარჯიში 28 აგვისტოს, მარიამობას ჩავატარეთ. მას მერე რამდენიმე კალათბურთელი დაგვემატა და სადღეისოდ გუნდმა საბოლოო სახე მიიღო. ამჟამად ფიზმომზადებაზე ვმუშაობთ.
- იქნებ გუნდის შემადგენლობა გაგვაცნოთ...
- დავიწყოთ ცენტრებით: სერგო ათუაშვილი, რეზო ათანელიშვილი, დავით უგრეხელიძე. სერგო შარშან ჩემს გუნდში, "ავიამშენში" თამაშობდა, შემდეგ შსს-ში გადავიდა. ათანელიშვილი "აგრარულიდან" გადმოვიყვანეთ, ხოლო უგრეხელიძე გასულ სეზონში სლოვენიაში იყო. ახლა ფორვარდებზე. რუსთავიდან ზვიად ბაბიაშვილი და გიორგი პირველაშვილი დავიმატეთ, თსუ-დან - ვახტანგ მინაშვილი. ესპანეთიდან ჩამოვიდა მიხეილ ბერიშვილი. ასევე ჩვენთან ვარჯიშობენ ანატოლი ბოისა და ლევან მოსეშვილი. გამთამაშებლები და მათი დამხმარეები: კოტე ტუღუში, გივი ბაქრაძე და გიორგი ვახანია. კოტე შარშან "ენერჯიში" თამაშობდა, გიორგი - "ავიამშენში", ხოლო გივი ბაქრაძემ გამოცდილება ჯერ "დინამოში" მიიღო, გასული სეზონი კი ფინეთში ჩაატარა.
- შემადგენლობის გაცნობისთანავე გაჩნდა ერთი კითხვა: საჩემპიონოა?
- წინასწარ ვერაფერს ვიტყვი, რადგან საკმარისი გამოცდილება მაქვს და ვიცი, რომ სეზონის ბოლოს დიდი მნიშვნელობა ექნება კალათბურთელთა ჯანმრთელობას და სხვა არაერთ ნიუანსს.
- შემადგენლობა საბოლოოა თუ ვინმეს დამატებას კიდევ აპირებთ?
- შეიძლება ვახტანგ ნაცვლიშვილი დაგვეხმაროს. ვატოს სამსახური აქვს, თუმცა თავისუფალ დროს თუ ჩვენ გვერდით იქნება, მისი გამოცდილება ძალიან წაგვადგება. თუ ექიმები თამაშის უფლებას მისცემენ, თებერვლიდან ჩვენთან ირაკლი ხოშტარიაც ითამაშებს.
- მწვრთნელთა შტაბი როგორ დააკომპლექტეთ?
- დამეხმარებიან ვაჟა მხეიძე და ვახტანგ მოსეშვილი. თუ საშუალება გვექნება, ერთ მწვრთნელსაც დავიმატებთ. ასევე ჩვენთან იმუშავებს თემურ ხვედელიძე, რომელიც საქართველოს ნაკრების ექიმია.
- ზოგიერთ კლუბში კონტრაქტები არ ფორმდებოდა, შესაბამისად, იყო ალბათობა იმისა, რომ ესა თუ ის მოთამაშე გუნდიდან შუა სეზონში წასულიყო...
- ჩვენთან თითოეული კალათბურთელი ხელშეკრულებას გააფორმებს თავდაცვის სამინისტროსთან. კონტრაქტის ერთი ასლი სამინისტროში დაიდება, მეორე - კალათბურთის ფედერაციაში, ხოლო მესამეს თავად მოთამაშე შეინახავს.
ყოველდღიური სპორტული გაზეთი "ლელო"
