ფაჩულიამ სეზონის მე-16 ორმაგი დუბლი პაუ გასოლთან ორთაბრძოლაში შეასრულა [VIDEO]

ზაზა ფაჩულიას "დალას მავერიკსმა" დღეს, გამთენიისას შინაურ "ეარლაინ სენთერში" "ჩიკაგო ბულსს" უმასპინძლა და ქართველი ცენტრის დიდი თანამონაწილეობით 118:111 გაიმარჯვა. მატჩის დასრულებამდე 2 წუთით ადრე ანგარიში თანაბარი - 108:108 იყო, დასკვნით მონაკვეთში კი მასპინძლებმა მეტი მობილიზება გამოავლინეს და სეზონის მე-17 გამარჯვება მოიპოვეს.

ამ მატჩში ფაჩულიას უშუალო ოპონენტი გასული ევრობასკეტის ტრიუმფატორი და საუკეთესო მოთამაშე პაუ გასოლი გახლდათ, რომელსაც ქართველმა ტოლი არ დაუდო და მეტიც - აჯობა.

გასოლმა ბოლო მატჩებში სიმარჯვე გამოავლინა და ფაჩულიას ორმაგ დუბლებში დაეწია. ამ მატჩამდე ორივეს 15-15 დაბლ-დაბლი ჰქონდა შესრულებული. დღევანდელ მატჩში კი ფაჩულია იყო ერთადერთი კალათბურთელი, რომელმაც ორმაგი დუბლი - 17 ქულა და 12 მოხსნა შეასრულა, გასოლის ანგარიშზე კი 18 ქულა და 9 მოხსნა დაგროვდა.


აღსანიშნავია, რომ ფაჩულიასთვის 17 ქულა მეორე საუკეთესო შედეგია მიმდინარე სეზონში. 13 ნოემბერს ზაზამ "ლეიკერსთან" 18 ქულა მიითვალა. დღევანდელ მატჩში ქართველმა ცენტრმა 13-დან 6 ორქულიანი და 5-დან 5-ივე საჯარიმო ჩააგდო. 17 ქულასა და 12 მოხსნასთან ერთად ზაზამ 1 პასი მიითვალა, 5-ჯერ დაჯარიმდა და ბურთი 1-ჯერ დაჯარგა.

საუკეთესო შედეგი ჯე ჯეი ბარეამ დააფიქსირა, რომელმაც 26 ქულა და 5 პასი მიითვალა. აღსანიშნავია, რომ პუერტორიკოელ ვეტერანს წარმატებული სერია უდგას. წინა მატჩში მან 32 ქულა მიითვალა. ის ღირსეულად ცვლის დალასელთა დაშავებულ ძირითად გამთამაშებელ დერონ უილიამს.


16 ორმაგი დუბლით ფაჩულია ამ ნომინაციაში ლიგაში მე-4 ადგილზეა. ფაჩულიას გადაასწრო და ახლა მე-2 ადგილზეა ნიუორლეანელი სუპერვარსკვლავი ენტონი დევისი, რომელმაც დღეს თავის მე-19 დაბლ-დაბლი გაიფორმა. მე-3-ზე კი ოკლაჰომელი ვარსკვლავბიჭუნა რასელ ვესტბრუკია 18 ერთეულით

17 მოგებითა და 13 მარცხით "დალასი" დასავლეთ კონფერენციაში მე-4 ადგილს ანალოგიური შედეგის მქონე "ლოს ანჯელეს კლიპერსთან" იყოფს. მომდევნო მატჩი ფაჩულიას ყოფილ თანაგუნდელებთან ელის. 29 დეკემბერს, ჩვენი დროით გამთენიისას, "დალასი" "მილუოკი ბაქსს" უმასპინძლებს.

მომზადებულია gbf.ge-ს მიხედვით