სუპერლიგის ქულათა რეკორდი ნელ-ნელა უმჯობესდება: ტუღუშმა 31 ქულა ჩააგდო, ფანჩულიძემ - 32, ფარღალავამ - 33... და მე-7 ტურში მიხეილ ფანჩულიძემ ახალი რეკორდი გამოაცხო: 35 ქულა მოაგროვა. საჯარიმო ტყორცნებს თუ არ ჩავთვლით, მიშამ შესაშური სიზუსტით ისროლა: 11-დან 8 ორქულიანი და 10-დან 5 სამქულიანი.
სწორედ მისი დამაჯერებელი თამაში გახდა თსუ-ს ბათუმური გამარჯვების საწინდარი. სტუდენტებს მომდევნო ტურში გაცილებით სერიოზული გამოცდა ელით: ჯერაც დაუმარცხებელ შსს-ს დაუპირისპირდებიან.
3 დეკემბერი, ბათუმი
ბათუმი-თსუ 86:100
28:22, 11:29, 31:19, 16:30
ბათუმი: ვ. მაისურაძე (22ქ), მიქელაძე
თსუ: გაფრინდაშვილი (9ქ, 7მ, 5პ), ფანჩულიძე (35ქ, 6მ, 3პ, 6ჩ), მარხვაშვილი (5ქ, 4პ, 4ჩ), ლონდარიძე, მათიაშვილი (18ქ, 7მ), კორკოტაძე (10ქ, 8მ), ჩიტაშვილი (12ქ, 5მ, 4პ, 3ჩ), ყველაშვილი (11ქ, 5მ, 5ფ).
მსაჯები: ზ. მაჩალაძე, მ. ანდღულაძე
კომისარი: ა. კაზანჯიანი
ასი, ასი!
მატჩის ბოლო წუთებზე ტრიბუნები სკანდირებდნენ: ასი, ასი! შსს-მ "აგრარულთან" თამაშის ბედი პირველივე ტაიმში გადაწყვიტა და შეხვედრას ბოლო პერიოდში ერთი ინტრიგაღა შერჩა - ავიდოდა თუ არა შსს 100 ქულამდე. მატჩის დასრულებას 20 წამი უკლდა, ტაბლოზე შსს-ს სასარგებლოდ 97 ქულა ეწერა. გადამწყვეტი ტყორცნა დავით ბარბაქაძემ ითავა, სამქულიანით ანგარიში დაამრგვალა (100:66) და აპლოდისმენტებიც დაიმსახურა.
4 დეკემბერი, თბილისი. სპორტის სასახლე
შსს-აგრარული 100:66
27:9, 30:10, 22:21, 21:26
შსს: დ. ბერიშვილი (5ქ, 4პ), ლაფანაშვილი (12ქ, 7მ, 5პ, 2დ), ლეჟავა (5ქ, 3პ), ნიკოლაძე (10ქ, 5მ, 5პ), კოტონი (8ქ), მარკოიშვილი (16ქ), დ. ბარბაქაძე (17ქ, 5მ), იმნაძე (11ქ, 7მ, 3ჩ, 2დ), შერმადინი (10ქ, 8მ), ტომარაძე (2ქ, 7მ), სუხიშვილი (4ქ, 5მ), დეკანოიძე.
აგრარული: ტეტელაშვილი (6ქ, 5პ), ნანიტაშვილი (5ქ), სიგუა (5ქ, 3პ), ჩაჩანიძე (3ქ), ხანიაშვილი (5ქ, 3პ), ჯავახიშვილი (22ქ, 2დ), მუმლაძე (8ქ, 5მ, 5ფ), გემაზაშვილი (2ქ), ბააკაშვილი (10), ამირხანაშვილი.
მსაჯები: ხ. გაბედავა, დ. არეშიძე.
კომისარი: თ. ქიქოძე.
ნოკაუტი ბოლო რაუნდში
"სოხუმი"-"ქუთაისის" შეხვედრის პირველ მეოთხედს თვალი ლიტველი კალათბურთელის, პეტრას ბალოჩკას გვერდით ტრიბუნაზე მჯდომმა მივადევნე. იგი ლაშა ფარღალავასთანაა ჩამოსული და საქართველოთი მეტად მოხიბლული ჩანს, თუმცა ითამაშებს, თუ არა "სოხუმში" ჯერ არ გარკვეულა. პეტრასი სოხუმელთა თამაშითაც მოიხიბლა. ამის საფუძველიც ჰქონდა: პირველ ტაიმში ფარღალავას გუნდი "ქუთაისს" მოხსნებშიც სჯობდა (23:16) და ანგარიშიც მიჰყავდა...
თუმცა მეორე ტაიმიდან ქუთათურებმა დაცვაში თამაში გააუმჯობესეს. მათი მთავარი ამოცანა "სოხუმის" ლიდერის ფარღალავას გაუვნებელყოფა იყო. თავიდან მას ბუბა ბერიშვილი მეურვეობდა და მას მერე, რაც 4 ჯარიმა მიიღო, ფარღალავა ბუბა კვიმსაძემ ჩაიბარა, ხოლო ბოლო მეოთხედში ლაშას შეჩერება გიგი ბარბაქაძეს დაეკისრა. მეოთხე პერიოდში "სოხუმს" შეტევაში ძალიან გაუჭირდა, სამაგიეროდ ქუთათურებმა დაალაგეს, ბარბაქაძისა და ბერიშვილის შედეგიანი თამაშის წყალობით სტუმრებმა მეოთხე პერიოდი 27:4 მოიგეს. არ უნდა გამოგვრჩეს მამუკა ბოლქვაძის გარჯის აღნიშვნა, რომელიც სოხუმელ-ამერიკელ მეფარეებს არაფერს უთმობდა. საბოლოოდ 91:66 იმერელთა სასარგებლოდ.
- ძალიან გაგვიჭირდა უკანა ხაზში. ამას თავისი ობიექტური მიზეზები ჰქონდა - ტრავმები აქვთ ფარღალავასა და სორდიას. ვიმედოვნებ, შემდეგი ტურისთვის მომჯობინდებიან, - აღნიშნა "სოხუმის" თავკაცმა ვაჟა კვარაცხელიამ.
"ქუთაისის" რიგებში 23 ქულის ავტორი გიგი ბარბაქაძე გახარებული იყო:
- ჩვენი გუნდი ფიზიკურადაც კარგადაა მომზადებული. ეს დღევანდელმა მატჩმაც დაადასტურა - მეოთხე პერიოდი დამაჯერებლად მოვიგეთ. ვულოცავ ამ გამარჯვებას ქუთაისის გულშემატკივრებს.
ჟურნალისტებმა ტურის საუკეთესო კალათბურთელად სწორედ ბარბაქაძე დავასახელეთ, რომელმაც 33 წუთში 23 ქულა (7-დან 3 სამქულიანი, 9-დან 6 ორქულიანი, 5-დან 2 საჯარიმო), 6 მოხსნა, 1 პასი და 2-2 ჩაჭრა-დაფარება მოაგროვა.
სოხუმი-ქუთაისი 66:91
20:21, 22:17, 20:26, 4:27
სოხუმი: ფარღალავა (28ქ, 6პ, 5ფ), შანიძე (4ქ), სორდია (12ქ, 6მ, 5ფ), კანკია, მაქქერი (2ქ), კ. დამუსი (8ქ, 12მ), რ. დამუსი (12ქ, 10მ, 2დ), კვარაცხელია.
ქუთაისი: ბაბუნაშვილი, დიდია (17ქ, 4პ, 11მ), ბ. ბერიშვილი (24ქ, 3პ), კვიმსაძე (15ქ, 5პ, 3ჩ), ბოლქვაძე (11ქ, 8მ, 5პ), გ. ბარბაქაძე (23ქ, 6მ, 2დ), კოღუაშვილი (1ქ), ქორიძე.
მსაჯები: ზ. მაჩალაძე, მ. კუპატაძე.
კომისარი: მ. რატიშვილი.
ხუთი წუთი და...
"სამედიცინო" "არმიას" თანაბრად საწყის 5 წუთში ებრძოლა, თუმცა შემდეგ ლევან მოსეშვილის შეგირდებმა დიდი უპირატესობა მოიპოვეს და დამაჯერებლადაც გაიმარჯვეს.
სამედიცინო-არმია 73:92
17:23, 13:25, 20:27, 23:17
სამედიცინო: გულისაბედაშვილი (11ქ, 7პ, 3ჩ), ყიფიანი, ჩაჩიბაია (4ქ, 7მ), ს. ლეჟავა (5ქ, 3პ), თავართქილაძე (3პ), ბექაური (12ქ, 7მ, 3დ), ახალაია (5ქ), ნინიაშვილი (16ქ, 6მ, 5ფ), კეიდია (1ქ), როდუმტა (8ქ, 10მ, 3ჩ), ჭოჭუა (6ქ), ფაიქრიძე (5ქ).
არმია: ბაქრაძე (12ქ, 5პ), ბაბიაშვილი (13ქ, 8მ), ბოისა (12ქ, 5მ, 3პ), მინაშვილი (23ქ, 9მ, 3პ), მ. ბერიშვილი (8ქ), ვახანია (5მ), ტუღუში (9ქ, 4პ), პირველაშვილი (3ქ), მოსეშვილი, უგრეხელიძე (4ქ, 5მ), ათანელიშვილი (8ქ).
მსაჯები: მ. კუპატაძე, დ. ბერეკაშვილი.
კომისარი: რ. გელოვანი.
აქაც ლოგიკა
წინა ტურში დასვენებული "ენერჯი" "დინამოს" რომ დაამარცხებდა, წინასწარ შეიძლებოდა ვარაუდი. ასეც მოხდა - 92:64 რუსთაველთა სასარგებლოდ. მატჩს სათადარიგოთა სკამიდან თვალს ადევნებდა ყოფილი დინამოელი დუდა სანაძე, რომელიც ახლახან ესპანეთიდან ჩამოვიდა (კანარის კუნძულებზე თამაშობდა). იგი კარიერას "ენერჯიში" გააგრძელებს.
დინამო-ენერჯი 64:92
14:23, 13:17, 20:25, 17:27
დინამო: ივანეიშვილი (4ქ, 4ჩ), ეძგვერაძე (11ქ, 5პ), პატარაია, თვაური (5ქ, 6მ), გლუნჩაძე, ალხანაიძე (16ქ, 8მ, 3პ), თავამაიშვილი (6ქ), ჩაველაშვილი (5ქ), გულდედავა (3ქ), კუჭავა (6ქ, 5ფ), წიკლაური (8ქ, 5მ).
ენერჯი: მაჭავარიანი (14ქ, 3პ), გ. ბერუაშვილი (2ქ), მებურიშვილი, ცეკვავა (19ქ, 7ჩ), წივწივაძე (18ქ, 6პ, 3ჩ), აბაიშვილი (6ქ, 4პ), გუგავა (6ქ), ტუჯანი (21ქ, 6მ, 5ჩ), ლამუ (6ქ, 5მ).
მსაჯები: გ. მიქელაძე, ვ. კიკოტი
კომისარი: გ. სანაძე.
გუნდი თ მ წ სხ ქ
1. შსს 6 6 0 583/443 12
2. თსუ 7 5 2 619/562 12
3. არმია 6 5 1 548/439 11
4. სოხუმი 7 4 3 566/569 11
5. ენერჯი 6 4 2 479/443 10
6. ქუთაისი 6 4 2 498/453 10
7. აგრარული 7 2 5 491/586 9
8. სამედიცინო 6 2 4 437/455 8
9. ბათუმი 6 2 4 476/503 8
10. დინამო 7 1 6 472/631 8
11. სტუ 6 0 6 493/578 6
ყოველდღიური სპორტული გაზეთი
"ლელო"
