ამერიკის ნაკრები ევროპაშია და უკვე პირველი ამხანაგური მატჩის ჩატარებაც მოასწრო. მაიკ კრიჟეჟვსკის გუნდი მადრიდის საერთაშორისო ტურნირში ჩაება, სადაც მის გარდა ესპანეთისა და ლიტვის ნაკრებები თამაშობენ. პირველ მატჩში ოკეანისგაღმელ სტუმართა მეტოქე ლიტვა იყო, რომელმაც ერთი დღით ადრე ესპანეთთან 19 ქულა (75:94) წააგო.
პირველ მეოთხედში ამერიკელი "პროფები" საკუთარ თავს არ ჰგავდნენ - თამაშიდან ნატყორნი 21 ბურთიდან მხოლოდ სამმა (!) მიაღწია მიზანს, ამას დაემატა ექვსი შეცდომა და პირველი 10 წუთის შემდეგ ტაბლოზე უცნაური რიცხვები ეწერა - 15:7 ლიტვის სასარგებლოდ.
მეორე მეოთხედში თამაშის სურათი
მესამე მეოთხედში მაყურებელმა, როგორც იქნა, შედეგიანი თამაში იხილა - ამერიკელებმა მიზანი გაასწორეს, ლიტველებიც ცდილობდნენ არ ჩამორჩენოდნენ მოწინააღმდეგეს, მაგრამ ამ ათწუთეულში ცხრა ქულით ნაკლები დააგროვეს და სამი მეოთხედის შემდეგ წინ უკვე "დრიმ თიმი" იყო - 57:49.
მატჩის ბედი ბოლო მეოთხედის პირველ ნახევარში გადაწყდა. ამერიკამ ფანტანტისკური გაქცევა მოაწყო - 15:0, რომლის სულისჩამდგმელებიც რასელ უესტბრუკი და ერიკ გორდონი აღმოჩდნენ. ანგარიში 71:49 გახდა, თუმცა ლიტვის სასახელოდ უნდა ითქვას, რომ მან ბრძოლა არ შეწყვიტა და 6:0 გაქცევით უპასუხა მეტოქეს, მაგრამ ბალტიისპირელთა მონდომებას რუდი გეიმ გადაუსვა ხაზი. მან ჯერ პაულიუს იანკუნასს დაუფარა და იქვე სამქულიანიც მოათავსა კალათში, რის შემდეგაც ლიტველებს დიდად აღარ გამოუდვიათ თავი.
ამერიკამ 58 ტყორცნიდან 27 მოათავსა კალათში, ლიტვის ანალოგიური მაჩვენებელი - 62-დან 25 ზუსტი ტყორცნა იყო.
ესპანეთი-ლიტვა 94:75
24:19, 25:22, 25:13, 20:21
ე: მ. გასოლი (18), ნავარო (13), რეიესი (13), გარბახოსა (8), ლული (7), კალდერონი (7), ფერნანდესი (6).
ლ: კლეიზა (19), კალნეიტისი (13), იანკუნასი (10), გეჩევიჩუსი (8), კლიმავიჩუსი (7), სეიბუტისი (6).
აშშ-ლიტვა 77:61
7:15, 21:14, 29:20, 20:12
ა: დურანტი (15), გეი (14+5 მოხსნა), უესტბრუკი (12+5 მოხსნა), ბილაპსი (8).
ლ: კლეიზა (12), იავტოკასი (10), პოჩიუსი (7), კალნეიტისი (7), მაჩიულისი (7).
ბრაზილია ნენეს გარეშე
ბრაზილიის ნაკრების წამყვანი ცენტრი ნენე ილარიო მსოფლიოს ჩემპიონატზე ვერ ითამაშებს. "დენვერ ნაგეტსის" კალათბურთელმა, რომელმაც მარცხენა ფეხის ტრავმის გამო მოსამზადებელი ეტაპის დიდი ნაწილი გამოტოვა, ლიონის საერთაშორისო ტურნირზე მოსინჯა ძალები, მაგრამ საფრანგეთის ნაკრების წინააღმდეგ მხოლოდ 12 წუთი დაჰყო მოედანზე, რის შემდეგაც დაზიანებულ ფეხში ტკივილი იგრძნო და მოედანი დატოვა.
გუნდის ექიმმა ვისენტე ანდეროლიმ ნენეს კუნთის დაჭიმვა დაუდგინა, რის გამოც კალათბურთელი 10 დღე ვერ შეძლებს ვარჯიშს. ბრაზილიელთა სამწვრთნელო შტაბმა გადაწყვიტა აღარ შეყვანოს დენვერელი საბოლოო განაცხადში. მის ნაცვლად მსოფლიოს ჩემპიონატზე "ლე მანის" წევრი ჟოაო პაულუ ბატისტა ითამაშებს.
დანაკლისია საფრანგეთის ნაკრებშიც. "დალას მავერიქსის" ცენტრმა იან მაინმიმ თითის ტრავმა მიიღო და ვერ ასწრებს მსოფლიოს ჩემპიონატისთვის გამოჯანმრთელებას. მიუხედავად ამისა, ფრანგების დამრიგებელი ვენსან კოლე არ ჩქარობს მაინმის შემადგენლობიდან გამოყვანას და მას ბოლომდე ენდობა. სამედიცინო შტაბის წინასწარი პროგნოზით, კალათბურთელი დაახლოებით 10 დღეს გამოტოვებს.
გუნდებმა საბოლოო შემადგენლობები 24 აგვისტოსთვის უნდა დაასახელონ.
კანადის ნაკრებმა ვერ შეძლო "სან ანტონიო სპურსის" ფორვარდ მეტ ბონერით შემადგენლობის გაძლიერება. ქვეყნის იმიგრაციის სამსახურმა ზედიზედ მეორედ უთხრა უარი კალათბურთელს კანადის პასპორტის დაჩქარებულ რეჟიმში მიღებაზე.
შეგახსენებთ, რომ ბონერი ამერიკაშია დაბადებული, თუმცა კანადელი ცოლი ჰყავს და უკვე რამდენიმე წელია ამ ქვეყანაში ცხოვრობს.
ლელო
