სპორტის სასახლეში შეკრებილ გულშემატკივარს ჩვენმა ნაკრებმა სანახაობრივი თამაში შესთავაზა.
მაგრამ ყველაზე მეტად აღსანიშნავია, რომ ნაკრების თამაშების დროს ქომაგს უკვე არა მარტო სანახაობის ხილვა, არამედ გართობის საშუალებაც აქვს, რაც აქამდე ქართველ გულშემატკივრებს ნამდვილად აკლდათ.
საქართველოს ნაკრების თამაშებზე სიარული ნამდვილად ღირს, რადგან საქართველოს კალათბურთის ფედერაციამ დაიწყო გულშემატკივრების განწყობაზე და რაც მთავარია, გართობაზე ზრუნვა.
მატჩის დასაწყისში საქართველოსდროშიანი ბანერები ყველა მოსულ ადამიანს სკამზე ხვდება და ჰიმნის დროს ერთგვარი ფლეშმობი იქმნება.
სიახლეა, რომ სპორტის სასახლეში ორი მონიტორი დამონტაჟდა, სადაც ტაიმებს შორის შესვენებისას გასართობი ღონისძიებები და ასევე, გათამაშება იმართება.
ალბათ, ხშირად გინახავთ ე.წ. kiss cam-ი, როცა ოპერატორი ობიექტივში წყვილს ახვედრებს, რომლებმაც ერთმანეთს უნდა აკოცონ. გარდა ამისა, არის dance cam-ი, როცა ობიექტივში მოხვედრილი მაყურებლები ცეკვავენ.
მონიტორზე ასევე სხვადასხვა მოწოდება იწერება, რომელიც აქტიური გულშემატკივრობისკენ გიბიძგებს.
ტაიმებს შორის შესვენებისას ქართულ ტრადიციულ ცეკვასაც ასრულებენ, რომელიც ქვეყნის კულტურულ მხარეს უსვამს ხაზს.
არ დაგვავიწყდეს საქართველოს ნაკრების თილისმა ლომი Geo, რომელიც მოუწოდებს ტრიბუნაზე შეკრებილებს, უფრო მეტად გაამხნევონ საყვარელი გუნდი და ასევე - წამყვანი, რომელიც ხალხს კალათბურთელების მხარდაჭერისკენ მოუწოდებს.
ამ ყველაფრით კი ტრიბუნებზე კარგი განწყობა იქმნება. მსგავსი მეთოდები ადამიანებს უბიძგებს, რომ მატჩებზე იარონ, რადგან გარდა საყვარელი გუნდის ცქერისა, მათ გართობის საშუალებაც აქვთ.
მსოფლიოს ჩემპიონატის მეორე საკვალიფიკაციო ეტაპზე საქართველოს ნაკრების მეტოქეები გაირკვა