"ატლანტა ჰოუქსმა" 1 აპრილს გამთენიისას ფილადელფიაში წააგო. ზაზა ფაჩულიას გუნდი ბოლო მეოთხედის წინ 4 ქულით იგებდა, მაგრამ მასპინძლებმა გადამწყვეტ მომენტში იძალეს და საბოლოოდ 95:90 გაიმარჯვეს. ზაზა ფაჩულია ტრადიციულად ხუთეულში იყო, თუმცა ამჯერად თავი ჩვეულად ვერ გამოიჩინა. ქართველმა ცენტრმა 24 წუთი დაჰყო მოედანზე და 4 ქულასთან ერთად 7 მოხსნა დააგროვა. ზაზამ 7 ორქულინიდან 2 ჩააგდო, სხვა სტატისტიკური მაჩვენებელი მას არ ჰქონია.
კარგად გაისარჯა ზაზას ოპონენტი - გამოცდილი ელტონ ბრენდი, რომელმაც ფილადელფიელებს 25 ქულა, 10 მოხსნა, 5 პასი და 3 დაფარება შესძინა.
31 მოგებითა და 23 მარცხით "ატლანტა" საკუთარ, სამხრეთ–აღმოსავლურ დივიზიონში მესამე ადგილზეა, კონფერენციაში კი მეექვსეზე.
ატლანტელებს მცირე შესვენება ელით. ფაჩულიას გუნდი მომდევნო მატჩს 4 აპრილს, შინ "შარლოტთან" გამართავს.
gbf.ge
