რა ეშველება ახლა ამ საქმეს? არც არაფერი - ინგლისის ნაკრები ბარგს ალაგებს და შინ გასამგზავრებლად ემზადება. ეს არ იყო გუნდი, რომელსაც მსოფლიოს ჩემპიონობის მოგების პრეტენზია უნდა ჰქონოდა, გამომდინარე იმ თამაშიდან, რაც მუნდიალზე ჩატარებულ ოთხ მატჩში აჩვენაო, - დაახლოებით ამგვარი შეფასება გააკეთა ინგლისურმა მედიამ. რა თქმა უნდა, ხაზი გაესვა რეფერისა და მისი ასისტენტის მიერ დაშვებულ შეცდომას (არა მგონია, ზუსტი შეფასება იყოს), მაგრამ ინგლისელები მარცხის მთავარ მიზეზს სხვაგან ეძებენ და მართალიცაა...
ბედის ირონიაა - ისევ ინგლის-გერმანიის დაპირისპირება, ისევ ხარიხიდან ასხლეტილი ბურთი... მაგრამ
მაგრამ ახლა... შეიძლება ბევრმა ისიც თქვას, რომ ინგლისელებს ცოდვამ უწიათ. მაგრამ რა დააშავეს ინგლისელებმა? ან მაშინ გერმანელებმა? პრობლემა, რა თქმა უნდა, მსაჯებშია. ამ პრობლემის გადაწყვეტა ფიფას ხელშია - ვიდეორეფერის შემოღება, რაც მსოფლიო ფეხბურთის მმართველ, გაცვეთილ დოგმებზე ნაშენებ ორგანიზაციას ცოცხალი თავით არ უნდა ცვლილებებზე წასვლა. ადამიანური ფაქტორი იკარგებაო, - ერთსა და იმავეს იმეორებს ზეპ ბლატერი. მაგრამ მეხუთე მსაჯი? რომელიც ევროპის ლიგაში გამოსცადეს და წარმატებაც უწინასწარმეტყველეს?
კაცმა რომ თქვას, გერმანია-ინგლისის მატჩში ისეთი რამ მოხდა, ამის დაფიქსირებას ვიდეორეფერი არც სჭირდებოდა. აი, არგუმენტი, რომელსაც ფიფა ააფრიალებს. მგონი, ამ ყბადაღებული ვიდეორეფერის ამბავი კიდევ დიდი ხნით გადაიდო. ამიტომ ახლა ასე მოხდება - დაისჯება პატივცემული ურუგვაელი არბიტრი ხორხე ლარიონდა თავის ასისტენტიანად (მაურიოსი ესპინოსა, რომელიც უპირველესი პასუხისმგებელია ალბათ) და იმავე ბახრამოვის, ბაირონ მორენოს (სამხ. კორეა-იტალია 2002 წელს), ჯამალ ღანდურისა (სამხ. კორეა-ესპანეთი ასევე 2002 წლის მუნდიალზე) და სხვა ოდიოზური კოლეგების გვერდით დაიდებს ბინას საფეხბურთო ისტორიის ნეგატივებში...
პაატა გელაშვილი
