ზაზა ფაჩულია კარიერას NBA-ს ახალ გუნდში გააგრძელებს

ზაზა ფაჩულია "დალას მავერიკსში" გადავიდა. როგორც საქმის ირგვლივ მომხდარი ამბები ცხადყოფს, ქართველი კალათბურთელი დალასელთა ძირითადი ცენტრი იქნება.

ფაჩულიას ტეხასურ კლუბში გადასვლა ჯერ ოფიციალურად არ შემდგარა, თუმცა ეს რომ ასე მოხდება, გარდაუვალი ამბავია. ყველა სოლიდურმა გამოცემამ აღნიშნული ტრანსფერი დაადასტურა.

ფაჩულიას ტრანსფერი რამდენიმე გარემოებამ განაპირობა. ერთი, რომ ქართველის გუნდმა "მილუოკი ბაქსმა" ახალგაზრდა და მზარდი ცენტრი გრეგ მონრო დაიმატა და მეორეც - "დალასს" ბოლო წამს უარი უთხრა NBA-ს ერთ-ერთმა საუკეთესო მეფარე დეანდრე ჯორდანმა, ხოლო კიდევ ერთმა მეფარე ტაისონ ჩანდლერმა "მავერიკსიდან" "ფინიქსს" მიაშურა.

ჯორდანი "დალასში" უკვე ვარჯიშობდა და საიმისოდ ემზადებოდა, რომ მომავალ სეზონში დირკ ნოვიცკისთან ერთად გაემაგრებინა დალასელთა ფარი.

"ლოს ანჯელეს კლიპერსმა", სადაც დეანდრე ჯორდანმა გასული სეზონი გაატარა, კალათბურთელს იგივე თანხა შესთავაზა, რასაც მას "დალასი" აძლევდა და ჯორდანიც "კლიპერსში" დარჩა.

ცენტრის გარეშე დარჩენილმა დალასელებმა გუნდში ზაზა ფაჩულია აიყვანეს, რის სანაცვლოდაც "მილუოკის" მომავალი წლის დრაფტის მეორე რაუნდის არჩევანის უფლება დაუთმეს და თუკი სეზონის დაწყებამდე კიდევ რომელიმე ცენტრს არ დაიმატებენ, ქართველი ლეგიონერი ლიგის ერთ-ერთი უძლიერესი გუნდის ძირითადი მეფარე იქნება.

ფაჩულიას "დალასში", ცხადია, ის კონტრაქტი გაჰყვა, რაც "მილუოკიში" ჰქონდა. ქართველ ცენტრს მილუოკელებთან 4-წლიანი კონტრაქტის ბოლო სეზონი უნდა ეთამაშა და ასე იქნება "დალასშიც". 2015-16 წლების სეზონის ბოლოს ზაზა თავისუფალი აგენტი გახდება და კარიერას იმ გუნდში გააგრძელებს, რომელიც მას ახალ კონტრაქტს გაუფორმებს.

"ზაზა ფაჩულია კონკურენტუნარიანი მოთამაშეა. ის უდიდესი ნაწილი იყო ჩვენი გუნდისა, - განაცხადა მილუოკელთა მთავარმა მწვრთნელმა ჯეისონ კიდმა. - მძიმე ტრავმის შემდეგ მას შესანიშნავი სეზონი ჰქონდა და გუნდისთვის ისეთი მოთამაშე და პერსონა იყო, უკეთესს რომ ვერ ისურვებდი".

მიუხედავად ამისა, მილუოკელები შეელიენ ქართველ ცენტრს და მომავალ სეზონში ცენტრის პოზიციაზე გრეგ მონრო და მისი შემცვლელი ჯონ ჰენსონი ეყოლებათ. ფაჩულია კი დირკ ნოვიცკისთან ერთად "დალას მავერიკსის" ფარქვეშეთს გაამაგრებს.

წყარო: gbf.ge