საქართველოს ნაკრებში ყველაზე გამოცდილი კალათბურთელი 30 წლის ვლადიმერ ბოისაა. მან 1998 წლის შემდეგ ეროვნულ გუნდში 37 მატჩი ჩაატარა, მოედანზე 966 წუთი გაატარა და 424 ქულა ჩააგდო (საშუალოდ 11.5). ასე რომ, მისი მოსაზრება ქართველი გულშემატკივრისთვის საინტერესო უნდა იყოს.ვოვას თავდაპირველად ისრაელთან მატჩზე ვკითხეთ:
- შეხვედრას კრიტიკული თვალით უნდა შევხედოთ. დაცვაში ცუდად ვითამაშეთ. ამის ერთ-ერთი მიზეზი მეტოქე იყო - ისრაელის ნაკრები გამოცდილი გუნდია და შეცდომებს არავინ პატიობს. მეტოქის კალათბურთელებმა კარგად იცოდნენ ჩვენი სათამაშო სტილი და ამიტომაც გაგვიჭირდა მოგება. თუმცა, მეორე მხრივ, უნდა
- მზადების პროცესზე რისი თქმა შეიძლება?
- თამაშს ეტაპობრივად ვაუმჯობესებთ. ნელ-ნელა ვუმატებთ და ვიმედოვნებ, რომ ევრობასკეტს ოპტიმალურ კონდიციებში შევხვდებით. მანამდე კიდევ სამი თამაშია და პროგრესი უნდა გავაგრძელოთ.
- საქართველოს ნაკრების მეტოქეების მზადებასაც ადევნებ თვალს...
- უკრაინა, ბულგარეთი და ბელგია ჯგუფიდან გასვლისთვის ემზადებიან. შესაბამისად, სჯერათ, რომ საქართველოს ნაკრებს უკან მოიტოვებენ. თუ რიგითი გუნდები ასე ფიქრობენ, წარმოიდგინეთ, როგორ შეიძლება გვიყურებდეს სლოვენია - დღესვე დარწმუნებულნი არიან, რომ მოგვიგებენ. თუმცა ვინც ასე თავდაჯერებულია, ყოველთვის დაისჯება. მითუმეტეს, ისეთ გუნდთან, როგორიც საქართველოა. შეიძლება მათ ჩვენზე მეტი გამოცდილება აქვთ, მაგრამ თუ 40 წუთის განმავლობაში კონცენტრირებულნი ვიქნებით და ბოლომდე ვიბრძოლებთ, მერწმუნეთ, სლოვენიელთა ძლევა წარმოუდგენელი სულაც არ არის.
- რის ხარჯზე შეიძლება ამ გუნდის დამარცხება?
- თუ სლოვენიის პლუსი გამოცდილებაა, ჩვენი კოზირი წინა ხაზია. საქართველოს ნაკრების მეფარეები, ზაზა ფაჩულია და გიორგი შერმადინი მეტოქისას ნამდვილად სჯობიან. ვერ ვიტყვით, რომ სლოვენიელები მძიმე და მსუბუქი ფორვარდებით ქართველებს ბევრად გვჯობიან. მსროლელის პოზიციაზე საქართველოს ნაკრებში მანუჩარ მარკოიშვილია, რომლიც თანაამპლუელ სლოვენიელებს მირჩევნია.
გუნდის მწვრთნელი რომ ვიყო, სამო უდრიხს და მანუჩარს შორის არჩევანს ქართველის სასარგებლოდ დაუფიქრებლად გავაკეთებდი. ერთადერთი, სადაც სლოვენიელებს ორი ექსტრა-კლასის კალათბურთელი ჰყავთ გამთამაშებლის ამპლუაა - იაკა ლაკოვიჩი და გორან დრაგიჩი. მათ გამოცდილებით შეიძლება ვერ აჯობონ, მაგრამ ქართველი გამთამაშებლების იმედი ნამდვილად მაქვს. ამასთან, არ უნდა დაგვავიწყდეს, რომ კალათბურთს ხუთი-ხუთზე თამაშობენ.
სლოვენიელები მეუბნებიან - უნდა მოგიგოთო. ღიმილით ვპასუხობ: თქვენი გამარჯვება ჩვეულებრივი ამბავი იქნება, რადგან ჯგუფის ფავორიტები ხართ, ჩვენი მოგება კი ხმაურიან მოვლენად იქცევა და ამიტომ კარგად მოემზადეთ-მეთქი.
- მაინც რა მნიშვნელობის მოვლენაა საქართველოს ნაკრების ევროპის ჩემპიონატზე თამაში?
- ევრობასკეტზე პირველად გავალთ. ევროპული საზოგადოების წინაშე დებიუტი გვაქვს და ძალიან მნიშვნელოვანია, თავი დადებითი კუთხით წარმოვაჩინოთ. ეს ჩვენს ნაკრებს ხელეწიფება. აქამდე ყოველთვის გვქონდა დანაკლისი: შარშან ტრავმის გამო ნაკრებს მე ვერ დავეხმარე, შარშანწინ - მარკოიშვილი, უფრო ადრე სანიკიძე არ გვყავდა... საბედნიეროდ, წლეულს ყველაზე მთავარი შეჯიბრებისთვის შეკრებას ყველა მწყობრში ხვდება.
- ორიოდე სიტყვით გასულ სეზონსაც შევეხოთ...
- შარშან ზაფხულში მუხლის მძიმე ტრავმა მივიღე და სერიოზული ოპერაცია გადავიტანე. აქედან გამომდინარე, ამ სეზონში დიდი საქმის გაკეთება რთული იყო. ჩემი მთავარი ამოცანა ტრავმის შემდეგ სრულყოფილი რეაბილიტაცია და სასურველ სათამაშო კონდიციებში ჩადგომა გახლდათ. მოხარული ვარ, რომ სეზონი ისე ჩავამთავრე, მუხლს არ შევუწუხებივარ.
- მომავალი კლუბის საკითხი ხომ არ გადაგიწყვეტია?
- ჯერ უკლუბოდ ვარ. შემოთავაზებები მაქვს, მაგრამ არა იმდენად სეროიოზული რომ კონტრაქტზე ვიფიქრო. გუნდები ევროპის ჩემპიონატს ელიან, ბევრი რამ მის დასრულების შემდეგ გაირკვევა. ახალი გუნდის ძიებისას რამდენიმე საკითხს გავითვალისწინებ: გუნდს უნდა ვჭირდებოდე და ვითამაშო კიდეც... ევროლიგაზე გამოვა, თუ სხვა შეჯიბრებაში ეს პირველხარისხოვანი არ არის.
ყოველდღიური სპორტული გაზეთი "ლელო"
