საქართველოს ჭაბუკთა ნაკრების უკანახაზელი მერაბ ბოქოლიშვილი აგვისტოში იტალიურ "ეარ აველინოში" რომ გადავიდა, ჩვენი გაზეთის მკითხველს კარგად მოეხსენება. იგი აქამდე 19-წლამდელთა გუნდში თამაშობდა. სწორედ მერაბის დახმარებით გადალახეს აველინოელმა ახალგაზრდებმა იტალიის ჩემპიონატის რეგიონული ეტაპი. ამჟამად ისინი მეორე რაუნდში თამაშობენ და წარმატების შემთხვევაში, გაზაფხულზე იტალიის ჩემპიონატის ფინალურ ეტაპზე საუკეთესო გუნდებს დაუპირისპირდებიან. მეორე რაუნდის პირველ მატჩში "აველინოს" 19-წლამდელებმა "ფრანკავილასთან" 54:74 წააგეს. გამოცემა "ტუტობასკეტში" ვკითხულობთ: "ფრანკავილა" ერთ ეპიზოდში 26 ქულის სხვაობით დაწინაურდა, თუმცა "აველინოს" ქართველი უკანახაზელის, მერაბ ბოქოლიშვილის პერიმეტრიდან დამაჯერებელი თამაშის წყალობით სხვაობა 15 ქულამდე
ამ სტატიის დაწერა არა 19-წლამდელთა ჩემპიონატის მატჩმა, არამედ გაცილებით მნიშვნელოვანმა მოვლენამ განაპირობა - ახალგაზრდულ გუნდში კარგი თამაში მხედველობიდან არ გამორჩენია "აველინოს" მთავარი გუნდის თავკაც ვინჩენცო ერკოლინოს და ბოქოლიშვილს "აველინოს" განაცხადში შეყვანა გადაწყვიტა. ახალგაზრდა მერაბი (1992 წელსაა დაბადებული) იტალიის ჩემპიონატის მე-16 ტურში, 23 იანვარს "ბენეტონთან" მატჩში "აველინოს" სათადარიგოთა სკამზე გამოჩნდება.
იმედი დავიტოვოთ, რომ მწვრთნელი მას თამაშშიც ჩართავს. თუმცა, მთავარი ის კი არ არის, როდის შედგება ბოქოლიშვილის დებიუტი სერია A-ში, არამედ უბრალო ფაქტი: მან თავისი შრომით, 18 წლის ასაკში, იტალიის ჩემპიონატის გუნდის განაცხადში მოხვედრა დაიმსახურა და ადრე თუ გვიან, აუცილებლად ითამაშებს.
შეგახსენებთ, რომ თავის დროზე მანუჩარ მარკოიშვილიც ასე იწყებდა - 2002 წელს "ბენეტონში" გადასვლის შემდეგ საწყისი ორი თვე აკლიმატიზაციისთვის დასჭირდა, ხოლო სეზონის მეორე ნახევარში რეგულარულად უწევდა თამაში. იმავე სეზონში "ბენეტონთან" ერთად ევროლიგის ფინალში "ბარსელონას" წინააღმდეგ იასპარეზა.
.
