ზაზა ფაჩულიას ეფექტური პასი და მორიგი ორმაგი დუბლი "ვაშინგტონთან" [VIDEO]

მე-14 ორმაგი დუბლი ზაზა ფაჩულიასგან. NBA-ს მიმდინარე სეზონის რიგით 24-ე შეხვედრაში "დალას მავერიკსის" ქართველმა ცენტრმა ქულებში და მოხსნებში კვლავ 10-ქულიან ზღვარს უწია და მორიგი გამორჩეული შედეგი დააფიქსირა. დასანანი ისაა, რომ დალასელებმა წააგეს, ქართველმა კალათბურთელმა კი ბოლო მეოთხედში თითქმის არ უთამაშია.

ფაჩულიას ორმაგი დუბლი უკვე მესამე პერიოდში ჰქონდა და აღნიშნული მეოთხედის დასრულებამდე 4:26 წუთით ის რეიმონდ ფელტონმა შეცვალა. ბოლო პერიოდში ზაზას არ უთამაშია. ის მწვრთნელმა მატჩის დასრულებამდე 3 წამით ადრე შეიყვანა მოედანზე, თუმცა ისე გაიყვანეს, თამაშში არ ჩართულა.

შესაბამისად, ზაზამ მხოლოდ 23 წუთი ითმაშა. მეტოქე ის "ვაშინგტონი" გახლდათ, რომელიც 6 დეკემბერს ამერიკის დედაქალაქში 116:104 დაამარცხეს. "ვიზარდსმა" დალასელებს რევანში აუღო და ტეხასურ მატჩში 114:111 დაამარცხა. მასპინძლებმა დასკვნითი პერიოდი 15 ქულით მოიგეს, მაგრამ მოსაგებად ეს საკმარისი არ აღმოჩნდა, რაკი მესამე მეოთხედი ჩააგდეს. აღნიშნულ 12-წუთეულში ვაშინგტონელებმა "დასალსს" ყველაფერში აჯობეს და 39:22 იძალეს.

ფაჩულია სასტარტო ხუთეულში იყო და მოედანზე გატარებულ 23 წუთში 8-დან 5 ორქულიანი ჩააგდო. საბოლოოდ ზაზამ 10 ქულა, 12 მოხსნა და 3 პასი მიითვალა, ბურთი კი 2-ჯერ დაკარგა და 1 ჯარიმა მიიღო. დალასელთაგან საუკეთესო ვესლი მეთიუზი იყო 28 ქულით. 21 ქულა დააგროვა ჯეიჯეი ბარეამ, ხოლო დირკ ნოვიცკიმ 31 წუთში 13 მიითვალა.

14 მოგებითა და 11 მარცხით "დალასი" დასავლეთ კონფერენციაში "მემფისთან" 5-6 ადგილებს იყოფს. ამ გუნდებს გადაასწრო "ლოს ანჯელეს კლიპერსმა", რომელსაც 14 მოგება და 10 მარცხი აქვს. მომდევნო მატჩი ფაჩულიას გუნდს 14 დეკემბერს, დალასში "ფინიქსთან" ელის.

რაც შეეხება ორმაგ დუბლებს, ფაჩულია ისევ მე-3 ადგილზე იმყოფება. დღევანდელი დაბლით ზაზამ მინიმუმამდე შეამცირა ჩამორჩენა ოკლაჰომელ რასელ ვესტბრუკთან, რომელსაც 15 ორმაგი დუბლი აქვს მიმდინარე სეზონში შესრულებული. 13 ორმაგით ზაზას კვალში უდგას ნიუორლეანელი ვარსკვლავი ენტონი დევისი.

მომზადებულია gbf.ge-ს მიხედვით