"დენვერ ნაგეტსის" ლიდერ კარმელო ენტონის კიდევ ერთი პრეტენდენტი გამოუჩნდა. "ლოს ანჯელეს ლეიკერსის" ხელმძღვანელობამ წინასწარი მოლაპარაკებები გამართა "დენვერის" ხელმძღვანელობასთან და ენტონის სანაცვლოდ ძირითადი ცენტრი ენდრიუ ბინუმი შესთავაზა. ამ ინფორმაციას ESPN-ის მიმომხილველი კრის ბროსარი ავრცელებს.
მისი თქმით, "ნაგეტსს არ აინტერესებს რონ არტესტი და ლამარ ოდომი, ამიტომაც "ლეიკერსს" ენტონის ხელში ჩასაგდებად ტრეიდში სხვა კალათბურთელების ჩართვა მოუწევს.
ჩემპიონთან მოლაპარაკებები საწყის სტადიაშია, ამიტომაც "დენვერის" ხელმძღვანელობა არ გამორიცხავს სამმხრივ გაცვლას "ნიუ იორკთან" და "მინესოტასთან", რომლის შესახებაც რამდენიმე დღის წინ გამოცხადდა. ამავდროულად, "ლეიკერსის" წარმომადგენლები კომენტარს არ აკეთებენ
პირსი ტიტულს დაიცავს
ეროვნული საკალათბურთო ასოციაციის ხელმძღვანელობამ "ყველა ვარსკვლავის უქმეებზე" სამქულიანების კონკურსის მონაწილეთა სია გამოქვეყნა. შარშანდელმა გამარჯვებულმა, "ბოსტონ სელტიქსის" ფორვარდმა პოლ პირსმა 19 თებერვალს, ლოს ანჯელეს "სტეიპლ ცენტრში" ტიტულის დაცვის შანსი მიიღო.
კონკურსში მონაწილეობას მიიღებს "ბოსტონის" კიდევ ერთი კალათბურთელი - რეი ალენი, რომელსაც ეს პრიზი 2001 წელს აქვს მოგებული. სხვათა შორის, ვეტერანი მცველი ახლოა რეჯი მილერის რეკორდის გაუმჯობესებასთან. სულ მალე რეის რეგულარულ ჩემპიონატში ყველაზე მეტი სამქულიანი ექნება ჩაგდებული.
ბოსტონელებს კონკურენციას გაუწევენ კევინ დურანტი ("ოკლაჰომა"), დანიელ გიბსონი ("კლივლენდი"), ჯეიმს ჯონსი ("მაიამი") და დორელ რაიტი ("გოლდენ სტეიტი").
ბიზლი რამდენიმე მატჩს გამოტოვებს
"მინესოტა ტიმბერვულვზის" ერთ-ერთმა ლიდერმა მაიკლ ბიზლიმ ჟურნალისტებს განუცხადა, რომ დროა ტრავმირებული ფეხის მკურნალობაზე იფიქროს. ამისათვის კალათბურთელი უახლოესი რამდენიმე მატჩის გამოტოვებას გეგმავს.
ბიზლი ამ აზრამდე "ნიუ ორლეანთან" მატჩის შემდეგ მივიდა. იმ შეხვედრაში ფორვარდმა ფეხი გადაიბრუნა და ვერ შეძლო თამაშის გაგრძელება. მიმდინარე რეგულარულში ბიზლის მაჩვენებლებია - 19.9 ქულა და 5.6 მოხსნა.
როი ამ კვირას დაბრუნდება
"პორტლენდის" შემტევმა მცველმა ბრენდონ როიმ სამედიცინო შემოწმება გაიარა და ექიმებისგან სრულფასოვანი ვარჯიშების განახლების უფლება მიიღო. შეგახსენებთ, "ბლეიზერსის" ლიდერმა იანვარში ორივე მუხლზე ოპერაცია გადაიტანა და დღემდე აღდგენით კურსს გადიოდა. რამდენიმე ვარჯიშის შემდეგ როი გუნდის შემადგენლობაში დაბრუნდება და რეგულარულ ჩემპიონატში გამოსვლას განაახლებს.
ამ სეზონში ბრენდონმა მხოლოდ 23 მატჩში მოასწრო მონაწილეობის მიღება. მის ანგარიშზეა 16.6 ქულა, 3.0 მოხსნა და 3.3 შედეგიან პასი.
ნოჩიონი ესპანეთში ფიქრობს
"ფილადელფია სიქსერზის" არგენტინელი ფორვარდი ანდრეს ნოჩიონი ეროვნულ საკალათბურთო ასოციაციაში კარიერის დასრულებასა და ესპანეთში დაბრუნებაზე ფიქრობს. სამხრეთამერიკელს "კახა ლაბორალში" სურს თამაშის გაგრძელება, კლუბში, საიდანაც შვიდი წლის წინ ამერიკის დასაპყრობად გაემგზავრა. ვებგვერდ encestando.es-ის ცნობით, ნოჩიონიმ უკვე დაიწყო მოლაპარაკებები ესპანეთის ჩემპიონთან სავარაუდოდ დაბრუნების შესახებ.
ესპანური პრესა ირწმუნება, რომ ფორვარდმა უარი თქვა 6.6 მილიონ დოლარზე. ამ კონტრაქტის მიხედვით ანდრესი NBA-ში 2013 წლის ზაფხულამდე დარჩებოდა, მაგრამ არგენტინელი შეთავაზებამ არ დააკმაყოფილა.
ნოჩიონი "კახა ლაბორალში" (მაშინ კლუბი "ტაუგრესი" ერქვა) 2000-04 წლებში თამაშოდა. ამ დროის განმავლობაში არგენტინელი ესპანეთის ჩემპიონი და თასის მფლობელი გახდა.
