სანამ ევროპელები კონტინენტის პირველობისთვის ემზადებიან, ეროვნული საკალათბურთო ასოციაციის კიდევ ერთმა ვარსკვლავმა გამოთქვა ოკეანის გაღმა თამაშის სურვილი. ეს გახლავთ "ოკლაჰომა-სიტის" სუპერფორვარდი კევინ დურანტი. ასეთივე გეგმა აქვს "დენვერ ნაგეტსის" გამთამაშებელ ტაი ლოუსონს. ისინიც დერონ უილიამსის მაგალითით არიან მოხიბლულები და სავარაუდოდ, არ დაელოდებიან NBA-ის კლუბების მფლობელებსა და პროფკავშირს შორის მოლაპარაკებებს და ევროპას მიაშურებენ.
* * *
ტაიშონ პრინსის აგენტმა ბილ დაფიმ ერთ-ერთ გაზეთთან კომენტარში განაცხადა, რომ მას დაუკავშირდა "დეტროიტ პისტონზის" პრეზიდენტი ჯო დუმარსი და პრინსთან ურთიერთობის გახანგრძლივებაზე ჩამოუგდო სიტყვა. საკმაოდ საინტერესო ინფორმაციაა იმის
* * *
საინტერესო გამოკითხვა ჩაატარა ჩინეთის ერთ-ერთმა პოპულარულმა სოციალურმა ქსელმა. მის კლიენტებს დაუსვეს ერთი შეკითხვა - გააგრძელებენ თუ არა NBA-ის მატჩების ტრანსლიაციების ყურებას მას შემდეგ, რაც კარიერის დასრულების შესახებ გამოაცხადა იაო მინმა. გამოკითხულთა 55-მა პროცენტმა უარყოფითი პასუხი გასცა. სხვათა შორის, ამ სოციალურ ქსელში NBA-ის 4,3 მილიონი თაყვანისმცემელია გაწევრიანებული - ორჯერ მეტი, ვიდრე "ტვიტერზე". სულ კი ჩინეთში აღრიცხულია კალათბურთის მოთამაშე დაახლოებით 300 მილიონი ადამიანი. მსოფლიოს უძლიერესი ლიგისთვის ეს მნიშვნელობით მეორე ბაზარია ამერიკის შემდეგ. და ეს აწყობილი სისტემა, შესაძლოა, ერთი ადამიანის სპორტიდან წასვლის გამო მოიშალოს.
* * *
"ფილადელფიას" მძიმე ფორვარდს ელტონ ბრენდს ახალი პროფესიის ათვისება სურს. კალათბურთელი ცნობილი რეპერის თუფაქ შაქურის ბიოგრაფიით შექმნილი ფილმის პროდუსერი გახდება.
სურათის აღმასრულებელი პროდიუსერი თავად რეპერის დედა იქნება, რეჟისორი - ანტუან ფუკუა. "თუფაქის" გადაღებები ამა წლის სექტემბერში დაიწყება.
* * *
სპორტის სახეობის შეცვლას აპირებს "ოლ სტარზე" ჩატენვების კონკურსის სამგზის გამარჯვებული ნეიტ რობინსონი. "ოკლაჰომას" მცველი, თავის დროზე, ვაშინგტონის უნივერსიტეტის გუნდში ამერიკულ ფეხბურთს თამაშობდა და ახლა ახალგაზრდობის გახსენებას აპირებს.
რობინსონს სერიოზული გეგმები აქვს - ის მთელი წელი მოემზადება კორნერბეკის პოზიციაზე და მომავალ წელს NFL დრაფტზე მოხვედრას ეცდება.
"შემიძლია ფეხბურთის თამაში - ამაში დარწმუნებული ვარ. და ვაპირებ გავაკეთო ის, რაც აქამდე არც ერთ კალათბურთელს არ გაუკეთებია - ფეხბურთი ვითამაშო. თანაც ეს შესანიშნავი რეკლამა იქნება იმ გუნდისთვის, რომელიც ჩემთან კონტრაქტს გააფორმებს", - განუცხადა გაკვირვებულ ჟურნალისტებს რობინსონმა.
* * *
ლეგენდარული მწვრთნელი დონ ნელსონი, რომელიც ლიგის რეკორდსმენია მოგებული მატჩების რაოდენობით, სამწვრთნელო კარიერის განახლებას აპირებს. ნელსონი "მინესოტას" მთავარი მწვრთნელის პოსტით დაინტერესდა.
გუშინ, "ტიმბერვულვზის" პრეზიდენტმა დევიდ კანმა ოფიციალურად გამოაცხადა კურტ რემბისის განთავისუფლების შესახებ და აღნიშნა, რომ უნდა ამ პოსტზე სწრაფი კალათბურთის მიმდევარი სპეციალისტი იხილოს.
ამ მომენტისთვის "მგლების" მწვრთნელობაზე ერთადერთი ოფიციალური კანდიდატია "პორტლენდის" მთავარი მწვრთნელის ასისტენტი ბერნი ბიკერსტაფი, თუმცა ისიც უნდა გვახსოვდეს, რომ უმუშევრები არიან ძალიან ძლიერი და გამოცდილი სპეციალისტები - ჯერი სლოუნი, რიკ ადელმანი და ლარი ბრაუნი.
* * *
ლოკაუტის დაწყებიდან ორი კვირის თავზე NBA-ის მინიმუმ ორმა კლუბმა დაიწყო შტატების შემცირება. სააგენტო AP-ის ინფორმაციით, ბოლო კვირის განმავლობაში "შარლოტ ბობკეტსის" ხელმძღვანელობამ შვიდი თანამშრომელი გაანთავისუფლა, მათ შორის რადიოკომენტატორი, კორპორატიული კომუნიკაციების დირექტორი და საზოგადოებასთან კავშირის მენეჯერი.
შეგახსენებთ, რომ ერთი კვირის წინ სამუშაო დაკარგა "დეტროიტის" 15-მა თანამშრომელმა.
ყოველდღიური სპორტული გაზეთი "ლელო"
