წააგეს, მაგრამ მოიგეს - საქართველომ უნგრეთს ხუთმეოთხედიან მატჩში სძლია

კეჩკემეტში მყოფმა საქართველოს კალათბურთელთა ეროვნულმა ნაკრებმა უნგრეთთან მეორე ამხანაგური მატჩი გამართა და ერთი ქულით გაიმარჯვა. ეს გახლდათ სავარჯიშო ტიპის მატჩი, რომლის დაწყებისას არც ეროვნული ჰიმნები შესრულდა, არც სუვენირები გაიცვალა და წინასწარი შეთანხმებით, სტანდარტული, 4 პერიოდის შემდეგ, ისე რომ ფრე არ დაფიქსირებულა, გუნდებმა დამატებითი დრო – 5 წუთი ითამაშეს. 4 პერიოდის შემდეგ წინ უნგრეთი იყო – 78:75, ხოლო ოვერტაიმის შემდეგ გამარჯვებული საქართველოს ნაკრები გამოვიდა – 81:80.

რადგან მატჩი დახურული იყო, არც ტელევიზიით გადაიცემოდა და არც მაყურებელი ჰყავდა, მწვრთნელებს სხვადასხვა ტიპის ტაქტიკის დამუშავების საშუალება მიეცათ, რომლებიც მოედანზე მოთამაშეთა შეყვანაში შეზღუდულები არ იყვნენ. ჩვენს ნაკრებში თხუთმეტივე კალათბურთელმა ითამაშა, რომლებსაც თავის გამოჩენის საშუალება მიეცათ.

უნგრეთის ნაკრებში არ ითამაშა ცნობილმა ადამ ჰანგამ, რომელიც დარბაზში არც მოსულა. საქართველოს ნაკრები თავიდან იგებდა, შემდეგ კი ჩამორჩებოდა. მატჩის ბოლო წუთებზე საქართველო დაწინაურდა თუმცა მასპინძლებმა მოახერხეს და 4 პერიოდი სათავისო ანგარიშით დაასრულეს – 78:73. დამატებით დროში უკვე ქართველებმა იძალეს. კარგი დაცვისა და გონივრული შეტევების ხარჯზე საბოლოოდ მეტოქე ჩამოიტოვეს და ქულით გაიმარჯვეს. 2 მატჩის ჯამში, გუშინ და დღეს, საქართველომ და უნგრეთმა თანაბარი ანგარიში დააფიქსირეს – 169:169.

საქართველოს ნაკრები თბილისში ხვალ, 7 აგვისტოს დაბრუნდება და მზადებას განაგრძობს. შემდეგი სპარინგ მატჩი ჩვენს გუნდს 12 აგვისტოს, ისრაელის ნაკრებთან ელის.

საქართველოს ნაკრები უნგრეთთან ერთი ქულით დამარცხდა [VIDEO]