***
- მთავარი მწვრთნელის რანგში ევროტურნირებზე პირველ მატჩს ვატარებდი და ძალიან ვღელავდი. მსურდა, დასამახსოვრებელი დებიუტი გამომსვლოდა. მოხარული ვარ, რომ ჩემმა შეგირდებმა ბერძნულ "პანელინიოსთან" მატჩში ენერგია არ დაიშურეს და ყველაფერი კარგად დასრულდა, - თქვა "კანტუს" თავკაცმა ანდრეა ტრინჩიერიმ.
"პანელინიოსის" მწვრთნელმა ათანასიოს სკურტოპულოსმა კი დასძინა:
- სამი პერიოდი კარგად ჩავატარეთ,
მწვრთნელების სიტყვებიდან შეხვედრის შესახებ ზოგადი სურათი შეგექმნებოდათ: "კანტუმ" მეოთხე პერიოდი - 20:9, ხოლო მატჩი 72:57 მოიგო.
მარკოიშვილმა ნაყოფიერად იმუშავა: 23 წუთში 8 ქულა (9-დან 3 ორქულიანი, 4-დან 2 საჯარიმო), 4 მოხსნა, 5 პასი და 1 ჩაჭრა "გაიფორმა". მას თავიდან სროლა კარგად წაუვიდა, მოედანზე შესვლისთანავე 5 ქულა ჩააგდო და თანაგუნდელები 15:6 დააწინაურა, თუმცა შემდეგ რამდენიმე ორქულიანი ააცილა და, ალბათ, ამიტომაც, მეოთხე პერიოდში ძირითადად თანაგუნდელთა პასებით მომარაგებაზე ზრუნავდა.
"კანტუს" შეტევის ლიდერად ბელგიელი უკანახაზელი ჯონათან ტაბუ მოგვევლინა, რომელმაც 17 ქულა ჩააგდო.
მომდევნო კვირას, 23 ნოემბერს "კანტუ" თურქულ "გალათასარაის" ეწვევა. პირველ ტურში სტამბოლელებმა "გრონინგენი" ჰოლანდიაში 66:65 დაამარცხეს.
***
ევროთასი მოულოდნელი ძლევით გახსნა ტორინ გრინის "გრან კანარიამ". კუნძულელებმა საკუთარი გულშემატკივრის წინაშე უკრაინულ "ბუდიველნიკთან" 58:62 წააგეს.
გრინის გუნდმა მატჩი ცუდად დაიწყო, საწყის ორ მეოთხედში მხოლოდ 11-11 ქულა ჩააგდო. მეორე ტაიმიდან კანარელებმა თამაში გამოასწორეს და უკრაინელებს ბოლო წუთებამდე "კუდში" სდიეს, თუმცა საბოლოოდ 4-ქულიანი სხვაობით დამარცხდნენ.
საქართველოს ნაკრების უკანახაზელი ტორინ გრინი სასტარტო ხუთეულში იყო, 6-დან 3 სამქულიანი, 2-დან 2 საჯარიმო ჩააგდო და 11 ქულას გამორჩა. მასპინძელთაგან მასზე მეტი მხოლოდ სავანემ მოაგროვა - 13 ქულა.
ამავე ჯგუფის მეორე მატჩში ლიტვურმა "შიაულიაიმ" შინ ჩერნოგორუილ "ბუდუჩნოსტთან" წააგო (76:97). 23 ნოემბერს "გრან კანარია" ჩერნოგორიაში ჩავა.
***
ლამაზი ანგარიშით გაიმარჯვა ტაირონ ელისის "ესტუდიანტესმა" - ბერძნულ პაოკ-ს 88:77 აჯობა. საქართველოს ნაკრების ყოფილმა წევრმა ელისმა 25 წუთში 6 ქულა, 3 მოხსნა და 2 ჩაჭრა ჩაიწერა.
"ესტუდიანტესის" თანაჯგუფელმა იტალიურმა "ბენეტონმა" ფრანგულ "როანს" სძლია - 67:61.
***
ევროჩელენჯის ჯგუფური ეტაპის პირველი მატჩის გასამართავად ესტონური "ტარტუ როკი" შვეიცარიაში ჩავიდა. თუ "როკერები" ევროტურნირებში ყოველწლიურად, თანაც წარმატებულად ასპარეზობენ, "ლუგანო" 2002 წლის შემდეგ პირველად გამოვიდა ევროასპარეზზე. ამის მიუხედავად, შვეიცარიელებმა მატჩის მეორე მეოთხედი დამაჯერებლად ჩაატარეს, 10 ქულის სხვაობით დაწინაურდნენ და საბოლოოდ გაიმარჯვეს კიდეც - 73:61.
საქართველოს ნაკრებისა და "როკის" გამთამაშებელმა, გიორგი ცინცაძემ 25 წუთი ითამაშა, 10 ქულა, 4 მოხსნა, 3 პასი და 2 ჩაჭრა მოაგროვა.
მატჩის ბომბარდირი ლუგანოელი აბუკარი გახდა, რომელმაც 26 ქულას მოუყარა თავი.
მატჩისშემდგომ პრესკონფერენციაზე მწვრთნელმა, ინდრიკ ვესპაანუმ გიორგი ცინცაძე იახლა. ქართველმა ხაზი გაუსვა მასპინძელთა დამაჯერებელ თამაშს დაცვაში:
- "ლუგანო" დაცვაში შესანიშნავად გაისარჯა. ამის მიუხედავად არაერთხელ აღმოვჩნდით თავისუფალ სატყორცნ სიტუაციაში, მაგრამ ვერ გამოვიყენეთ. გადამწყვეტ მომენტებში რამდენიმე ბურთის ვერჩაგდებამ საბოლოო მარცხი განაპირობა. მომდევნო მატჩებში ერთი-ორად უკეთესად უნდა ვითამაშოთ, რადგან ჯგუფიდან მხოლოდ ორი გუნდი გადის და თითოეულ ქულას დიდი ფასი აქვს.
ინდრიკ ვესპაანუმ ერთი თქვა: კარგად მხოლოდ პირველ პერიოდში (17:17) ვითამაშეთო.
C ჯგუფის მეორე მატჩში ბულგარულმა "აკადემიკმა" პორტუგალიის "ბენფიკას" იოლად სძლია - 92:71.
ევროჩელენჯის მეორე ტურის მატჩები 23 ნოემბერს გაიმართება, "როკი" "აკადემიკს" უმასპინძლებს, "ბენფიკა" - "ლუგანოს".
