ჰოდა, ქართველი ცენტრის გადაყვანით "ინდიანა
გაზეთ "ჰუპსვორლდში" ფაჩულიასთან დაკავშირებით გაცილებით კონკრეტული მასალაა - ზაზა "ატლანტას" აწმყოზეც ლაპარაკობს და გუნდში საკუთარ ფუნქციაზეც.
"NBA-ში მოხვედრილ კალათბურთელთა უმეტესობა მანამდე თავის გუნდში მთავარ როლს თამაშობდა (კოლეჯების ლიგასა თუ ევროპაში). NBA-ში კი ბევრს უწევს სათადარიგო მოთამაშის სტატუსით დაკმაყოფილება. შესაბამისად, რამდენადაც ეფექტურად უნდა ითამაშოს სათადარიგომ მათი სახელი დარბაზებში იშვიათად ისმის. ისინი უმეტასად შავი სამუშაოთი არიან დაკავებული და ამ მხრივ გუნდს სერიოზულადაც ეხმარებიან.
"ატლანტა ჰოქსის" ცენტრი, ზაზა ფაჩულია მეექვსე სეზონია, რაც გუნდის ფარქვეშეთს ამაგრებს. მან 2005-დან 2007 წლებში 150 მატჩიდან 125-ში სასტარტოში ითამაშა, საშუალოდ 11.9 ქულას და 7.4 მოხსნას აგროვებდა.
2007 წელს "ჰოქსმა" დრაფტზე ელ ჰორფორდი აიყვანა და ფაჩულიას სათამაშო დრომაც საგრძნობლად იკლო: 30 წუთიდან 15-მდე შემცირდა. ზაზა ამბობს, რომ მეტი დრო ნამდვილად სურს, მაგრამ მისთვის მთავარი მაინც გუნდის ინტერესებია.
- სასტარტოში? ხუთეულში თამაში ვის არ უნდა. არ მეგულება კალათბურთელი, რომელიც საკუთარი სათამაშო დროით კმაყოფილია, მოედანზე 40 წუთსაც რომ ატარებდეს, 45 წუთი ენდომება. ეს ნორმალურია.
"ატლანტაში" სათადარიგოს როლთან დაკავშირებით ქართველი ამბობს:
- ჩვენი მწვრთნელი და გუნდის ხელმძღვანელობა თვლის, რომ მატჩში სათადარიგოთა სკამიდან უნდა ჩავერთო. დიდი ხანია "ატლანტაში" ვარ და კარგად ვაცნობიერებ, გუნდს რა სჭირდება. მთავარია, "ჰოქსს" გამოვადგე და დიდი მნიშვნელობა არ აქვს სათადარიგო ვიქნები, თუ სასტარტო. თუ კალათბურთელი საკუთარი როლით უკმაყოფილოა, თავად მისთვისაა ცუდი და წარმატების მიღწევა გუნდისთვისაც რთულდება.
ფაჩულიას მიაჩნია, რომ "ჰოქსის" ხელმძღვანელობას კარგი შემადგენლობა ჰყავს შეკრებილი, რომელსაც პლეი ოფშიც წარმატებით შეუძლია თამაში. თუმცა ამისთვის აუცილებელია რეგულარული ეტაპის დამაჯერებლად ჩატარება და ბოლო ორი სეზონის განმავლობაში დაშვებული შეცდომების გათვალისწინება.
- შარშან და შარშანწინ აღმოსავლეთის კონფერენციის ნახევარფინალში ვითამაშეთ. წლეულს შედეგის გაუმჯობესებას ვაპირებთ. ეს ფინალში გასვლას გულისხმობს, რისთვისაც აუცილებელია ყველა კალათბურთელმა თავისი ფუნქცია კარგად გაიაზროს და საქმე გულმოდგინედ შეასრულოს. ფაქტია, რომ უკეთესად ავთამაშდით, რაც მეტი ქულის ჩაგდებაში არ გამოიხატება - მოგებული მატჩების უმეტესობაში 30-ზე მეტ შედეგიან გადაცემას ვასრულებთ. სწორედ ამის გამო შეიძლება ითქვას, რომ შეტევა "ატლანტას" მთავარი იარაღია.
მიმდინარე სეზონის მეოთხედი მიილია, "ჰოქსს" კი საკადრო პრობლემები მიეძალა. იდაყვის ტრავმა აქვს კაპიტან ჯო ჯონსონს, რომელიც იანვრამდე ვერ ითამაშებს. ჯოს ადგილი ვეტერანმა მო ევანსმა დაიკავა, მაგრამ ოპერაციის შემდეგ ის 100 პროცენტით მზად არ არის. მსუბუქმა ფორვარდმა მერვინ უილიამსმა მუხლის ტრავმის გამო ოთხი მატჩი გამოტოვა...
- მე და ჯო ჯონსონი "ჰოქსში" ერთდროულად გადმოვედით. მას მერე უამრავი მატჩი ჩავატარეთ და არ მახსოვს ჯოს ტრავმის გამო დიდი ხნით დაესვენოს. ამჯერად უჩვეულო სიტუაციასთან გვაქვს საქმე. თუმცა აქვე უნდა ითქვას, რომ მის არყოფნაში რამდენიმე კალათბურთელი ლიდერის ფუნქციებს კარგად ართმევს თავს - სმიტი, ჰორფორდი, უილიამსი... სასიამოვნოა თანაგუნდელთა პროგრესის ხილვა. გუნდური თამაშის წყალობით არაერთი მატჩი ეფექტურად მოვიგეთ: სტუმრად "ორლანდოსთან", "ნიუ ჯერსისთან"... ასევე უნდა განვაგრძოთ და ჯონსონი რომ შემოგვიერთდება, მეტოქეთათვის უფრო სახიფათონი ვიქნებით, - განაგრძობს ზაზა. საინტერესოა, რომ ჯომ 2007-10 წლებში მხოლოდ 9 მატჩი გამოტოვა.
ფაჩულიას მოვუსმინოთ:
- ყველა კალათბურთელს ესმის, რომ ტრავმა სპორტის ნაწილია. NBA-ში რთული გრაფიკია, სეზონიც გრძელია და ტრავმის ალბათობაც არსებობს. თუმცა, აწყობილ გუნდს ერთი კალათბურთელის დაკლება არ უნდა დაეტყოს. "ატლანტა" სწორ გზას ადგას და იმედი მაქვს ასეც განაგრძობს, წლეულს მაინც ვითამაშებთ ფინალში."
ყოველდღიური სპორტული გაზეთი
"ლელო"
